Nodra Vakaitavi na Marama ena Vakasokumuni i Isireli

E totoka na tiko oqo kei kemuni, na ganequ lomani. Oqo e dua na ka au a sotava o ni na raica kina noqu nanuma baleti kemuni kei na nomuni gugumatua cecere sa mai nomuni isolisoli.

Dua na siga au a vosa tiko ena dua na ivavakoso mai Sauca Amerika, kau sa marautaka sara na noqu ulutaga, ena kena kaukauwa, au a kaya, “Me vaka niu tinadra e 10 na gone, au kaya kina eke …” Kau a tomana sara na noqu vosa.

Au sega ni kila niu a cavuta na vosa tinadra. Ni sa kila o noqu daunivakadewa, niu sa cala, a veisautaka na vosa tinadra ki na tamadra, ka ra sega kina ni kila na ivavakoso niu a tukuna niu tina. Ia a rogoca na watiqu o Wendy, ka a marautaka na noqu vosa cala vaka-Freud.

Ena gauna o ya, na gagadre titobu ni yaloqu meu veisautaki vuravura—me vaka e cakava duadua ga o tina—e buebue cake na yaloqu. Ena veiyabaki e tarava, ena gauna au dau tarogi kina na vuna au digitaka meu vuniwai, sa duadua tu ga na kena isau: “Baleta niu a sega ni digitaka rawa meu tina.”

Yalovinaka na gauna au cavuta kina na vosa tina, au sega ni tukuni ira tikoga na marama era vakasucu gone se ira era susu gone ena bula oqo. Au tukuni ira taucoko tiko na luvedrau marama na noda iTubutubu Vakalomalagi. Na marama yadua sa tina ena nona dodonu vakalou tawamudu.

Nikua, niu tama ni 10 na gone—ciwa na luvequ yalewa ka dua na tagane—kau Peresitedi ni Lotu, sa noqu masu mo vakila na titobu ni noqu lomani kemuni—na veika baleti iko kei na vinaka kece o cakava. E sega e dua me cakava rawa na ivalavala ni marama dodonu. E sega e dua me tomuria rawa na veiuqeti ni dua na tina.

E rawa vakavuqa ki na tagane me solia na loloma ni Tamada Vakalomalagi kei na iVakabula vei ira eso. Ia e tiko vei ira na marama na kena isolisoli digitaki—e isolisoli vakalou. Sa rawa mo ni vakila na ka e gadreva tiko e dua na tamata—kei na gauna e gadreva kina. E rawa mo dodoliga yani, veivakacegui, vakavulica, ka vaqaqacotaka e dua ni sa gagadre tiko.

E duidui nodra rai na marama mai vei ira na turaga, isa, keimami gadreva na nomuni vakasama! Na nomuni itovo e liutaki kemuni mo ni daunanumi ira taumada na tamata, ka raica me laki mana na cakacaka eso vei ira na tamata.

Na Tinada lagilagi o Ivi—ena nona raiyawa baleta na ituvatuva nei Tamada Vakalomalagi—a vakavuna na ka eda vakatoka ‘‘na Lutu.” Na nona digidigi vuku ka qaqa kei na digidigi veitokoni nei Atama a muataki yani kina na ituvatuva ni marau ni Kalou. Rau sa rawata kina vei keda yadua meda tadu mai ki vuravura, meda vakayago, ka vakadinadinataka ni da na digitaka meda tutaki Jisu Karisito nikua, me vaka ga noda cakava mai na bula taumada.

Kemuni na ganequ lomani, e tiko vei kemuni na isolisoli vakayalo digitaki ka tudei. Au kerei kemuni nikua, ena inuinui taucoko ni yaloqu, mo masu mo kila na nomu isolisoli vakayalo—me teivaki, taurivaki, ka vakatetea, vakalevu cake mai na kena o sa cakava. O ni na veisautaki vuravura ni ko cakava oqo.

Kemuni na marama, ko ni sa veiuqeti ka tuva na itagede kilikili me vakatotomuri. Meu tukuna mada vakalailai na yavu ni rua na itukutuku bibi a vakaraitaki ena noda koniferedi raraba sa oti. Kemuni, na ganequ lomani, sa baleti kemuni ruarua.

iMatai, na veiqaravi. Na itagade cecere ni veiqaravi oqo o ya na noda iVakabula, o Jisu Karisito. Vakararaba, ira na marama, sa kena ivakarau tu, me ra sa itagede cake oya mai na tagane. Ni ko sa veiqaravi dina sara, ko sa muria na yalomu mo vukea e dua me vakila vakalevu cake na loloma ni iVakabula. Na gagadre ni veiqaravi sa kedra ituvaki na marama yalododonu. Au kila eso na marama era masu e veisiga “O cei beka Ko ni vinakata meu vukea nikua?”

