Saumaki e Titobu ka Tudei vua na Tamada Vakalomalagi kei na Turaga o Jisu Karisito

Na soqoni ni Lotu ena Sigatabu ena okati kina e dua na soqoni 60 na miniti ni sakaramede, ka vakanamata vua na iVakabula, cakacaka vakalotu ni sakaramede, kei na itukutuku vakayalo. Ni oti na gauna ni veisau kalasi, era na lakova na lewe ni Lotu e dua na kalasi 50 na miniti ka na veisau e vei-Sigatabu:

• Ena vakayacori na wilivola ni Sigatabu ena imatai kei na ikatolu ni Sigatabu ni vula.

• Na soqoni ni veikuoramu ni Matabete, iSoqosoqo ni Veivukei, kei na Goneyalewa ena vakayacori ena ikarua kei na ikava ni Sigatabu.

• Ena vakatau vei bisopi na soqoni ena ikalima ni Sigatabu.

Ena vakayacori e veimacawa na soqoni ni Lalai ena 50 na miniti vata oqo ka na vakayacori kina na lagasere kei na kalasi.

iVakatakilakila

Yakavi ni Sigatabu

Me baleta na ituvatuva ni soqoni ena Sigatabu, era sa dau raica tiko na iliuliu e cake ni Lotu ena veiyabaki ni dau dredre sara vei ira eso na lewenilotu vakamareqeti, na ituvatuva tolu na auwa ni lotu ena Sigatabu. E dau vakakina oqo vei ira na itubutubu era se ka lalai na gone, gone ena Lalai, lewenilotu qase, lewenilotu vou, kei na so tale.²

Ia e vuqa tale na ka me baleta na veisau oqo mai na kena vakalekalekataki walega na ituvatuva ni soqoni ni Sigatabu. Sa vakadinadinataka ena vakavinavinaka o Peresitedi Nelson na levu ni ka sa rawati ena nomuni yalodinataka na ituvatuva eso sa oti. Sa nodra gagadre o koya, kei ira kece na veiliutaki ena Lotu, me ra kauta mai na reki cecere vakosipeli vei ira na itubutubu, gonelalai, itabagone, sega ni vakawati, itabaqase, lewenilotu vou, kei ira era vakavulica tiko na daukaulotu ena dua na sasaga vakatauvatataki—yavutaki ena matavuvale, ka tokona na Lotu. Na inaki kei na veivakalougatataki e veiwekani kei na veisau oqo kei na veisau eso sa yaco oti e oka kina na veika oqo:

• Vakatitobutaki na saumaki vei Tamada Vakalomalagi kei na Turaga o Jisu Karisito ka vaqaqacotaki na vakabauti Rau.

• Vaqaqacotaki na tamata yadua kei na matavuvale ena lewenivuli yavutaki ena matavuvale, tokona na Lotu ka cau ena bulataki kosipeli ena mamarau.

• Rokova na siga ni Vakacecegu, ena vakanamata ki na cakacaka vakalotu ni sakaramede.

• Vukei ira na luvena taucoko na Tamada Vakalomalagi ena yasa ruarua ni ilati ena cakacaka ni kaulotu ka ciqoma na cakacaka vakalotu vakakina na veiyalayalati kei na veivakalougatataki ni valetabu.

Na ituvatuva ni Sigatabu oqo ena rawa kina eso na gauna ni lotu vakamatavuvale kei na vuli kosipeli mai vale ena Sigatabu, se ena so tale na gauna vakatau ki na tamata yadua kei na matavuvale. E rawa ni vakayacori e dua na bogi ni itaviqaravi ena Moniti se dua tale na gauna. O koya qo, me ra na dau vagalalataka tikoga kina na iliuliu na bogi ni Moniti mai na veisoqoni kei na itaviqaravi ni Lotu. Ia na gauna e vakayagataki ena lotu vakamatavuvale, vuli kosipeli kei na itaviqaravi baleta na tamata yadua kei na matavuvale sa dodonu me tuvai me vaka na nodra dui gagadre.

