Mera Taura na Tamata Kecega na Yaca sa Solia na Tamana

Ena vica na macawa sa oti, au a vakaitavi ena nodra papitaiso e vica na gone yabaki walu. Era a tekivu vulica na kosipeli i Jisu Karisito maivei ira na nodra itubutubu kei na qasenivuli. Na sorenikau ni nodra vakabauti Koya a tekivu me buroro. Ia oqo era sa gadreva mera muri Koya ki na wai ni papitaiso mera sa lewe ni Nona Lotu vakalesuimai. Niu sarava nodra marautaka, au vakasamataka e vakacava beka na levu ni nodra kila e dua na inaki bibi ni nodra veiyalayalati ni papitaiso: nodra dina mera taura kivei ira na yaca i Jisu Karisito.

Mai na ivakatekivu, na Kalou sa dau tukuna tikoga na kena vakaliuci na yaca i Jisu Karisito ena Nona ituvatuva baleti keda. Na agilosi a vakavulica na isevu ni tamada, o Atama, “O koya, mo dau kitaka kina na veika kecega ko vakayacora ena yaca ni Luvena, ia mo veivutuni ka masuta tikoga na Kalou ena yaca ni Luvena me tawamudu.”¹

Na parofita ni iVola i Momani o Tui Penijamini a vakavulici ira nona tamata, “Ni na sega ni soli e dua tale na yaca se na sala se ivakarau mera na vakabulai rawa kina na luve ni tamata.”²

A kaya tale na Turaga na dina oqo vei Parofita Josefa Simici: “Raica, sai Jisu Karisito duadua ga na yaca sa solia ko Tamada, ka ni sa sega sara tale e dua na yaca e soli me ra bula kina na tamata.”³

E nikua, e vakavulica o Peresitedi Dallin H. Oaks ni “o ira sa vakabauta na yaca i Jisu Karisito …ka cakava na nona veiyalayalati … sa rawa me nodra na solibula veisorovaki i Jisu Karisito.”⁴

Na Tamada Vakalomalagi e gadreva me vakamatatataka ni yaca i Luvena, o Jisu Karisito, e sega ni dua ga na yaca ena maliwa ni lewevuqa. Na yaca ni iVakabula sa dua ga na kaukauwa ka bibi. Sa yaca duadua ga sa rawa kina na veivakabulai. Ni vakamatatataki na dina ena veitabagauna, sa vakadeitaka na Tamada Vakalomalagi vei ira kece na Luvena ni sa tiko na sala lesu Vua. Ia ni sa vakadeitaki na sala e sega ni kena ibalebale ni noda lesu e yaco ga vakai koya. E kaya na Kalou ni sa gadrevi meda cakava: “Raica na tamata kece sa dodonu me ra taura na yaca sa solia ko Tamaqu.”⁵

Ni gadrevi me rawati na kaukauwa veivakabulai e lako mai na yaca i Karisito, e dodonu meda “vakamalumalumutaki [keda] vua na Kalou … ka lako mai ena yalo raramusumusu kei na yalo e bibivoro … ka [lomada] meda taura vei [keda] na yaca i Jisu Karisito” ka sa rawati kina, me vakataki ira noqu itokani yabaki walu, “me ra na ciqomi ki na nona lotu ena papitaiso.”⁶

O ira kece era gadreva dina mera taura na yaca ni iVakabula mera sa kilikili mera ciqoma na cakacaka vakalotu ni papitaiso me ivakadinadina bula vua na Kalou ni sa nodra lewa.⁷ Ia na papitaiso sa kena itekivu ga.

Na vosa taura e sega ni ka wale. E vosa e cakacakataki e vica na kena ibalebale.⁸ Vakakina, noda yalayala meda taura na yaca i Jisu Karisito e gadrevi na cakacaka ka vica tiko na kena basoga.

