Yavubula Tawayalani
Meda dau marautaka na vakasolokakana kamica ni Yalo Tabu, vakadeitaki kina na dina ni keda yaga vakayalo.
Au a veisiko voli ena vanua o Sierra Leone ena Ra kei Aferika, kau a laki vakaitavi sara ena dua na soqoni a liutaka e dua na iliuliu ni Lalai ena iteki. A veiliutaki o Mariama ena lomavinaka, loloma soliwale, kei na nuidei ka da vakadeitaka rawa ni sa lewe ni Lotu makawa tu mai. Ia, a se qai curuvou wale tikoga mai o Mariama.
A lewena mai na Lotu o tacina gone ka sureti Mariama me rau tiko ena dua na kalasi ni Lotu. A vakauqeti sara vakabibi o Mariama ena itukutuku. Na lesoni a baleta tiko na lawa ni tiko savasava. A qai kerei rau na daukaulotu me rau vakavulici koya vakataucoko ka mani ciqoma kina na ivakadinadina baleta na Parofita o Josefa Simici. A papitaiso o koya ena 2014, ka a papitaiso o luvena yalewa ena vula sa oti. Vakasamataka mada, na ivakavuvuli bibi e rua a yaco kina me saumaki mai o Mariama, oya na lawa ni tiko savasava kei na Parofita o Josefa Simici, e rua na yavu e dau raica tu ko vuravura me sega na betena, makawa, se takiveiyaga.Ia a vakadinadinataka o Mariama ni sa vaka na bebe ni bogi na nona bula ka domona na cina. A kaya, “Niu sa kila na kosipeli, au sa kilai yaloqu.” A raica o koya na kena yaga ena ivakavuvuli vakalou. Na nona yavubula ni sa luvena yalewa na Kalou a vakaraitaki vua mai vua na Yalo Tabu.
Ia meda sotavi rau mada na veitacini na Singh mai Idia. Ena yasana sara imatau, o Renu, na imatai ni lima na veitacini yalewa me lewena na Lotu, ka mai wasea tiko:
“Ni bera niu vakadikeva na Lotu, au sega ni nanuma niu dua e vakamareqeti tu vakalevu. Au dua tu ga vei ira na lewevuqa, ka sega ni vakavulici au sara vakavinaka na noqu kawatamata kei na vanua ni tiko na noqu yavubula vakai au. Niu sa vulica na kosipeli ka vulica niu sa luvena yalewa na Tamada Vakalomalagi, sa veisautaki au sara ga.E vakasauri noqu vakila niu sa vakamareqeti—a buli au dina sara ga na Kalou ka bulia na yaloqu kei na noqu bula ena yavubula kei na inaki.
“Ni bera ni yaco na kosipeli ki na noqu bula, au a dau saga meu vakadinadinataka vei ira na tamata niu dua e vakamareqeti. Ia niu sa mai vulica na dina, niu sa dua na luvena yalewa na Kalou, sa sega tale meu vakadinadinataka e dua na ka vua e dua. Au sa kila tu niu sa ka vakamareqeti. … Kakua vakadua ni nanuma ni o sega ni dua na ka.”
E kaya kina vakamatata o Peresitedi Thomas S. Monson ena vosa oqo: “Na yaga bibi ni dua na tamata o ya me na rawata me sa vakataka na Kalou.”1
Au a vakalougatataki tale meu sotava e dua talega na goneyalewa sa kila vinaka tu na dina vata oqo. Na yacana o Taiana. Au a sotavi koya ena Valenibula ni Gone Lalai e Salt Lake City. A gonevuli gone tiko o Taiana ena koronivuli levu ni sa laurai sa tauvi koya na kenisa. A sasaga qaqa o koya ena 18 na vula ni bera ni qai takali yani ena vica ga na macawa sa oti. A sinai tu o Taiana ena rarama kei na loloma. A kilai tu o koya ni dau matadredredre veirawai ka dau “veivakayaloqaqataki.” Nira tarogi koya, “E cava me o iko kina, Taiana?” e qai dau sauma, “Cava me kua kina ni o au?” A saga o Taiana me vakataka na iVakabula, ni lomani Koya vakalevu sara. Ena neirau veisiko, au a vulica ni sa kila tu o Taiana na kena yaga bibi vakalou. Na nona kila ni sa luvena yalewa na Kalou a kune vakacegu kina ka yaloqaqa me sotava na veivakatovolei veiuabaleti ena sala dodonu a cakava.
