“Lako Vata kei Au”

Kemuni na taciqu lomani ena matabete, na noqu inaki nikua meu vakadeitaki kemuni, ka vakayaloqaqataki kemuni ena nomuni veiqaravi vakamatabete. Ena so na sala, e tautauvata kei na inaki au nanuma ni a tiko vua na iVakabula ena gauna erau sota kina kei na dua na cauravou vutuniyau ka a taroga, “A cava na ka vinaka meu kitaka meu rawata kina na bula tawamudu?” (Maciu 19:16). De o lako tiko mai ki na koniferedi oqo me vaka na nona lako vua na iVakabula na cauravou vutuniyau oqo, o vakataroga voli se sa ciqomi beka na nomu veiqaravi. Ena gauna vata oya, o na vakila voli ni se levu tu na ka me caka—de levu sara beka! Au masuta me rawa niu vakadewataka na nona veivakadonui loloma na Turaga ena veika o sa cakava oti, ena gauna vata au vakaraitaka tiko kina e dua na irairai veivakayaloqaqataki ni veika ena rawa vei iko, ena nona veivuke, mo rawata ni o taura tu na Nona matabete tabu.

A kerei vua na cauravou vutuniyau me volitaka na ka kecega e taukena me muria na iVakabula, ena sega beka ni gadrevi oya ena nomu toso ena veisiga ni mataka, ia ena gadrevi dina kina e dua na ivakarau ni solibula Se o cei ga vei rau, au nuitaka ni na sega ni vakavuna na noqu itukutuku nomu “lako tani [ni] sa rarawa na loma[mu]” me vaka a cakava na cauravou. (Raica na Maciu 19:20–22.) Ia, au nuitaka ni da na “lako ena marau” (V&V 84:105baleta ni o vinakata mo vinaka cake.

O koya, e donu tu kevaka eda vakila noda sega ni veiraurau ni da vakasamataka na veika sa kacivi keda kina na Turaga me da cakava. Ia, kevaka o tukuna vei au ni ganiti iko vakavinaka mo qarava nomu itavi vakamatabete, au na rawa ni lomaleqa ni o sega ni kila sara vakavinaka. Ena yasana kadua, kevaka o kaya vei au ni o sa vinakata mo soro baleta ni sa rui sivia sara vakalevu na veika o rawa ni cakava na itavi oqo, au na vinakata meu vukei iko mo kila na ivakarau e dau vakalevulevui ira ka vaqaqacotaki ira kina na Nona matabete na Turaga me ra cakava rawa na veika ena sega sara ni rawa ni ra cakava taudua.

Na ka oqo e dina sara vei au ena noqu veikacivi me vaka na kena dina vei iko ena nomu. E sega ni dua vei keda e rawa ni cakava na cakacaka ni matabete, ka cakava vakavinaka, me vakararavi ga vakatabakidua ena noda yalomatua kei na taledi. Oqori e baleta ni sega ni noda cakacaka oqo—e nona na Turaga. O koya na sala duadua ga eda na qaqa kina me da vakararavi Vua, se o dikoni kacivi vou ka nuitaki ena itavi mo kauta mai eso na mana vakayalo ki na cakacaka vakalotu ni sakaramede, se dua na dauveituberi vakavuvale ka lesia mai na Turaga me lomana ka dau qarava e dua na matavuvale o sega ni kila ka vaka me ratou sega ni taleitaka na nomu loloma se na veiqaravi, se dua na tama ka kila mo vakatulewa ena nomu vuvale ena buladodonu, ia rairai e sega ni se dei vei iko me caka vakacava, ka vaka me sa oti mai na kena gauna, baleta ni ra sa tubu cake totolo na gone oqori ka sa rui rerevaki ka voravora na vuravura.

O koya kevaka o vakadrukai vakalailai, raica oqori ni dua na ivakatakilakila vinaka.E tukuna tiko oqori ni o rawa ni vakila na levu ni veivakabauti sa solia vei iko na Kalou. E kena ibalebale ni o sa kila tiko vakalailai se cava dina na matabete.

