Na Bukawaqa ni Keba ena Vakabauta

Kemuni na taciqu kei na ganequ lomani, e sega beka ni ka totoka me ciqomi tikoga na ivakatakila mai lomalagi mai vei Peresitedi Russell M. Nelson kei ira na noda iliuliu ni Lotu era veisureti meda bula ena sala vou ka savasava cake,¹ ena itikotiko kei na lotu, ena taucoko ni yaloda, vakasama, kei na kaukauwa?

Ko ni sa bau cakava beka e dua na ka o a sega ni vakarau tu kina se liga lala tu ia ko ni a kalougata kina ni ko a tovolea?

E a vakakina vei au. Me vaka oqo.

Ena vica na yabaki sa oti, o Elder Richard G. Scott, dua na lewe ni Kuoramu ni iApositolo Le Tinikarua, a veisureti, “Gerrit, e rawa beka ni o mai droini vata kei au?”

E kaya o Elder Scott ni droini e dau vukei koya me vakadidike ka buli ka vou. A vola vakaoqo: “Na sasaga meu buli ka vou, ke yaco mada mera sega soti ni vinaka. … Na buli veika vou ena vakasucuma na yalo ni vakavinavinakataka na bula kei na ka sa semata na Turaga kivei keda. … Ke o sa digidigi vakavuku, e sega ni gadrevi me taura e levu na gauna.”²

E vakamacalataka o Peresitedi Henry B. Eyring na nona raitayaloyalo maqosa ni a uqeti ena “dua na yalo ni loloma,” oka kina “na loloma nei Dauniveibuli sa namaki ira na Luvena mera na vakataki Koya—mera buli-ka ka tara cake.”³ Na cakacaka ni buli veika vou nei Peresitedi Eyring sa vakarautaka na “rai cecere, vakayalo baleta na ivakadinadina kei na vakabauta.”⁴

Na droini maqosa nei Peresitedi Boyd K. Packer sa vakaraitaka e dua na itukutuku bibi ni kosipeli: “Na Kalou sai Koya na Dauniveibuli ni lomalagi kei vuravura kei na veika kecega era sa tu kina, ni veika bula kece sa ivakadinadina ni veibuli dusimaki vakalou, ka sai [koya oqo] na taucoko ni cokoti vata na veika bula, vakadidike vuku, kei na kosipeli i Jisu Karisito.”⁵

E kaya o Alama, “Na veika kece sa vakaraitaka ni dua na Kalou.”⁶ Era lagata na Lalai, “Niu rogoca na sere ni manumanu vuka seu raica na karakarawa sara ni lomalagi, … au marau niu bula tu ena vuravura totoka oqo sa bulia na Tamaqu Vakalomalagi vei au.”⁷ E marautaka o Daunivola Victor Hugo na “duavata mana ni tamata kei na veika kece ena taucoko gugumatua oqo, mai na matanisiga ki na veika somidi. … Na manumanu vuka kece era sa semati tawamudu tu. … Na o kasi kubou era sa kalokalo cokovata.”⁸

Sa kauti keda lesu ki na veisureti nei Elder Richard G. Scott.

“Elder Scott,” au a sauma, “Au gadreva meu na dauvakadidike sara ka daubuli-ka. Au qoroya niu raitayalotaka nona droinitaka na Tamada Vakalomalagi na o lelevu kei na veiroka ni lomalagi kei na wai. Ia”—au cegu balavu sara—“Elder Scott,” au a kaya, “Au sega ni kila tu na droini ena wairoka. Au leqataka deu vakacudrui iko mo tovolea mo via vakavulici au.”

A matadredredre o Elder Scott ka vakarautaka me keirau na sota. Ena siga a lokuci, a vakarautaka na pepa, iboro, kei na barasi. A droinitaka na kena vatuka ka vakasuasuataka vei au na kena pepa.

Keirau a cakava me ivakaraitaki na nona droini wai rokataki ka vakatoka Bukawaqa ni Keba ni sa Dromu na Siga. Ni toso na droini, keirau a veivosakitaka na vakabauta—ena kena vakilai na rarama kei na katakata vinaka ni bukawaqa ni keba, sa vakanadakui na butobuto kei na veilecayaki—ni so na gauna e bogi balavu, ka galili, ka yaco na noda bukawaqa ni keba ena vakabauta me inuinui ka ivakadei. Sa na kida ga mai na rarama. Noda bukawaqa ni keba ena vakabauta—vakanananu, veika a sotavi, kei na isolisoli ni vakabauta na vinaka ni Kalou kei na loloma veivueti ena noda bula—eda sa qaqaco kina ena loma ni bogi.