E ratou vakavulica vei keda o Mariama, Renu, kei Taiana ni na vakadeitaka na Yalo Tabu vei keda yadua na keda yaga vakalou. Na nomu kila vakaidina ni ko sa luvena yalewa na Kalou ena vakayaco ka kina nomu bula ka vakasalataki iko ena veiqaravi o vakayacora ena veisiga. E vakamacalataka kina o Peresitedi Spencer W. Kimball ena vosa lagilagi oqo.
“Na Kalou e Tamamu. E lomani iko o Koya. O koya kei na tinamu mai lomalagi e tawayalani na nodrau vakamareqeti iko. … O sa duatani. O duatani, ni ko sa buli ena vuku tawamudu e solia vei iko na dodonu mo bula tawamudu.
“Me kakua kina ni ko lomatarotarotaka na nomu yavunilewa vakai iko. Na inaki taucoko ni ituvatuva ni kosipeli oya me vakarautaka na madigi vei kemuni yadua mo ni yacova na kemuni ituvaki taucoko, o ya na torocake tawamudu kei na kena rawati na bula vakalou.”2
Meu vakamatatataka mada na gadrevi ni kena kilai na duidui ni rua na vosa bibi oqo: yaga kei na kilikili. E rau sega ni tautauvata. Na ibalebale ni yaga vakayalo o ya meda vakamareqeti keda me vaka e cakava vei keda na Tamada Vakalomalagi, sega ni vaka e vakamareqeti keda o vuravura. Na keda yaga bibi a vakadeitaki tu mai ni bera na tadu mai ki vuravura. “Na loloma ni Kalou sa tawamudu ka na gugumatua ki na ivakataotioti.”3
Na kena ikarua, na kilikili ena rawati ena vuku ni talairawarawa. Keda sa caka cala, eda sa sega ni kilikili, ia e sega ni takiveiyaga na keda yaga! Eda na veivutuni tikoga ka saga meda vakataki Jisu ka sema dei tiko na keda yaga.Me vaka e vakavulica o Peresitedi Brigham Young: “Ke lailai, na yalo sa lailai sara ka tu qo i vuravura … sa vuravura taucoko na kena yaga.”4 Se cava ga e yaco, eda sa tamata yaga ena mata ni Tamada Vakalomalagi.
E dina ni tiko na dina totoka oqo, e vica vei keda eda sasaga bula ena veigauna, mai na vakasama se yalo e vakatani me baleti keda? Au cakava. Eda coriti rawarawa. E tama ni lasu kecega o Setani, vakabibi ena gauna ni vakatakilaitaki cala na keda ituvaki vakalou kei na kena inaki. Na noda tabaki keda sobu tiko ena sega ni vinaka vei keda. Ia e dreti keda sobu tikoga. Me vaka sa vakavulici tiko vei keda, “E sega ni rawa me dua e vakatorosobutaki iko ke o sega ni vakadonuya.”5 Meda sa tarova noda vakatautauvatataka na noda ca ki na nona vinaka e dua tale.“Na veivakatauvatataki e butakoca na noda reki.”6
Na kena duidui, sa vakadeitaka vei keda na Turaga ni da vakasama savasava, ena vakalougatataki keda ena nuidei, vakabibi na nuidei meda kila o cei o keda. Sa sega tale na gauna vinaka duadua me vaka oqo meda muria kina na Nona vosa. “Mo qarauna me savasava tikoga na nomu vakanananu,” E kaya o Koya. “Ia ena vakaukauwataki kina na nomu vakabauta ena mata ni Kalou; … ena sala vata voli ga kei iko na Yalo Tabu.”7
A vakaraitaka na Turaga na ikuri ni dina oqo vua na Parofita o Josefa Simici: “Raica ko koya sa ciqoma mai vua na Kalou, me kila tikoga ni sa mai vua na Kalou; io me rekitaka ni raica na Kalou ni sa kilikili kaya me ciqoma.”8 Ni da sa vakila na Yalo, me vaka e tukuna tiko na tikina oqo, eda na kila ni ka eda vakila sa lako mai vua na Tamada Vakalomalagi. Eda sa rokovi Koya ka vakalagilagi Koya ni sa vakalougatataki keda. Eda sa qai reki ni da sa wili meda ka yaga meda ciqoma.
