Mo Ni Digitaki Koya Edaidai

Na italanoa buli kei Mary Poppins ni o koya e dua na daumeimei ni Igiladi—e cakava na veika mana.¹ E uvuca yani na cagi tokalau me vukea na matavuvale sa tiko leqa nei Banks ena Naba 17, Cherry tree Lane, e Edwardian Lodoni. Sa soli vua na ilesilesi me qaravi rau na gone, o Jane kei Michael. Ena yalo dei kei na yalovinaka, sa tekivu me vakavulici rau ena lesoni yaga ena delani veivakauqeti.

Rau sa yalomatua cake sara kina o Jane kei Michael, ka sa nanuma o Mary ni sa gauna me sa na biubiu. Ena kena vakatasuasua, a saga o Bert na itokani nei Mary dausamaka na ikuvukuvu, me kakua ni lako. A tokaruataka o Koya, “Isa Mary, e rau gone vinaka.”

A sauma o Mary, “Au na kauwai tiko beka ke rau a sega ni gone vinaka? Ia au na sega ni vukei rau rawa ke rau sega ni tokoni au, ka sega e dua ena dredre me vakavulici me vaka e dua na gone sa kila tu na veika kece.”

A taroga sara o Bert, “Sa qai vavei?”

A sauma o Mary, “Ia me rau sa na tomana sara yani vakai rau ga.”²

Kemuni na taciqu kei na ganequ, me vakataki Jane kei Michael Banks, eda sa “gone vinaka” ka sa kilikili meda kauwaitaki. Sa gadreva na Tamada Vakalomalagi me vukea ka vakalougatataki keda, ia eda sega tiko ni vakadonui Koya. Eso na gauna, na noda ivalavala sa vaka meda sa kila tu na veika kecega. Sa gadrevi talega meda “sa tomana sara yani” vakai keda. Oqo na vuna eda gole mai ki vuravura mai na itikotiko taumada vakalomalagi. Na noda “tomana sara” sa oka ki na noda digidigi.

Na lalawa vakaitubutubu nei Tamada Vakalomalagi e sega ni nodra cakava na Luvena na ka e dodonu; ia mera digitaka na ka dodonu mera cakava ka yaco mera vakataki Koya. Ke gadreva o Koya meda talairawarawa, ena saumi keda sara vakatotolo ka veitotogitaki me vakauqeta na noda itovo.

E sega ni taleitaka na Kalou mera vuli walega na Luvena ka “dauvakasamei” talairawarawa era na sega ni katia na Nona ivava ena loqi ni gade vakasilesitieli.³ Sega, e gadreva na Kalou mera tubu cake vakayalo na Luvena ka tomani Koya ena Nona cakacaka.

Sa tauyavutaka na Kalou na ituvatuva meda na taukei ena Nona matanitu, na sala veiyalayalati e muataki keda meda vakataki Koya, me noda na bula sa tu Vua, ka bula tawamudu vakavuvale ena Nona iserau.⁴ Noda digidigi taumada—vakakina nikua—sa ka bibi ki na ituvatuva oqo, eda a vulica mai na bula taumada. Eda a ciqoma na ituvatuva ka digitaka meda gole mai ki vuravura.

Me ivakadei ni da na bula ena vakabauta ka vulica meda digidigi vakadodonu, a lati kina na noda vakasama meda guilecava kina na ituvatuva ni Kalou. Ni sega na ilati oqo, ena sega ni yaco na inaki ni Kalou ni da na sega ni tubu ka sega ni itaukei nuitaki e gadreva o Koya meda na vakataka.

E kaya o parofita Liai: “O koya, sa solia kina na Turaga na Kalou vua na tamata me lewa na ka e kitaka. Ia, sa sega ni rawa ni lewa na ka me kitaka na tamata ka vakavo kevaka me na bacani mai vua e dua se mai vei koya ka dua.”⁵ Ena itagede bibi, sa dua na digidigi sa matataka o Jisu Karisito, na Ulumatua nei Tamada. E dua tale na digidigi sa matataka o Setani, o Lusefa, e gadreva me vakarusa na bula galala ka vuaviritaka na lewa.⁶

O Jisu Karisito, sa mai “noda Dautataro vei Tamada.”⁷ Ni sa oti na Nona solibula veisorovaki, o Jisu “sa lako cake ki lomalagi … me taroga vei Tamana na nona dodonu me tu kina vua na loloma cecere vei ira na luve ni tamata.” Ni sa taura na dodonu ni loloma cecere, “sa dau valataka kina ko koya na veika me baleti ira na luve ni tamata.”⁸

Na nona dautataro na Karisito vei Tamada ena vukuda e sega ni ka vakatani. Na nona vakatara o Jisu Karisito na Nona lewa me kovuti ena lewa nei Tamana,⁹ sa na vakaliuca duadua ga na veika sa vinakata tu mai na Tamana. Sa dau kailavaki keda na Tamada Vakalomalagi ka vakasausau ni da rawa-ka.