iVakatakilakila

Lako Mai, Mo Muri Au—Baleta na Tamata Yadua kei na Matavuvale

Ena vakavinakataki cake sara vakalevu na vuli kosipeli vakamatavuvale kei na tamata yadua mai vale ena lewenivuli veisemati ka ivurevure vou ni Lako Mai Mo Muri Au baleta na tamata yadua kei na matavuvaleka semati vata kei na veika e vakavulici ena Wilivola ni Sigatabu kei na Lalai.³ Ena Janueri, era sa na vulica na kalasi ni Wilivola ni Sigatabu ni itabagone kei na itabaqase kei ira na Lalai na Veiyalayalati Vou. Na ivurevure vou ni vuli e vale Lako Mai, Mo Muri Au baleta na tamata yadua kei na matavuvale—e kovuta talega na Veiyalayalati Vou—e caka me vukei ira na lewenilotu me ra vulica mai vale na kosipeli. E vakamacalataka: “Na ivurevure oqo e baleta na tamata yadua kei na matavuvale ena Lotu. E sa caka mai me vukei iko nomu vulica na kosipeli—ke o vulica duadua se kei na nomu matavuvale. … Na idusidusi ena ivurevure [vou] oqo e tuvai ena ituvatuva ena … ni veimacawa.”⁴

Ena muria na ituvatuva vakamacawa vata oqo na lesoni vou ni Lalai ena Lako Mai, Mo Muri Au. Ena laurai na kalasi ni itabaqase kei na itabagone ena imatai kei na ikatolu ni Sigatabu me ra tokona na ivurevure vou e vale ni Lako Mai, Mo Muri Au. Ena ikarua kei na ikava ni Sigatabu, era na tomana na itabaqase ena Matabete kei na iSoqosoqo ni Veivuke na vulici ni nodra ivakavuvuli na iliuliu ni Lotu, ka vakabibitaki nodra itukutuku walega oqo na parofita.⁵ Era na vulica na goneyalewa kei na cauravou Matabete i Eroni na ulutaga vakosipeli ena Sigatabu oqori.

E vakarautaki ena ivurevure vou ni vuli e vale na “Vakasama eso ni Vuli iVolanikalou kei na Lotu Vakamatavuvale.”⁶ Na ituvatuva ni veimacawa e koto kina na vakasama ni vuli kei na taviqaravi ena vukea na tamata yadua kei na matavuvale. Na Lako Mai, Mo Muri Au baleta na tamata yadua kei na matavuvale e koto talega kina e vuqa na ivakaraitaki ka na vukea me vakavinakataki na vuli vakatamata yadua kei na matavuvale, vakauasivi vei ira na gonelalai.⁷ Sa na veisoliyaki yani na ivurevure vou oqo ki na matavuvale yadua ena Tiseba ni yabaki oqo.

Sa vakauqeti keda o Peresitedi Nelson, mai na imatai ni nona vosa vei keda na lewe ni Lotu ena Janueri, me da vakarau ki na iKarua ni Lako Mai nei Jisu Karisito ena noda lakova na salatu ni veiyalayalati.⁸

Na ituvaki ni vuravura sa gadrevi vakalevu cake tikoga kina me vakatitobutaki na saumaki ka vaqaqacotaki na vakabauti Tamada Vakalomalagi kei Jisu Karisito kei na Nona Veisorovaki. Sa vakarautaki keda na Turaga, mai na tuva kei na tuvatuva, baleta na veigauna dredre eda sa donumaka tu oqo. Ena veiyabaki eda sivita, sa tuberi keda na Turaga me da sotava na kauwai eso me vaka na:

• Sa mai vakabibitaki tale ena tolu na yabaki sa oti na rokovi ni Siga ni Vakacecegu kei na cakacaka vakalotu tabu ni sakaramede.

• Ena veidusimaki ni bisopi, era sa vakanamata na kuoramu ni italatala qase kei na iSoqosoqo ni Veivukei vaqaqacotaki ena inaki ni Lotu⁹ ka ra vukei na lewenilotu me ra cakava ka maroroya na veiyalayalati tabu.

• Sa taurivaki na ivakarau cecere ka savasava ni veiqaravi.

• Ni da tekivu ena noda nanuma tiko na ivakataotioti, sa yaco me tiki yaga sara ni salatu ni veiyalayalati na veiyalayalati ni valetabu kei na veiqaravi ni tuvakawa.

Na veisau sa kacivaki ena mataka nikua sa ivakaraitaki ni veituberi ena bolebole ni noda gauna.

Na lewenivuli sa matau tu vei keda sa dau vakabibitaki kina na Lotu ena Sigatabu. Eda kila ni vinaka noda veivakavulici ka levu na lewenikalasi vakarau tu vakayalo, ena vinaka noda Lotu ena Sigatabu. Eda kalougata ni vakavuqa ni dau vakalevutaka ka vaqaqacotaka na saumaki na Yalo ena veigauna ena Lotu.