Sa noqu ivakadinadina—vei ira sa vakasaqara, vakadonuya, ka bulataka—na cila mai ni vakabauta, ena so na gauna, ena yaco mai se lesu mai. Ena cila mai na rarama ni da gadreva ka vakasaqara, ni da vosota ka talairawarawa ki na ivakaro ni Kalou, ni sa yaloda ki na loloma soliwale ni Kalou, veivakabulai, kei na veiyalayalati.

Ni keirau tekivu droini, sa veivakauqeti o Elder Scott, “Gerrit, ena dua ga na lesoni o na rawa ni droinitaka e dua na ka o na via maroroya ka nanuma tiko.” E dina o Elder Scott. Au mareqeta na droini ni bukawaqa ni keba ena vakabauta a vukei au o Elder Scott meu droinitaka. Na noqu maqosa ni droini a vakaiyalayala ga, ia na nanumi tiko ni bukawaqa ni keba ena vakabauta e veivakauqeti ena lima na sala.

iMatai, na noda bukawaqa ni keba ena vakabauta e uqeti keda meda kune reki ena veikabuli sa savasava.

Eda kune reki ni da raitayalotaka, vulica, ka cakava na veika vou kilikili e yaga. E dina oqo ni da vakatitobutaka noda vakabauta ka nuitaka na Tamada Vakalomalagi kei na Luvena o Jisu Karisito. E sega ni taucoko noda lomani keda ga meda vakabulai keda rawa. Ia o Tamada Vakalomalagi e lomani keda vakalevu cake ka kilai keda cake mai na noda loloma se kilai keda. Sa rawa meda vakararavi vua na Turaga ka kakua ki na noda yalomatua.⁹

Sai iko duadua beka ga a sega ni sureti ki na dua na soqo ni siganisucu?

O a iotioti beka ni tamata me digitaki, se sega ni digitaki, ki na dua na timi?

O a vakavakarau beka ki na dua na veitarogi ni vuli, veivakatarogi ni cakacaka, ko a vinakata sara ga—o a qai sega ni rawata?

O a masulaka beka e dua nomu veimaliwai, ka sega ni yaco rawa, ena vuku ni veika eso?

Ko sa bau tauvimate bibi beka, ka biuti iko o watimu, ka rarawataka nomu matavuvale?

Sa kila tu na iVakabula na keda ituvaki. Ni da vakayagataka na galala ni digidigi solia na Kalou ka cakacaka na veitikida taucoko ena yalomalua kei na vakabauta, sa vukei keda na iVakabula, o Jisu Karisito, meda sotava na ibolebole kei na reki ni bula oqo. Na vakabauta e oka kina na gagadre ka digitaka mo vakadinata. Na vakabauta e tadu talega ni da muria na ivakaro ni Kalou, a soli meda kalougata kina, ni da muria Nona sala ni veiyalayalati.

Ni da nanuma, se vakila, veilecayaki, galili, lomaoca, cudru, vakadrukai, rarawa, se gole tani mai vua na Kalou kei na Nona Lotu vakalesuimai, ena taura vakalevu cake na sasaga kei na vakabauta meda curu tale ki na Nona sala ni veiyalayalati. Ia e sa yaga dina sara! Yalovinaka lako mai, se lako tale mai, vua na Turaga o Jisu Karisito! Na loloma ni Kalou e kaukauwa cake mai na ivau ni mate—vakayago se vakayalo.¹⁰ Na Veisorovaki ni noda iVakabula sa tawayalani ka tawamudu. Oi keda yadua eda dau lakosese ka malumalumu koso. Eso na gauna, eda dau gole tani. Na Kalou sa vakadeitaka vei keda, ena vanua cava ga eda tu kina se cava eda sa cakava, e sega ni tarova nomu lesu. Sa wawa tu o Koya me mokoti keda.¹¹

iKarua, noda bukawaqa ni keba ena vakabauta e vakayaloqaqataki keda meda veiqaravi ena sala vou, maqosa vakayalo, cecere, ka savasava cake e vakasinaiti ena Yalo.