E lailai sara na tamata e vuravura era kila tu oqori. O ira sara mada ga e rawa ni ra cavuqaqataka e dua na ivakamacala momona e rawa ni ra sega ni kila. Eso na ivolanikalou, mai na mana ni Yalo e tu kina, e rawa ni vakatitobutaka na noda qoroya na matabete tabu. Oqo eso na ivolanikalou:

“Sa tu na kaukauwa kei na lewa ena matabete i Melikiseteki, io sa lewa na veivakalougatataki kei na cakacaka vakayalo ena lotu—

Me tu vua na dodonu me ciqoma na veika vuni ni matanitu vakalomalagi, me tadolavi vei ira ko lomalagi, ka ra na veimaliwai kei ira ena soqoni raraba kei na nona lotu na Ulumatua, io era na marautaka na nodra veimaliwai ka tiko ena iserau ni Kalou ko Tamada kei Jisu na dauveivakaduavatataki ni veiyalayalati vou.

“Na kaukauwa kei na dodonu ni matabete lailai se Matabete i Eroni, sai koya me taura na idola ni nodra veiqaravi na agilosi” (V&V 107:18–20).

“Ia na ilesilesi oqo [ni matabete] sa vakatakilai mai kina na kaukauwa va-Kalou. …

“Ia kevaka sa sega na ilesilesi oqo, ena sega na tamata e raica rawa na mata ni Kalou ko Tamada, me qai bula tiko.” (V&V 84:20, 22).

“Na matabete levu oqo me vaka na kena ivakarau vua na Luvena, sa ivakarau mai na tauyavutaki ni vuravura; se ena dua tale na vosa, ni sega na kena itekitekivu ni siga se na icavacava ni yabaki, ni a vakarautaki mai na gauna tawamudu ki na veigauna tawamudu, me vaka na nona kila taumada na veika kecega” (Alama 13:7).

“Ko ira kece era sa tabaki oti ki na ivakarau kei na ilesilesi oqo sa tu vei ira na kaukauwa, ena vakabauta, me ra talaraka na veiulunivanua, me ra wasea na veiwasawasa, me ra vakamamacataka na wai, ka vagolea tani na drodro ni wai;

“Me vorata na sasaga ni mataivalu ni veimatanitu, me wasea na vuravura, me tamusuka na ivesu kecega, me tu ena iserau ni Kalou; me cakava na ka kecega me vaka na nona lewa, me vaka na nona ivakaro, me vakamalumalumutaka na veimatanitu kei na kaukauwa; ia oqo me vaka na nona lewa na Luve ni Kalou o koya sa tu ni se bera na tauyavutaki ni vuravura” (iVakadewa nei Josefa Simici ni, iVakatekivu 14:30–31 [ena idusidusi ni iVolatabu]).

E dua na ivakarau me da bokaca kina na ivakamacala vakaoqo ni mana ni matabete sai koya me da nanuma ni sega ni yaco vei keda. E dua tale na ivakarau me da sauma ena taro titobu, ka tarogi e yaloda, me vakaoqo: Au sa bau vakila mada ena dua na gauna ni sa dolavi vei au ko lomalagi? Ena dua beka ena vakayagataka na malanivosa “na veiqaravi ni agilosi” me vakamacalataka kina na noqu veiqaravi vakamatabete? Au sa kauta beka mai na “kaukauwa vakalou” ki na nodra bula o ira au qarava? Au sa bau talaraka mada e dua na ulunivanua vorata na sasaga ni dua na mataivalu, tamusuka na kena ivesu e dua, se vakamalumalumutaka na kaukauwa vakavuravura—ke vakavosa wale mada ga—me rawati kina na loma ni Kalou?

Na dikevi vakaoqo ni lomada e dau kauta mai na yalo ni rawa ni levu cake na ka eda cakava tiko ena veiqaravi vua na Turaga. Au nuitaka ni na kauta talega mai vei iko e dua na vakanananu ni o vinakati me levu cake na ka o cakava—na gagadre me taucoko nomu vakaitavi ena cakacaka veivakurabuitaki ni Turaga. Na mataqali yalo vakaoqori sa imatai ni kalawa me da yaco kina me vaka na mataqali tamata e dodonu me vakatubura cake na veiqaravi vakamatabete.