Na dautataro i Karisito, sa tiki tiko, ni veivakananumi ni sa sauma na noda ivalavala ca ka sega ni dua e vakuwai mai na loloma veivueti ni Kalou.¹⁰ Kivei ira era vakadinati Jisu Karisito, era veivutuni, ka papitaiso, ka vosota ki na ivakataotioti—sa cakacaka e mua ki na duavata¹¹—sa veivosoti na iVakabula, veivakabulai, ka dautataro. E vukei keda, veivakacegui, ka veivakameautaki—ivakadinadina ka tokona meda duavata kei na Kalou.¹²

E veibasai sara vakalevu kei Lusefa ni sa veibeitaki se veivakacacani. E kaya o Joni na Dauvakatakila na vakadrukai nei Lusefa: “Au sa rogoca e dua na domo levu mai lomalagi, sa kaya, Sa qai yaco na bula, kei na kaukauwa, kei na matanitu ni noda Kalou, kei na kaukauwa ni nona Karisito.” Cava na vuna? Baleta “ni sa biu sobu ko koya sa dauveibeitaki ira na wekada, sa beitaki ira tikoga e na mata ni Kalou ena siga kei na bogi. Era sa rawai koya ena vuku ni dra ni Lami, kei na vuku ni vosa era sa tusanaka.”¹³

O Lusefa na dauveibeitaki oqo. A vosa saqati keda ena bula taumada, ka se tomana tikoga nona vakacacani keda ena bula oqo. E saga me dreti keda sobu. E gadreva meda sotava na rarawa tawamudu. O koya e tukuna tiko vei keda nida sa guce, e tukuna tiko vei keda ni da takiveiyaga, e tukuna tiko vei keda ni sega na veivakabulai ni da cala. O koya na dauveivakasaurarataki, e dau caqeti keda ni da sa davo tu.

Kevaka vakavulica tiko o Lusefa e dua na gone me kalawa ka qai lutu o gone, ena karaca na gone, totogitaki koya, ka kaya vua me kua tale ni saga. Na sala nei Lusefa e kauta mai na yalolailai kei na veilecayaki—ena yaco mai ka vakavuqa. O tama ni lasu oqo sa ivurevure ni veika lasu¹⁴ ka cakacaka vaqaseqasea me lawaki ka vagolei keda tani, ni “sa segata ko koya me ra rarawa sara na tamata kecega me vakataki koya.”¹⁵

Kevaka vakavulica tiko na Karisito e dua na gone me kalawa ka qai lutu o gone, ena vukea na gone me tucake ka vakayaloqaqataka me kalawa yani.¹⁶ Na Karisito sa dauveivukei ka veivakacegui. Na Nona sala e kauta mai na reki kei na inuinui—ena yaco mai ka vakavuqa.

Na ituvatuva ni Kalou e dusimaki keda talega, e vakatokai ena ivolanikalou na ivakaro. Na ivakaro oqo era sega ni ituvatuva veivakamarautaki se lewa veilecayaki ni lawa taurivaki mena tuberi keda walega meda talairawarawa. Era sa sema ki na noda tauyavutaka na itovo sa vakalou, lesu vei Tamada Vakalomalagi, ka ciqoma na reki sa gugumatua. Na talairawarawa ki na Nona ivakaro sa sega ni mataboko; eda sa kila ka digitaka na Kalou kei na Nona sala ki vale. Eda sa tuvanaki me vaka a yaco vei Atama kei Ivi, ni “sa solia kina vei rau na ivakaro na Kalou, ni sa vakatakila oti vei rau na ituvatuva ni veisereki.”¹⁷ E dina ni gadreva na Kalou meda muria na salatu ni veiyalayalati, ia sa solia na dodonu meda digidigi.

Sa dina sara, na Kalou sa gadreva, namaka, ka dusimaka na Luvena yadua mera digidigi ga vakai ira. E sega ni vakasaurarataki keda. Ena isolisoli ni digidigi, sa vakatara na Kalou vei ira na Luvena “me ra lewa vakai ira na ka mera kitaka ka sega na ka me lewai ira.”¹⁸ Na galala ni digidigi eda na digitaka kina na salatu, se sega. Ena vakatara meda muria, se sega. Me vaka ni da sega ni vakasaurarataki meda talairawarawa, eda na sega ni vakasaurarataki meda talaidredre. E sega ni rawa me dua, ke sega noda veitokoni, me kauti keda tani mai na salatu. (Me kakua ni da veilecayaki ena vukudra sa vakacacani nodra galala. Era sega ni muri tani tiko; era sa vakacacani. Era sa ciqoma na kila ni Kalou, nona loloma, kei na yalololoma.)

Ni da gole tani mai na salatu, e rarawa na Kalou baleta ni kila ni na yaco oqo, ia ena veigauna, ena mua oqo me takali na marau ka sega na kalougata. Ena ivolanikalou, na gole tani mai na salatu e vakatokai me ivalavala ca, ka yaco me lailai na marau ka sega na kalougata ka vakatokai oqo me totogi. Ena vakasama oqo, na Kalou e sega ni totogitaki keda; na totogi sa isau ni noda digidigi, sega ni Nona.