Me vakataka, dua na ibalebale ni vosa taura o ya mo tauravaka se ciqoma ki yagomu, me vakataka noda taura e dua na gunu. Ni da sa taura vei keda na yaca i Karisito, eda sa yalataka meda taura na Nona ivakavuvuli, Nona itovo, kei na Nona loloma vakatitobu sara ki lomada me sa qai tiki ni keda ituvaki. Sa bibi kina na veisureti nei Peresitedi Nelson vei ira na itabagone qase mera “[vakasaqara] ena masumasu ena gumatua mera kila na itutu kei na yaca yadua [ni iVakabula] me vakaibalebale ki na [nodra] bula yadua” ⁹ ka kania na vosa i Karisito ena ivolanikalou, vakabibi na iVola i Momani.¹⁰

Na ikarua ni ibalebale ni vosa taura o ya mo ciqoma na itutu ni dua na tamata se karona na dina ni dua na vakasama se ivakavuvuli. Ni da sa taura vei keda na yaca i Karisito, eda sa ciqomi Koya me noda iVakabula ka karona tikoga na Nona ivakavuvuli me idusidusi ni noda bula. Ena veivakatulewa bibi eda cakava, sa rawa meda taura na Nona kosipeli ni sa dina ka talairawarawa kina ka bulataka ena taucoko ni yaloda, igu, vakasama, kei na kaukauwa.

Na vosa taura e kena ibalebale talega meda duavata ki na dua na yaca se inaki. E vuqa vei keda eda sa sotava oti na gauna meda taura na ilesilesi ni cakacaka se taura cake e dua na inaki se isoqosoqo. Ni da sa taura vei keda na yaca i Karisito, eda sa taura kina na ilesilesi ni tisaipeli dina, eda sa tutaka na Nona inaki, ka da sa “tu ka vakadinadinataki [Koya] ena veigauna kecega, kei na veika kecega, kei na veivanua kecega [eda] sa tiko kina.”¹¹ Sa kaci kina o Peresitedi Nelson “ki na goneyalewayadua kei na cauravou yadua … mera lewena na mataivalu itabagone ni Turaga me vukea na sokumuni nei Isireli.”¹² Eda sa vakamuduo taucoko meda taura na kaci vakaparofita meda taurivaka na yaca ni Nona Lotu vakalesuimai a vakatakila mai na iVakabula: Na Lotu i Jisu Karisito ni Yalododonu Edaidai.¹³

Ena gauna eda sa taura kina na yaca ni iVakabula, meda kila tiko ni inaki i Karisito kei na Nona Lotu sa dua ga ka tautauvata. E rau sega ni tawasei rawa. Vakakina, na noda bula vakatisaipeli vua na iVakabula ka lewenilotu gumatua ena Nona Lotu sa sega ni tawasei rawa. Kevaka eda sa malumalumu ki na dua na noda yalayala, na noda yalayala ki na kena ikarua ena luluqa, me vaka ga na bogi e dau tarava mai na siga.

Eso era sega ni via taura na yaca i Jisu Karisito kei na Nona inaki baleta ni ra nanuma ni ka qiqo, yalani, ka vakatabakidua. Na kena dina, na noda taura na yaca i Karisito e veisereki ka veivakararamataki ruarua. E vakayadrata na gagadre eda a vakila ni da ciqoma na ituvatuva ni Kalou ena loma ni noda vakabauta na iVakabula. Ni bula tiko na gagadre oqo e yaloda, eda na kunea na inaki dina ni noda isolisoli vakalou kei na taledi, sotava Nona loloma veivakaukauwataki, ka tubu noda kauwai ki na nodra bula na tamata. Ni da sa taura vei keda na yaca ni iVakabula, eda sa taura dina kina na veika vinaka kece ka yaco meda vakataki Koya.¹⁴

Sa ka bibi meda nanuma tiko ni noda taura na yaca ni iVakabula sa yaco me veiyalayalati dina—tekivu ena veiyalayalati eda vakayacora ena papitaiso. E vakavulica o Peresitedi Nelson, “[Ni da] yalataka meda muria na iVakabula ena noda cakava na veiyalayalati kei Koya ka qai maroroya tiko na veiyalayalati oqori ena tadola kina na katuba ki na veivakalougatataki vakayalo yadua kei na madigi sa vakarautaki tu.”¹⁵ Dua na madigi cecere ni noda taura vei keda na yaca ni iVakabula ena papitaiso o ya na kena rawati na cakacaka vakalotu e tarava ena sala ni veiyalayalati, meda veivakadeitaki. Niu taroga e dua noqu itokani yabaki walu na kena ibalebale vua me taura na yaca i Karisito, a sauma mai, “Sai kena ibalebale me sa tu vei au na Yalo Tabu.” E dina o koya.