Era kauta mai na cakamana kei na kalougata ni veiyalayalati veikaroni—eda vakila kina na loloma ni Kalou ka saga na veiqaravi vei ira eso ena yalo vata oqo.

Dua na gauna sa oti, keirau a sotava kei Sister Gong e dua na tama kei nona matavuvale a vakalougatataki mai vua e dua na matabete yalodina a gole vei nodratou bisopi ka kerea ke rawa me itokani dauveituberi kei koya na tama o ya. Na tama oqo a sega tu ni lotu ka sega ni taleitaka na laki veituberi ena vuvale. Ia ni sa veisau na lomai tama o ya, a gole yani kei itokani matabete oqo me rau tekivu sikova “nodrau” vuvale. Ni oti e dua na veisiko, o watina—ka se sega tale tu ga ni lotu—a tarogi watina tagane ena veika sa yaco. A vakadeitaka o tama, “E rairai au a vakila e dua na ka”—ka gole yani ki valenikuro me dua na mena bia.¹²

Ia ena veimuri ga mai na veika kece; veika vinaka e sotavi, na veiqaravi. veisau ni yalo, kalasi vakavakarau ki valetabu, gole ki lotu, ka vauci vakamatavuvale ena valetabu savasava. Vakasamataka na nodra vakavinavinaka na gone kei na makubudra vei tamadra kei tinadra vakakina vei itokani turaga dauveiqaravi sa itau nei tamana me loloma ka veiqaravi vei ira na tamata.

Na ikatolu ni bukawaqa ni keba ena vakabauta: o ya na reki ni kosipeli buli vou kei na kalougata ena yaco mai ni da vakasaqara meda lomana na Turaga kei ira na tamata ena taucoko ni yaloda kei na lomada.

Sa veisureti na ivolanikalou meda cabori keda vakataucoko nikua kei na mataka ena icabocabo ni loloma kei na veiqaravi. Ena Veiyalayalati Makawa, na iVakarua e vakasalataki keda meda “lomani Jiova na nomuni Kalou” ena lomamu, yalomu, kei na nomu kaukauwa taucoko.¹³ E veimasuti o Josua mo ni, “Lomani Jiova na nomuni Kalou, … muria na nona sala kecega, … vakabauta na nona ivakaro, … ka kabiti koya, ka … qaravi koya ena lomamuni taucoko.”¹⁴

Ena Veiyalayalati Vou, a cavuta kina na iVakabula na ivakaro cecere e rua: “Mo lomani Jiova na nomu Kalou e na lomamu taucoko, kei na yalomu taucoko, kei na nomu kaukauwa taucoko, kei na nomu nanuma kecega, … kei na kai nomu me vakataki iko.”¹⁵

Ena iVola i Momani: E Dua Tale na iVakadinadina kei Jisu Karisito, a cakacaka o Tui Penijamini “ena nona igu taucoko kei na yalona taucoko” ka tauyavutaka na tiko sautu ena vanua.¹⁶ Ena Vunau kei na Veiyalayalati, me vaka era sa kila tu na daukaulotu, sa kerea na Turaga meda qaravi Koya ena “yalomudou taucoko, igu, vakasama kei na kaukauwa.”¹⁷ Ni ra sa yaco na Yalododonu ki Jackson County, a vakarota na Turaga mera rokova na Siga ni Vakacecegu ena nodra lomana “na Turaga na nomu Kalou ena lomamu taucoko, nomu igu taucoko, vakasama, kei na kaukauwa; io mo qaravi koya ena yacai Jisu Karisito.”¹⁸

Eda rekitaka na veisureti meda solia na yaloda taucoko meda vakasaqara na sala e cecere ka savasava cake meda lomana na Kalou kei ira era tiko voliti keda ka qaqaco noda vakabauta na Tamada Vakalomalagi kei Jisu Karisito ena yaloda kei na itikotiko kei na lotu.

iKava, noda bukawaqa ni keba ena vakabauta e vakayaloqaqataka meda tauyavutaka na ivakarau tudei ni bula dodonu e vakatitobutaka na vakabauta kei na ka vakayalo.