Na ikalawa e tarava e vakamacalataki ena dua na nodrau veivosaki o Jiova kei Inoki. Eda kila ni o Inoki e dua na parofita qaqa, ka a tauyavutaki Saioni ena maliwa ni ivalavala ca levu. Ia ni se bera ni yaco me dua na parofita qaqa, A raici koya o Inoke me “tamata gone ga, … sa [dau] cudruvi au kecega na tamata niu sa dau vosa malua (Mosese 6:31). Rogoca na vosa e cavuta na Turaga me vakayaloqaqataki Inoki kina. Sa Nona vosa talega vei keda eda kacivi me da veiqaravi vei ira na tani ni da matabete:

“A sa kaya na Turaga vei Inoki: Mo lako yani ka kitaka na ka au sa vakarota vei iko, ena sega ni dua na tamata e cokai iko. Mo dolava na gusumu, ka na qai vakasinaiti, kau na tukuna vei iko na vosa mo cavuta, niu sa lewa na tamata kecega, kau na kitaka ga na ka e vinaka vei au. …

“Raica sa tiko vata kei iko na Yaloqu, ia au na vakadonuya na nomu vosa kecega; ia ena dro tani mai matamu na veiulunivanua, ka vagolea tani na drodro ni uciwai; ia, ko na tu vei au, ka’u na tu vei iko; o koya mo lako kina vata kei au” (Mosese 6:32, 34).

Kemuni na taciqu, na noda tabaki ki na matabete sa veisureti ni Turaga me da lako vata kei Koya. Ka cava na kena ibalebale me da lako vata kei na Turaga? E kena ibalebale me da cakava na ka e dau cakava o Koya, me veiqaravi me vaka na Nona veiqaravi. E biuta vakatikitiki nona vakacegu me vakalougatataki ira era leqa tu, oqori na ka eda tovolea me da cakava. E vaka me dau kauwaitaki ira vakalevu cake o Koya na tamata era dau beci kei ira sara mada ga era dau biliraki mai vei ira na tamata, eda tovolea talega me da cakava oqori. E vakadinadinataka ena yaloqaqa ia ena loloma na ivunau dina e ciqoma mai vei Tamana, kevaka sara mada ga e sega ni ciqomi, sa dodonu vakakina vei keda. E kaya ko Koya vei keda kecega, “Dou lako mai vei au” (Maciu 11:28), ka da kaya o keda ki na tamata kecega, “Lako mai Vua.” Ni da matabete, sai keda na Nona mata. Eda cakacaka sega ena vukuda ia ena Vukuna. Eda cavuta sega ni noda vosa ia na Nona. Ena yaco me ra kilai Koya vakavinaka cake na tamata eda qarava mai na noda veiqaravi.

Ena gauna ga eda ciqoma kina nona veisureti na Turaga me da “Lako vata kei koya,” sa na veisau na noda veiqaravi vakamatabete Sa yaco ena dua vata ga na gauna me cecere ka vakaturaga cake ia sa na rawa talega ni rawati, baleta ni da kila ni da sega ni tiko taudua. Au a vakila vakaukauwa sara oqo ena nona vakotora o Peresitedi Thomas S. Monson na ligana e uluqu ena ciwa na yabaki sa oti ka vakalougatataki au ena noqu veikacivi oqo. Ena veivakalougatataki oqori, a cavuta kina na nona veimalanivosa oqo na iVakabula: “Ia ko koya sa ciqomi kemudou, au sa tiko talega kina koi au, niu na liu e matamudou. Au na tiko e yasamudou imatau ka tiko talega e yasamudou imawi, ia na Yaloqu ena tiko e lomamudou; era na vakavolivoliti kemudou na noqu agilosi me ra laveti kemudou cake” (V&V 84:88

Au sa dau vakararavi ena yalayala ni matabete oya ena vuqa na gauna, kau sa raica na kena vakavotukanataki ena vuqa na sala ena loma ni 72 na yabaki ni noqu veiqaravi vakamatabete. A yaco niu dua na Matabete i Eroni vou ka noqu ilesilesi meu solia na sakaramede. Niu rere deu cala, au a lako i tautuba ni valenilotu ni se bera ni tekivu na soqoni ka masu ena vakanuinui me vukei au na Kalou. A yaco mai e dua na kena isau. Au vakila ni a tiko vata kei au na Turaga. Au vakila Nona yalodei ena vukuqu, o koya au yalodei kina ena noqu itavi ena Nona cakacaka.