Vakasamataka mada ni ko wili ivolanikalou tiko ena mataka lailai ka vakasolokakana mai na Yalo Tabu vei iko ni ka o wilika tiko e ka dina. O na kila beka na Yalo Tabu ka marau ni ko vakila na Nona loloma ni ko sa yaga mo ciqoma?
Kemuni na tina, o na tekiduru beka kei luvemuni tagane yabaki va me masu ni vakarau moce. E sobuti iko e dua na yalo ni ko sa vakarorogo tiko. O loma vinaka ka vakacegu. E lekaleka na loma vinaka, ia o sa vakila, ena gauna o ya, sa yaga mo na ciqoma. Ena vagauna, ke yaco mai, noda ciqoma na vakatakilakila vakayalo cecere ki na noda bula; ia eda na vakila vakawasoma na vakasolokakana kamica ni Yalo Tabu, vakadeitaka tiko mai na dina ni keda yaga vakayalo.
E vakamacalataka na Turaga na veiwekani ni keda yaga kei na Nona solibula veisorovaki ka a kaya kina:
“Raica sa ka talei e na mata ni Kalou na tamata kece ga;
“Ia, raica, na Turaga na nomudou Dauveivueti sa mai mate vakayago; o koya sa mai colata kina na nodra rarawa na tamata kecega, me rawa vei ira na tamata kecega na veivutuni ka lako mai vua.”9
Kemuni na marama, ena vuku ni veika a cakava vei keda o Koya, “eda sa vauci vua ena isema ni loloma.”10 A kaya “Ka sa talai au mai ko Tamaqu meu na mai laveti cake ena kauveilatai; ia niu sa laveti cake oti ena kauveilatai, meu kauti ira mai kina na tamata kecega kivei au.”11
A vakamacalataka talega na Tui o Penijamini na veisemati oqo kei na noda iVakabula: “Ka raica ena sotava ko Koya na veitemaki, kei na mosi ni yago, na viakana, na viagunu, kei na oca, ka levu cake mai na kena e vosota rawa na tamata, ka tarava ga kina na mate; ia raica, sa tuturu mai kina na dra mai na veiqara ni yagona, ni sa rui levu sara na nona yaluma ena vuku ni nodra caka ca kei na nodra itovo vakasisila na nona tamata,”12 Na rarawa kei na revurevu ni rarawa oqo sa vakasinaiti kina na yaloda ena loloma kei na vakavinavinaka. E vakavulica o Elder Paul E. Koelliker, “Ni da kauta laivi na veika dau veivagolei tani ka dau dreti keda ki vuravura ka vakayagataka na noda galala me da vakasaqarai Koya, eda sa dolava na yaloda ki na dua na igu vakaselesitieli ka na dreti keda yani ki Vua.”13 Ke yaco na noda lomana na iVakabula kei na veika sa cakava vei keda o Koya e sa cecere cake mai na kaukauwa eda solia ki na caka cala, vakatitiqataki keda, se itovo ca, sa na qai vukei keda o Koya meda uabaleta na veika sa vakavuna na rarawa ni noda bula. Sa vakabulai keda mai vei keda.
Meu vakamacalataka tale mada: ke sa kaukauwa cake na idre kei vuravura mai na noda vakabauta kei na nuitaka na iVakabula, sa qai kaukauwa cake na idre kei vuravura ena veigauna kece. Keda sa vakanamata tikoga ki na noda vakasama tani ka vakatitiqataka na keda yaga, ka sega ni vakararavi vua na iVakabula, sa qai dredre cake meda vakila na Yalo Tabu.
Kemuni na marama, meda kakua ni lecavi keda tiko! Me vaka ni dau rawarawa cake tu na noda veituyaki vakayalo mai na noda saga vakayalo meda nanuma ka ciqoma na noda ivakatakilakila vakalou, ena sega ni rawa meda na vakatani tiko ena gauna oqo. Meda ia na marama, ka “yalodina vei Karisito; … me laveti [keda] cake mada ko Karisito, na nona vakararawataki kei na nona mate, … na nona loloma cecere, na nona vosota vakadede kei na inuinui ni nona lagilagi kei na bula tawamudu, me tiko ena [noda] vakasama me sega ni mudu.”14 Ni sa laveti keda na iVakabula ki na vanua cecere, ena sega walega ni da matata noda raica se ocei o keda ia eda sa voleka sara Vua mai na kena eda vakasamataka rawa. Ena yaca tabu i Jisu Karisito, emeni.