Ni bera ni kaburaki ena Epereli 2018 na sala cecere ka savasava cake ni qaravi ni tamata, a nodra ivakarau tu eso na tagane mera toqa nodra itavi ni veituberi ni vuvale ni sa “caka” ka toso sara ki na kena e tarava.

Ia ni ko sa vakila e dua na marama o sikova e gadreva me vukei, o veivuke vakatotolo ka vakayacora ena vula taucoko. O ya, na sala taumada o ni veivakavulici ena veisiko ka uqeta noda toroya cake ki na veiqaravi.

iKarua, ena koniferedi raraba sa oti, eda a veisautaka kina na kuoramu ni Matabete i Melikiseteki. Ni vakasamataki na sala mera vukei na tagane ena Lotu me mana cake nodra ilesilesi, eda a raica matau kina na nodra ivakaraitaki na iSoqosoqo ni Veivukei.

Ena iSoqosoqo ni Veivukei, era soqoni vata mai na marama ni veiyabaki ni bula kei na itagede ni bula. Na veiyabaki tini ni bula sa ibolebole qaqa, ia, ko ni tu kina, ena veimacawa, ka veimaliwai, tubu cake ka vakavulica vata na kosipeli, ka cakava me dua na veisau dina e vuravura.

Ia, ni vakamuri na nomuni ivakaraitaki, na Matabete i Melikiseteki era sa lewe ni kuoramu ni italatala qase. Na yabaki ni nodra bula na tagane oqo e tekivu mai na 18 ki na 98 (se sivia), ka rabailevu vakatautauvata nodra kila ena matabete kei na Lotu. Sa rawa ki na veitacini oqo me ra cakava na isema qaqaco vakatagane, vuli vata, ka vakalougatataka mana kina eso.

Ko ni nanuma tiko ena Jiune sa oti, keirau a vosa kei Sister Nelson vei ira na itabagone ena Lotu. Keirau sureti ira mera curu ki na mataivalu itabagone ni Turaga mera vukea na sokumuni kei Isireli ena yasa e rua ni ilati. Na sokumuni oqo sa ibolebole cecere duadua, sa inaki cecere duadua, ka cakacaka cecere duadua e vuravura nikua!¹

Sa inaki era gadrevi sara kina na marama, baleta ni ra dau veisautaka na veisiga ni mataka. Sa noqu kerekere vakaparofita nikua vei kemuni, na marama ena Lotu, ni veisautaka na veisiga ni mataka ena nomuni vukea me sokumuni o Isireli sa veiseyaki.

Mo tekivu beka evei?

E va na noqu veisureti:

iMatai, au sureti iko mo lolo me 10 na siga mo lako tani mai na itukutuku raraba kei na itukutuku tale eso e vakatani e tawasavasava ki na nomu vakasama. Masu mo kila na veivakauqeti cava me vagalalataki ni ko lolo tiko. Na mana ni nomu lolo ni 10 na siga o na kurabui kina. Na cava o sa raica rawa ni ko lako tani mai na veika e raica o vuravura ka sa vakamavoataka tu na yalomu? Sa veisau beka oqo na vanua o gadreva mo laki tiko kina ka cakacaka? Sa veisau beka na veika o vakaliuca tiko—ke vica mada ga? Au kerea kina mo vola ka vakamuria na veivakauqeti yadua.

iKarua, au sureti iko mo wilika na iVola i Momani ena gauna oqo ka laki cava na yabaki. Ena vaka me dredre toka ena vuku ni veika ko ni saga tiko ena nomuni bula, ia ke o ciqoma na veisureti oqo ena taucoko ni yalomu, na Turaga ena vukea mo raica na sala mo rawata kina. Ni ko qai vulica ena masumasu, au yalataka ni na dola mai vei iko o lomalagi. Ena vakalougatataki iko na Turaga ena levu cake ni veiuqeti kei na ivakatakila.

Ni ko wilika, au vakauqeti iko mo makataka na tikina yadua e tukuna se vakatakila tiko na iVakabula. Me sa qai yalomu dina mo tukuni Karisito, reki vei Karisito, ka vunautaki Karisito ki na nomu vuvale kei na itokani.² Dou na volekata kina na iVakabula mai na iwalewale oqo. Na veisau, vakakina na cakamana, ena tekivu me yaco.