A yaco tale niu veiqaravi voli vakabisopi. Au a ciqoma nona qiri e dua na marama ka a cakava e dua na cala bibi sa sotava tiko oqo e dua na gauna ni vakatulewa dredre. Ni keirau veitalanoa, au vakila niu kila na isau ni nona leqa, ia au vakila talega vakaukauwa meu kakua ni tukuna vua na kena isau oya—e dodonu me qai rawata ga vakataki koya. Na noqu vosa vua e vakaoqo “Au vakabauta ni na tukuna vei iko na Kalou na ka mo cakava kevaka o kerea Vua.” Qai tukuna e muri ni a qai kerea Vua, ka qai tukuna vua o Koya.

Ena dua tale na gauna, a yaco tale mai e dua na qiri, ena gauna oqo o iratou na ovisa. A tukuni vei au ni dua na draiva mateni e vakacoqa nona motoka ena varada ni dua na baqe. Ni raica na draiva lomaleqa oqo na yadra kei na nona iyaragi, a kailavaka, “Kua ni vana! O au na Momani!”

A qai kilai ni lewe ni noqu tabanalevu na draiva mateni oya, ka se qai papitaiso wale toka. Niu wawa toka me keirau veivosaki ena noqu valenivolavola ni bisopi, au sa nakita toka na veika meu tukuna vua me rarawataka kina na nona voroka nona yalayala ka vakamadualaka na Lotu. Ia niu dabe ka vakaraici koya toka, au rogoca e dua na domo ena noqu vakasama, “Au na vakayacora mo raici koya me vaka na noqu raici koya.” Oti, ena dua na gauna lekaleka, qai veisau vakadua na kena irairai taucoko. Au a sega ni raica e dua na cauravou vuseka ia e dua na luvena savasava, serau, ka vakaturaga na Kalou. Au vakila vakasauri na loloma ni Turaga vua. E veisautaka na neirau veivosaki na raivotu oya. E veisautaki au talega.

Au vulica na veilesoni bibi mai na veika au sotava oya ena lako vata kei na Turaga ni da cakava na Nona cakacaka. Au via wasea vei kemuni e tolu. Na imatai oya na Kalou e kila ka na tokona na dikoni vou ka gone duadua. Me kakua vakadua ni o nanuma ni o sa rui ka lailai se o sega ni dua na ka Vua me kilai iko kei na veiqaravi o solia tiko ena Yacana.

Na ikarua ni lesoni sai koya ni cakacaka ni Turaga e sega ni baleta walega na wali ni leqa, ia me tara cake na tamata. Ni o lako vata kei Koya ena veiqaravi vakamatabete, e rawa ni o raica ni so na gauna na ka e vaka me iwali mana duadua e sega ni ka e vinakata na Turaga baleta ni sega ni solia na tubu vei ira na tamata. Kevaka o vakarorogo ena vakavulica vei iko o Koya na Nona ivakarau. Nanuma tiko na inaki kei na lagilagi ni Nona cakacaka na Kalou e sega walega me cicivaki e dua na isoqosoqo mana; sai koya me “vakavuna na tawamate rawa kei na bula tawamudu ni tamata” (Mosese 1:39). Sai koya oqo na vuna e solia kina o Koya na lewa ni Nona matabete ki na tamata malumalumu vakataki iko kei au ka sureti kedaru me daru vakaitavi ena Nona cakacaka. Na nodaru tubu sai koya na Nona cakacaka!

