2010–2019
Me da Sa Gu Tiko
Epereli 2018


Meda Sa Gu Tiko

Ena vakatuburi na nomu gagadre mo talairawarawa ni ko nanuma ka vakasamataka vakatitobu na ka ko vakila ena rua na siga sa oti.

Oi kemuni na taciqu kei na ganequ, ni da sa rorova mai na icavacava ni koniferedi vakairogorogo oqo, au tomani kemuni ena vakavinavinaka vua na Turaga ena Nona veidusimaki kei na veivakauqeti veilaveti. E sa totoka ka veilaveti na sereivakatagi. E sega walega ni veivakatataki cake na itukutuku, ia era vu ni bula me veisau.

Ena soqoni tabu eda a tokona kina na Mataveiliutaki Taumada vou. E rua na turaga dokai erau sa mai vakatikori ena Kuoramu niiApositolo Le Tinikarua. Sa kacivi e walu na Vakaitutu Raraba Vou.

Nikua e sa dua na sere taleitaki e vakalekalekataka na noda igu vou, na noda bolebole, kei na noda toso ni lako ki liu:

Meda sa guta na cakacaka ni Kalou,

Eda na saumi dina ni oti na bula;

Ena ivalu ni dodonu meda vakaiseleiwau,

Seleiwau vaKalou na dina.

Tudei veitalia ga na ca

Meda qaqa Jisu ga na noda ito

Eda sega ni muria tu na ca

Na vosa tabu ga niTuraga eda na muria.1

Au vakamasuti kemuni mo ni vulica na itukutuku ni koniferedi oqo e veigauna—ka me veitaravi—ena ono na vula ka tarava. Vakasamataka titobu na veisala ko rawa ni vakacuruma kina ki na nomu lotu ni matavuvale, nomu veivakavulici vakosipeli, nomu veitalanoa kei na nomu matavuvale kei ira na itokani, kei na nomu veitalanoa mada ga kei ira eda sega ni vakabauta vata.E levu na tamata vinaka era na yavalati ena dina ka vakatavulici ena koniferedi oqo ni soli ena loloma. Ka na vakatuburi na nomu gagadre mo talairawarawa ni ko nanuma ka vakasamataka na ka ko vakila ena rua na siga sa oti.

Ena ivakatakilakila ni dua na gauna ni veiqaravi vou na koniferedi oqo. Esa vakayacora na veiveisau bibi na Turaga me baleta na ivakarau eda veikaroni vakataki keda. Kemuni na taciqu kei na ganequ—gone kei na qase—eda sa na veiqaravi vakai keda yadua ena sala vou, ka vakatabui. Era sa na vaqaqacotaki na kuoramu ni talatala qase me vakalougata na nodra bula ni turaga, marama, kei na gone ena veiyasai vuravura. Era na tomana tiko na marama ena Soqosoqo ni Veivukei na veiqaravi ena sala e duatani ena loloma, ka solia yani na madigi vei ira na goneyalewa me tokoni ira ena ilesilesi veiganiti.

Na noda itukutuku ki vuravura e rawarawa ka lomadina: eda sureti ira na luvena kece na Kalou ena yasa ruarua ni ilati me ra lako mai vua na iVakabula, ciqoma na veivakalougatataki ni valetabu savasava, taukena na reki bulatiko, ka wili ki na bula tawamudu.2

Na yacovi sara ni bula lagilagi e gadrevi kina na noda dina taucoko edaidai ki na veiyalayalati eda cakava kei na cakacaka vakalou ena vale ni Turaga. Ena gauna oqo, e tiko e 159 na valetabu e veiqaravi tiko, ka vuqa tale era se tara tiko. Keitou vinakata me kau yani vakavoleka na valetabu ki na iwiliwili ni lewenilotu tubu cake tikoga. Sa ka marautaki meu kacivaka yani oqo na ituvatuva e tiko me tara eso na valetabu vovou. Era na tiko na valetabu oqori ena veivanua oqo: Salta, Argentina; Bengaluru, India; Managua, Nicaragua; Cagayan de Oro, Philippines; Layton, Utah; Richmond, Virginia; kei na dua na tauni levu e sega ni se kilai rawa e Rusia.

Kemuni na taciqu kei na ganequ, na tara ni veivaletabu oqo era na sega beka ni veisautaka na nomuni bula, ia na nomu gauna e loma ni valetabu ena kauta mai na veisau. Ena yalo vata oqori, au vakalougatataki kemuni mo ni kila na veika ko ni rawa ni biuta vakatikitiki ka moni rawa ni vakayagataka e levu cake na gauna ena valetabu. Au vakalougatataki kemuni me levu nomuni veilomani kei na loloma e nomuni veivale kei na gagadre titobu cake mo ni qarava na nomuni veiwekani vakavuvale tawamudu. Au vakalougatataki kemuni ena vakabauta levu cake vua na Turaga ko Jisu Karisito kei na rawata vakalevu cake mo ni muri Koya ka Nona tisaipeli dina.

Au vakalougatataki kemuni mo ni laveta na domomuni ena ivakadinadina, me vakai au oqo, ni da vakaitavi tiko ena cakacaka ni Kalou Cecere.O Jisu na Karisito. Oqo na Nona Lotu, ka dusimaka tiko Ko Koya mai veira na Nona italai. Au vakadinadina kina, kau vakaraitaka na noqu loloma vei kemuni yadua, ena yaca tabu i Jisu Karisito, emeni.