Ena mataka nikua sa mai vakaraitaki kina na lewenivuli vou tokona na Lotu, me kena usutu na vuvale, me vakayacori ena Siga Tabu. Kemuni, na ganequ lomani, ko ni sa tiki bibi me rawati na sasaga vou ni vakavulici vakatauvata cokovata ni kosipeli. Yalovinaka vakavulici ira ko lomana ena veika o sa vulica mai na ivolanikalou. Vakavulica na sala mera gole vua na iVakabula ka vakabulai ena Nona kaukauwa veivakasavasavataki ni ra valavala ca. Ka vakavulica na sala mera taura Nona kaukauwa veivaqaqacotaki e veisiga ni nodra bula.

iKatolu, tauyavutaka e dua na gauna tudei ni tiko e valetabu. Oqo ena gadrevi kina mo solibula cake ena nomu bula. Ni ko lako wasoma ki valetabu ena rawa vua na Turaga me vakavulici iko mo taura na Nona kaukauwa ni matabete sa nomu isolisoli mai na Nona valetabu. Vei kemuni o ni tiko vakayawa mai valetabu, au sureti kemuni mo vulica ka masulaka na veika ni valetabu ena ivolanikalou kei na nodra vosa na parofita bula. Saga me levu nomu kila, mo kila vinaka cake, mo vakananuma vakalevu na valetabu mai na kena o a cakava taumada.

Na lotu ni itabagone e vuravura raraba ena Jiune sa oti, au a tukuna kina na cauravou a veisau nona bula ni rau veisautaka nona itubutubu na nona talevoni vuku me kena e dolavi. Na tinai cauravou oqo e marama vakabauta qaqa. A raici luvena ni sa kui tiko ki na digidigi eso ena rawa me tarova na nona laki kaulotu. A laki vakatakekere e valetabu me kila na sala vinaka me vukei luvena kina. A salamuria ena nona muria na veivakauqeti yadua.

A kaya: “Au vakila ni dusimaki au na Yalo meu raica na talevoni nei luvequ ena gauna eso meu toboka na ka eso. Au sega ni kila na curuma na talevoni vuku vakaoqo, ia a tuberi au na Yalo ki na itukutuku raraba au sega tu ni vakayagataka! Au kila ni Yalo sa vukei ira na itubutubu era vakasaqara na veidusimaki me taqomaki na luvedra. [Taumada] a cudruvi au sara o luvequ. … Ia ni oti ga e tolu na siga, a vakavinavinakataki au! Sa vakila o koya na kena duidui.”

Na ivakarau kei na itovo nei luvena sa veisau sara ga. Sa veivuke vakalevu sara e vale, matadredredre vakalevu, ka vakarorogo vakavinaka ena lotu. A taleitaka nona gauna ena tobu ni papitaiso e valetabu ka vakarau me kaulotu.

Na ikava ni noqu veisureti, vei kemuni sa yalomatua mai, mo ni vakaitavi vinaka ena iSoqosoqo ni Veivukei. Au kerea mo ni vulica na itukutuku raraba ni inaki ni iSoqosoqo ni Veivukei. E veivakauqeti. Ena rawa me dusimaki iko mo tauyavutaka nomu itukutuku ni inaki ni nomu bula. Au kerei iko mo karona na dina ni itukutuku raraba ni iSoqosoqo ni Veivukei a tabaki ena 20 na yabaki sa oti.³ E dua na itaba ni itukutuku raraba oqo e lili toka ena loma ni valenivolavola ni Mataveiliutaki Taumada. Au marau ena veigauna au wilika kina. E tukuni iko kei na ituvaki sa gadreva vei iko na Turaga ena gauna saraga oqo ni ko cakava nomu itavi mo vukea na sokumuni i Isireli sa veisebayaki.

Kemuni na ganequ lomani, keimami gadrevi kemuni! Keimami “gadreva nomuni kaukauwa, nomuni saumaki mai, nomuni ivakadinadina, nomuni rawa ni veiliutaki, nomuni yalomatua, kei na domomuni”⁴ E sega ni rawa me sokumuni o Isireli ke sega oi kemuni.

Au lomani kemuni kau vakavinavinaka ka vakalougatataki kemuni mo ni gumatua mo biuti vuravura ka vukea na cakacaka bibi sa maqusataki tiko. Eda rawa ni cakava vata na veika kece e gadreva na Tamada Vakalomalagi me vakarautaki ko vuravura ki na iKarua ni Lako Mai nei Luvena Lomani.”

Sai Jisu na Karisito. Oqo na Nona Lotu. Au vakadinadinataka oqo ena yaca i Jisu Karisito, emeni.