Na itovo savasava, ivakarau dodonu, se sala masulaki e oka kina; na vuli ivolanikalou; lolo; nanuma na iVakabula kei na veiyalayalati ena cakacaka vakalotu ni sakaramede; wasei ni kosipeli maivei ira na daukaulotu, valetabu kei na tuva kawa, kei na veiqaravi; vola tiko vakavuku na nomu ivolaniveisiga; kei na veika vakaoqori.

Ni sema na ivakarau dodonu kei na gagadre vakayalo, rau sa yaco vata mai na gauna kei na kena tawamudu. Na rarama kei na bula vakayalo ena yaco mai ni vakamuri na veiitovo vakalotu e vakavolekati keda vei Tamada Vakalomalagi kei noda iVakabula, o Jisu Karisito. Ni da lomana na yalo kei na ivola ni ivakaro, na veika tawamudu ena curuma mai na lomada me vaka na tegu mai lomalagi.¹⁹ Ena talairawarawa e veisiga kei na savai ena wai bula, eda na kune vinaka, vakabauta, kei na qaqaco meda sotava na ibolebole ni veisiga ena kosipeli ni vosota, raimatua, kei na reki.

iKalima, ni da sa ivakarau tudei uasivi ni da vakasaqara na sala vou ka savasava cake meda lomana na Kalou ka veivukei vakai keda meda sotavi Koya, noda bukawaqa ni keba ena vakabauta e vakauqeti keda meda nanuma tiko ni bula uasivi sa tu vei Karisito, sega oi keda se bula uasivi ni vuravura.

Na veisureti ni Kalou sa sinai ena loloma kei na veimadigi vinaka baleta ni sai Jisu Karisito “na sala, kei na vu-ni-dina, kei na vu-ni-bula.”²⁰ Vei kemuni sa vakaicolacola bibi, e sureti kemuni, “Dou lako mai vei au,” kei kemuni sa lako yani Vua, sa yalataka, “Kau na vakacegui kemudou.”²¹ “Dou lako mai vei Karisito, ka mo dou vakataucokotaki vua, … ka lomana na Kalou ena nomudou igu, vakasama kei na nomudou kaukauwa kecega, sa na qai rauti kemudou na nona loloma soliwale, ia na nona loloma soliwale dou sa vakataucokotaki ena vuku i Karisito.”²²

Ena ivakadei oqo “ena nona loloma soliwale dou sa vakataucokotaki ena vuku i Karisito” ni oqo talega na vakacegu, sautu, kei na yalayala meda gu ki liu ena vakabauta ka nuidei vua na Turaga ni sega ni yaco na veika eda a nuitaka tu, namaka, se sa dodonu me noda, ka sega kina noda cala, ena gauna mada ga eda sa vakayacora noda itavi uasivi.

Ena vuqa na gauna kei na ituvaki, eda na vakila na vakaloloma, veilecayaki, se takiveiyaga. Ni da sasaga ena yalodina meda lomana na Kalou ka veiqaravi vei ira na wekada, eda na vakila na loloma ni Kalou ka gadreva meda uqeti vata kei wekada ena noda bula ena sala vou ka savasava cake.

Ena yalololoma, a vakauqeti keda na iVakabula ka yalataka meda: “toso ki liu ka tudei vei Karisito, ena taucoko ni nomudou vakanuinui, ka mo dou lomana na Kalou kei ira na tamata kecega.”²³ Na vunau i Karisito, na Veisorovaki ni iVakabula, kei na taucoko ni lomada meda muria na Nona sala ni veiyalayalati ena vukei keda meda kila na Nona dina ka sereki keda.²⁴

Au vakadinadinataka na taucoko ni Nona kosipeli kei na Nona yavu ni bula marau sa vakalesui mai ka vakavulici tiko ena Lotu i Jisu Karisito ni Yalododonu Edaidai, ena ivolanikalou tabu, vakakina vei ira na parofita maivei Parofita Josefa Simici kivei Peresitedi Russell M. Nelson nikua. Au vakadinadinataka ni Nona sala ni veiyalayalati e veimuataki ki na isolisoli cecere e yalataka na Tamada Vakalomalagi: “Dou na rawata kina na bula tawamudu.”²⁵

Me sa noda na Nona veivakalougatataki kei na reki gugumatua ni da lomavinaka ka nuitaka ka solibula ena noda bukawaqa ni keba ena vakabauta, sa noqu masu ena yaca tabu savasava i Jisu Karisito, emeni.