Na ikatolu ni lesoni: Na lako vata kei na iVakabula ena veiqaravi ni matabete ena veisautaka na ivakarau o raici ira kina na tani. Ena vakavulici iko o Koya mo raici ira ena Matana, kena ibalebale mo raibasikata na irairai e taudaku ki yalona (raica na 1 Samuela 16:7). Oqo na sala a kunei Saimoni kina na iVakabula ni sega ni dua na dauqoli wariri, ia o Pita na iliuliu ni Nona Lotu ni mataka qaqa vakavatu (raica na Luke 5:1–11). Oqo na sala a raici Sakiusa rawa kina, sega ni dua na daukumuni ivakacavacava lawaki me vaka era raica tale eso ia ni dua na luvei Eparaama dina, dodonu (raica na Luke 19:1–9). Kevaka o lako vata tiko vakabalavu kei na iVakabula, o na vulica mo raica na tamata kecega ni ra luve ni Kalou sega ni vakaiyalayala na ka era rawa ni rawata, se cava ga na itovo ni nona bula e liu. Ia kevaka o na lako tikoga vata kei na iVakabula, o na tara cake e dua tale na isolisoli e tua Vua—nomu rawata mo vukea na tamata me ra raica rawa na veika e tu vei ira.

Kemuni na taciqu ena matabete, eda vakataki rau na tisaipeli erau lakova na sala ki Emeo ena imatai ni Sigatabu ni Siganimate oya ena vuqa sara na sala. Oya na mataka ni Tucaketale, ia erau sega ni vakadeitaka rawa se na yaco dina na tucaketale se na cava mada ga na ibalebale ni tucaketale. Erau “vakabauta ni ko [Jisu na kai Nasareci] a dodonu me vueti Isireli,” ia erau sa sesewa ka “sega ni via vakabauta” na ka kecega sa vakavuvulitaka na ivolanikalou me baleta na tucaketale. Ia ni rau sa veivosaki tiko ka veitarogi, “sa toro voleka ko Jisu ka lako vata kei rau. “A sa matabuawataki na matadrau me rau kakua ni kilai koya. (Raica na Luke 24:13–34.)

Au vakadinadinataka ni da lakova na sala ni veiqaravi vakamatabete, e lako vata kei keda na iVakabula ko Jisu Karisito, ni oqo na Nona sala, Nona ivakarau. Ena liutaki keda na Nona rarama, ka ra vakavolivoliti keda na Nona agilosi. Eda na sega beka ni kila taucoko sara na cava na matabete se na ivakarau me da cakacakataka kina me vakataki Koya. Ia kevaka eda vakarorogo vakavinaka ena veigauna oqori ni sa “katakata sara na [yaloda]” (Luke 24:32), ena rawa ni dolavi na matada, ka da na raica na Ligana ena noda bula kei na noda veiqaravi. Au vakadinadinataka ni na yaco me da kilai Koya vakavinaka duadua ni da cakacaka vata kei Koya ka qaravi Koya ena cakacaka cecere ni veivakabulai vei ira na luve ni Kalou. “Ia ena kila vakaevei na tamata na nona turaga ka sega ni bau qarava, ka sega ni kilai koya se nanumi koya se lomana?” (Mosaia 5:13). Sa noda iVakavuvuli o Jisu Karisito. Oqo na Nona Lotu. Na Nona matabete eda taura tu. Me da digitaka yadua me da lako vata kei Koya ka kila na ivakarau e lako kina vata kei keda o Koya.

Au vakadinadinataka vei kemuni ni o Jisu na Karisito, na noda iVakabula ka Dauveivueti. Au vakadinadinataka vei kemuni ni matabete sa vakabauti keda kina o Koya sai koya na kaukauwa me da vosa ka cakacaka ena Yacana. O keda na luvena e dua na Tama Vakalomalagi dauloloma ka dau sauma na noda masu ka tala mai na Yalo Tabu me vaqaqacotaki keda ena itavi kece vakamatabete eda vakalougatataki me da ciqoma. A raici rau na Tamana kei na Luvena o Josefa Simici. A ciqoma o koya na idola ni matabete ka sa soli yani vei Peresitedi Monson, ka sa vakayagataka tiko nikua. Au sa vakadinadinataka oqo ena yaca i Jisu Karisito, emeni.