E gadrevi me vakauqeta vakaukauwa sara na rokovi kei na itovo Vakalotu ni matavuvale vakakina ni tamata yadua na lewenivuli tokoni vaka-Lotu. Eda kila na igu vakayalo kei na saumaki titobu tudei ena rawa mai vale. Ena vica na yabaki sa oti, a vakadeitaki kina me baleti ira na cauravou kei na goneyalewa ni veivakauqeti ni Yalo Tabu e vakavuqa ni dau salamuria na vuli ivolanikalou kei na masumasu e vale. Noda inaki me da vakatauvatana na veika e sotavi ena Lotu kei na vuvale me vakalevutaki cake kina na vakabauta kei na bula vakayalo ka vakatitobutaka na saumaki vei Tamada Vakalomalagi kei na Turaga o Jisu Karisito.

Ena iwase tokoni vaka-Lotu, yavutaki ena vuvale ni veisau oqo, e dolavi tu vei ira na tamata yadua kei na matavuvale me ra vakatulewataka ena masumasu na ivakarau kei na gauna me na qai vakayagataki kina. Me vaka, ni na vakalougatataki kina vakalevu na matavuvale taucoko, vakatau ena noda dui gagadre ena ganita beka vakavinaka sara me ra soqoni vakailawalawa na uabula sega ni vakawati, cauravou goneyalewa itabaqase, itubutubu sega ni vakawati, vuvale dua ga kena lewenilotu, lewenilotu vou,⁹ ni sa oti na sokalou ena Sigatabu ena veimaliwai vakosipeli ka vaqaqacotaki ena nodra vulica vata na ivurevure yavutaki ena vuvale, ka tokoni vaka-Lotu. Oqo me na vakayacori ga ena kena iwalewale era gadreva.

Ena vuqa na veiyasai vuravura, era dau digitaka eso me ra tiko ga e valenilotu ni oti na soqoni ni Sigatabu me ra veimaliwai ka veimarautaki. E sega ni dua na ka ena veisau e kacivaki oqo me na vakacacana na iwalewale vakasakiti ka veivakayautaki oqo.

Me vukea nodra vakavakarau ki na Siga ni Vakacecegu, eso na tabanalevu era sa vakau itukutuku ena loma ni macawa ena imeli, tukutuku vakau ena talevoni (teks), se midia ena initaneti. Ena vuku ni veisau oqo, keitou sa vakatura kina vakabibi na mataqali veitaratara vakaoqo. Na veisureti oqo ena vakananuma vei ira na lewenilotu na ituvatuva ni soqoni ena Sigatabu ni macawa oya, oka kina na ulutaga ni lesoni vakalasi sa roro mai, kei na veivosaki vakosipeli tomani mai vale. Kena ikuri, ena vakarautaki talega ena soqoni ni itabaqase ena Sigatabu na itukutuku me semati rau vata na vuli ena Lotu kei na vuvale e veimacawa yadua.

Ena gadrevi me vakasamataki ena masumasu na lotu ni sakaramede gauna ni kalasi me vakabibitaki kina na veika vakayalo mai na veika tale eso ni vakaveiliutaki. Me vaka, na veika me kacivaki e rawa ni qai vakayacori ena veisureti e loma ni macawa se ena dua na parokaramu tabaki. Me dau cabori na idolamasu kei na isogomasu ni soqoni ni sakaramede, na ikarua ni soqoni me qai cabori ga na isogomasu.¹⁰

Me vaka sa kacivaki taumada, na ituvatuva vou ni Sigatabu ena qai tekivu sara ena Janueri 2019. E vica na vuna. E rua na ka bibi duadua, taumada, me soli na gauna me veisoliyaki kina na [ivurevure] Lako Mai, Mo Muri Au baleta na tamata yadua kei na matavuvale ka, ikarua, me solia na gauna vei ira na peresitedi ni iteki kei na bisopi me ra vakarautaka na ituvatuva ni soqoni, na gagadre me levu cake na tabanalevu era soqoni ena mataka.

Ni ra vaqara na ivakatakila o ira na iliuliu, na idusidusi sa ciqomi ena vica na yabaki sa oti sai koya me vaqaqacotaki na soqoni ni sakaramede, rokovi na Siga ni Vakacecegu, ka ra vakayaloqaqataki ka vukei na itubutubu kei na tamata yadua me ra kitaka me ivurevure ni kaukauwa vakayalo ka vakalevutaki na vakabauta ena nodra vuvale—me vanua ni reki kei na mamarau.

