Na Veiqaravi

Vinaka vakalevu Elder Gong kei Elder Soares na nomudrau cau ni yalodina kei na vakabauta. Keitou sa vakavinavinakataki kemuni kei na nomuni tokani.

Kemuni na taciqu kei na ganequ, eda vakasaqara na veidusimaki dei mai vua na Turaga ena sala eda rawa ni vukei ira kina na noda lewenilotu me ra muria na ivunau kei na Kalou, vakabibi na ivunau cecere e rua ni lomana na Kalou kei ira na wekada.¹

Sa vuqa na vula, na neimami vakasaqara na sala vinaka cake me qarava na nodra gagadre vakayalo ka vakayago talega o ira na noda tamata ena ivakarau ni Vakabula.

Keitou sa vakatulewataka me sa vakacegui na veituberi ena vuvale kei na siko vuvale me vaka eda sa kila tu mai. Ia oqo, eda na vakayacora e dua na iwalewale vou, ka vakatabui vakalevu cake, ena nodra kauwaitaki ka qaravi o ira na tani. Eda sa na vakatoka na sasaga oqo me “veiqaravi.”

Na sasaga mana ni veiqaravi e rawa ena nodra isolisoli vakalou na marama kei na kaukauwa sega ni vakatauvatani rawa ni matabete. Eda gadreva na veitaqomaki vakaoqori mai na lawaki qaseqase veirawai ni vu ni ca.

Erau na qai vakamacalataka vakamatata o Elder Jeffrey R. Holland ena Kuoramu ni Apositolo Le Tinikarua kei Sister Jean B. Bingham, na Peresitedi Raraba ni Soqosoqo ni Veivukei, ena vakayacori vakacava na lesilesi oqo vei ra na turaga ena matabete kei na marama ena Soqosoqo ni Veivukei kei na Goneyalewa ena veiqaravi ka kauwaitaki tiko o ira na lewe ni Lotu e vuravura raraba.

Na Mataveiliutaki Taumada kei na Tinikarua era duavata ena veitokoni ena nodrau itukutuku. Ena yalo ni masumasu kei na vakavinavinaka keitou sa dolava kina e dua na iwase vou ena itukutuku ni veigauna ena Lotu. Ena yaca i Jisu Karisito, emeni.