Na isolisoli ni Yalo Tabu e ciqomi ena veivakadeitaki ni oti noda ciqoma na cakacaka vakalotu ni papitaiso. Na isolisoli oqo sa dodonu kei na madigi me yaco na Yalo Tabu me noda itokani ena veigauna. Keda vakarorogo ka muria na Nona vosa malua, ka rogo vinaka, ena vakatikori keda tiko ena sala ni veiyalayalati eda curuma ena papitaiso, vakaroti keda ni da temaki meda drotani, ka uqeti keda meda veivutuni ka tudonu tale. Sa noda inaki ni oti na papitaiso me tiko ga kei keda na Yalo Tabu me rawa ni da tomana tiko na ilakolako ena sala ni veiyalayalati. Na Yalo Tabu ena tiko walega kei keda ni da itagedetaka na noda bula me savasava ka galala mai na ca.

Ena vuku ni ka oqo, sa vakarautaka na Turaga na sala meda vakavoutaka tiko na mana savasava ni noda papitaiso ena dua na cakacaka vakalotu—na sakaramede. Ena veimacawa eda rawa ni “vakadinadinataka … ni sa lomada [meda] taura na yaca ni Luve[na]”¹⁶ ni da dodoliga yani ka taura na ivakatakarakara ni yago kei na dra ni Turaga e ligada—na madrai kei na wai—ka taurivaka ki na vu ni yaloda. Me isau, na iVakabula sa vakayacora tale Nona veivakasavasavataki mana ka rawa meda sa uqeti tikoga ena Yalo Tabu. E sega beka ni ivakadinadina oqo ni loloma tawayalani e kune ga ena yaca i Jisu Karisito? Me vaka ni da sa taura na Yacana kivei keda, sa taura o Koya na noda ivalavala ca ia sa “dodo tiko ga yani na Ligana loloma veivueti”¹⁷ ka ovici keda ena liga ni Nona loloma.¹⁸

Na sakaramede e veivakananumi e veimacawa ni noda taura na yaca i Jisu Karisito sa bula ka tomani noda yalayala, sega ni soqoni e yaco vakadua ga ena siga ni noda papitaiso.¹⁹ Sa rawa meda tomani ka reki wasoma tiko “ena isolisoli tabu o ya, era sa kila na tamata eso, me sa bokoci noda ivalavala ca ka taura na yagona kei na dra.”²⁰ Eda sega ni kurabui ni gauna era sa kila kina na luve ni Kalou na kalougata, kaukauwa vakayalo e rawa ni tadu mai ni tauri na yaca i Karisito, ka ra vakila na reki ka ra dau gagadre mera curuma e dua na veiyalayalati vata kei na Kalou.²¹

Ni da muria na sala oqo ni veiyalayalati sa vakalou, na noda yalayala kei na sasaga meda taura na yaca i Jisu Karisito ena vakaukauwataki keda meda “maroroya na [Yacana] me volai tiko ga e [lomada].”²² Eda na lomana na Kalou kei ira na wekada ka vakila e dua na gagadre meda qaravi ira. Eda na maroroya Nona ivakaro ka lomada meda volekati Koya ni da curuma na ikuri ni veiyalayalati vata kei Koya. Ni da raica ni da sa malumalumu ka luluqa meda cakava noda gagadre dodonu, eda na kerea meda qaqaco e lako duadua ga mai na Yacana, ka na lako mai me vukei keda. Ni da gu ena yalodina, ena yaco meda na raici Koya ka tiko vata kei Koya, ka da na raica ni da sa vakataki Koya, sa mai rawa kina meda lesu ki na iserau nei Tamada.

Sa dina na yalayala ni iVakabula: o ira sa “vakabauta na yacai Jisu Karisito, io me ra qarava na Tamada ena yacana, ka vosota ena vakabauta na yacana ki na ivakataotioti”²³ era na vakabulai ena matanitu ni Kalou. Au reki vata kei kemuni, ni kalougata tawavakatauvatani rawa oqo sa rawa ga ena noda taura na yaca i Jisu Karisito, o koya au sa vakadinadina kina, emeni.