Na cava na ibalebale ni veisau oqo vei keda na lewe ni Lotu i Jisu Karisito ni Yalododonu Edaidai? Eda sa yalodei ni ra na vakalougatataki na lewenilotu ena veisala matalia eso. E rawa ni siga ni vuli kei na vakavulici ni kosipeli na Sigatabu ena lotu vakakina e vale. Ni ra vakaitavi na tamata yadua kei na matavuvale ena veivosaki vakamatavuvale, tuvakawa, veiqaravi, sokalou yadua, kei na gauna marautaki vakamatavuvale, ena yaco na Siga ni Vakacecegu me ka taleitaki.

iVakatakilakila

Matavuvale na Carvalho

E dua na matavuvale mai Brazil eratou lewena e dua na iteki a vakatovolei kina na ivurevure vou ni Lako Mai, Mo Muri Au baleta na vuvale. E tukuna kina o Fernando, e dua a lesu mai na kaulotu, ka rau nodratou itubutubu e lewe va na gone kei na watina o Nancy: “Ena gauna e tavoci kina ena neitou iteki na parokaramu ni Lako Mai, Mo Muri Au, sa dua na ka noqu taleitaka, kau nanuma sa vakarau veisau na ivakarau ni neitou vulica na ivolanikalou e vale. A yaco dina ena noqu vuvale, ia me vaka niu iliuliu ni Lotu au raica na kena yaco talega ena veivuvale tale eso. … E vukei keitou me keitou veivosakitaka vakavinaka sara na ivolanikalou ena neitou vuvale. A titobu cake na neirau kila kei na watiqu na ulutaga a vulici. … A vukei keitou … me keitou vakalevutaka neitou kila na kosipeli, ka vukea neitou vakabauta kei na neitou ivakadinadina. … Au wasea kina noqu ivakadinadina … niu kila ni a vakauqeti mai vua na Turaga me rawa ni kauta mai vakalevu na vakabauta, ivakadinadina, kei na rarama ki na matavuvale na kena vulici vinaka na ivakavuvuli kei na ivunau era tu ena ivolanikalou … ena dua na vuravura sa lutu sobu tikoga.”¹²

Ena veiiteki ka a vakatovolei kina e vuravura raraba, e cecere na veika e tukuni me baleta na ivurevure vou ni vuvale ni Lako Mai, Mo Muri Au E vuqa era wasea ni ra toso sara mai na wili ivolanikalou ki na vulici sara ni ivolanikalou. E vakilai raraba talega ni laveta na vakabauta na veika a sotavi ka totoka na votukana ena tabanalevu.¹²

Na inaki ni veisau eso oqo me titobu ka tudei nodra saumaki na uabula kei na itabatamata e tubucake tiko oqo. Na imatai ni tabana ena ivurevure ni tamata yadua kei na matavuvale e dusia: Na inaki ni vuli kei na vakatavulici ni kosipeli sai koya me vakatitobutaka na noda saumaki ka vukei keda meda vakataki Jisu Karisito vakalevu cake. … Kena ibalebale oqo noda vakararavi vei Karisito me veisautaka na yaloda.”¹⁴ E vukea na kena “tete yani kina rumu ni vuli ki na lomana kei na itikotiko ni tamata yadua. E gadrevi me vakayacori tikoga, na sasaga ena siga yadua me kilai vakatitobu ka bulataki na kosipeli. Na saumaki dina e gadrevi kina na veivakayarayarataki ni Yalo Tabu.”¹⁵

Na takete bibi duadua ka ulumatua ni veivakalougatataki ni saumaki titobu ka tudei sai koya na ciqomi ena kilikili ni veiyalayalati kei na cakacaka vakalotu ena salatu ni veiyalayalati.¹⁶

Keimami nuitaka mo ni dau veivosaki ka vakasaqara na ivakatakila ena vakayagataki ni veisau oqo—ena noda sega ni raibaleta na maka se tovolea me da vauca na tamata yadua se matavuvale. Ena qai soli yani na ikuri ni itukutuku ena veitaratara tale eso e muri, oka kina e dua na ivola ni Mataveiliutaki Taumada kei na veika e salavata kaya yani.

Au vakadinadinataka ena nodra veisoli vakasama na Matabose ni Mataveiliutaki Taumada kei na Kuoramu ni iApositolo Le Tinikarua ena Valetabu, ka ni oti nona vakatakekere vua na Turaga na noda parofita lomani me baleta na ivakatakila me tosoi na veisau oqo, a ciqomi e dua na veivakadeitaki kaukauwa vei keimami kece. O Russell M. Nelson na noda Peresitedi ka parofita bula. Na veika sa mai kacivaki nikua ena basika kina na veivakalougatataki cecere vei ira era ciqoma na veisau ka segata na veituberi ni Yalo Tabu. Eda na voleka cake vei Tamada Vakalomalagi kei na noda Turaga ka iVakabula, o Jisu Karisito, o koya au kena ivakadinadina tudei. Ena yaca i Jisu Karisito, emeni.