Ni da raica ni da sa gole tiko ena salatu cala, meda lako tani mai kina, se ena vuku ni Veisorovaki i Jisu Karisito, sa rawa meda digitaka meda kalawa lesu ka butu donu tale. Ena ivolanikalou, na cakacakataki ni noda lewa meda veisau ka lesu ki na salatu sa vakatokai me veivutuni. Ni da sega ni veivutuni eda sa digitaka meda vakuwai mai na kalougata sa gadreva na Kalou me solia mai. Kevaka eda “sega ni vinakata [meda] marautaka na kena a dodonu [meda] rawata,” eda “na [qai] dui lesu tale … ki na [noda] tikina, [meda] marautaka na veika [eda] vinakata [meda] rawata”¹⁹—eda digidigi, sega ni Kalou.

Se cava sara na dede ni noda lako cala tiko kina se yawa sara noda lako, ni sa lomada ga meda veisau, na Kalou ena vukea noda lesu mai.²⁰ Ena rai ni Kalou, ni da sa veivutuni dina ka gu ki liu ena tudei vata kei Karisito, ka lesu ki na salatu, sa na vaka ga eda a sega ni lako sese tu e liu.²¹ Sa mai sauma na iVakabula na noda ivalavala ca ka sereki keda mai na kena yali vakalevu na marau kei na kalougata. Oqo e vakatokai tiko ena ivolanikalou me veivosoti. Ni oti na papitaiso, na lewenilotu kece era lutu mai na sala—eso era kau tani mai kina. Koya gona, ni da vakabauti Jisu Karisito, veivutuni, ciqoma na Nona veivuke, ka da sa vosoti, sa sega kina ni ka ni dua na siga ia sa ka ni bula taucoko, na cakacaka ena tokaruataki ka vakawasoma. Oqo na sala ni noda “vosota me yacova na ivakataotioti.”²²

E gadrevi meda digitaka o cei meda qarava.²³ Na cecere ni noda marau tawamudu ena vakatau ki na noda digitaka na Kalou sa bula ka to vata kei Koya ena Nona cakacaka. Ni da saga meda “tomana sara yani” vakai keda ga, eda na galala meda digidigi vakadodonu. E kaya e rua na Peresitedi Raraba vakacegu ni iSoqosoqo ni Veivukei, meda kakua ni “gonelailai tiko ka vakamenemenei ka vakadodonutaki tiko e veigauna.”²⁴ E sega, e vinakata na Kalou meda yaco me tamata yalomatua qase cake ka rawa ni da vakatulewa ga vakataki keda.

Ni da digitaka meda muria na ituvatuva nei Tamada sa sala duadua ga eda na itaukei kina ena Nona matanitu; sa qai rawa Vua me nuitaki keda ka da sega ni taroga tiko na veika e saqata na Nona lewa.²⁵ Ia meda nanuma tiko ni “sega e dua ena dredre me vakavulici me vaka e dua na gone sa kila tu na veika kece.” Meda sa qai gadreva meda vakavulici ena ivakarau ni Turaga maivei Koya kei ira na Nona italai. Meda nuitaka ni da sa luvedrau lomani na noda iTubutubu Vakalomalagi²⁶ ka kilikili meda “kauwaitaki tiko” ka vakadeitaka “vakai keda ga” ni sega ni kena ibalebale na “tiko duadua.”

Ni a kaya o Jekope na parofita ni iVola i Momani, kau kaya vata kei koya:

“O koya me reki kina na lomamudou, ka mo dou nanuma ni dou sa galala mo dou lewa ga vakai kemudou na ka mo dou cakava—mo dou digitaka na sala ni mate tawavakaiyalayala se na sala ni bula tawamudu.

“O koya gona, oi kemudou na wekaqu lomani, mo dou vakaduavatataki kemudou ki na lewa ni Kalou, ka kakua ki na lewa ni tevoro … ka mo dou nanuma, ni dou sa vakaduavatataki oti vua na Kalou, ni sa loloma soli wale duadua ga ni Kalou dou sa vakabulai kina.”²⁷

Digitaka mo vakabauta na Karisito; digitaka na veivutuni; digitaka mo papitaiso ka ciqoma na isolisoli ni Yalo Tabu; digitaka mo vakavakarau vakavuku ka kilikili mo kania na sakaramede; digitaka mo veiyalayalati e valetabu; ka digitaka mo qarava na Kalou bula kei ira na Luvena. Na noda digidigi ena vakadeitaka o cei oi keda nikua kei na siga ni mataka.

Au tinia ena veivakalougatataki nei Jekope: “O koya me vakaturi kemudou cake mada kina na Kalou mai na … mate tawavakaiyalayala ena kaukauwa ni nona veisorovaki, mo dou curu rawa kina ki na matanitu tawamudu ni Kalou.”²⁸ Ena yaca i Jisu Karisito, emeni.