2010–2019
“Au sa Laiva Vei Kemudou na Noqu Vakacegu”
Epereli 2017


“Au sa Laiva Vei Kemudou na Noqu Vakacegu”

E yalataka na Kalou na vakacegu vei ira na Nona tisaipeli ni sa vakarau mai biuti iratou. E sa yalataka tale ga o Koya vei keda na yalayala vata oqori.

Kemuni na ganequ lomani, eda sa vakalougatataki ena Yalo ni Kalou ena bogi nikua. Na nodra itukutuku veivakauqeti na iliuliu marama kaukauwa kei na sereivakatagi e sa mai vaqaqacotaka na noda vakabauta ka sa mai vakalevutaka na noda gadreva meda maroroya tiko na veiyalayalati tabu eda sa cakava vua na Tamada Vakalomalagi dauloloma. Eda mai vakila ni sa tubu na noda lomana na Turaga o Jisu Karisito kei na vakavinavinaka ena isolisoli lagilagi ni Nona solibula veisorovaki.

Na noqu itukutuku ena bogi nikua e tukutuku rawarawa. Eda sa vakila kece na vakacegu ena bogi nikua. Eda dau via vakila kece vakawasoma na vakacegu oqori e lomada, ena noda vuvale, kei ira tale ga na wavoliti keda. E yalataka na Kalou na vakacegu vei ira na Nona tisaipeli ni sa vakarau mai biuti iratou. E sa yalataka tale ga o Koya vei keda na yalayala vata oqori. Ia, a kaya o Koya ena solia vei keda na vakacegu ena Nona sala, ka segai ena sala vakavuravura. A vakamatatataka o Koya na Nona sala ni vakauta na vakacegu:

“Ia na Dauveivakacegui, na Yalo Tabu, ko koya ena tala mai ko Tamaqu e na yacaqu, ena vakavulici kemudou ena ka kecega kau a vosataka vei kemudou.

“Au sa laiva vei kemudou na vakacegu, au sa solia vei kemudou na noqu vakacegu; au sa sega ni solia vei kemudou me vaka sa solia o vuravura. Me kakua ni rarawa na yalomudou se rere.” (Joni 14:26–27).

Eratou a gadreva talega na vakacegu vata oqori o iratou na luvei Mosaia ena nodratou ilesilesi vakaulotu vei ira na Lemanaiti. E ratou a mai vakasamataka toka vakabibi ni ratou sa kila na vakaitamera ni nodratou itavi, ka ratou sa qai masuta na veivakadeitaki. Ka sa “sikovi ira na Turaga ena Yalona, ka kaya vei ira: Dou vakacegu. Ka ra sa kune vakacegu” (Alama 17:10; raica talega na Alama 26:27).

Eso na gauna, ena rawa ni o gadreva tu na vakacegu ni o sotava na veilecayaki kei na bolebole lelevu. Eratou a vulica na luvei Mosaia na ivakavuvuli vata ga a vakavulica na Turaga vei Moronai. E idusidusi vei keda kece: “Au sa vota vei ira na tamata na malumalumu vakayago me ra yalomalumalumu kina. Au sa solia vei ira na tamata na malumalumu me ra vakayalomalumalumutaki ira kina; ia sa rauti ira vinaka na tamata kecega era sa vakayalomalumalumutaki ira vei au na noqu loloma soli wale; ni kevaka era sa vakayalomalumalumutaki ira vei au, ka vakabauti au, au na qai vakayacora me vu ni nodra kaukauwa na veika malumalumu” (Ica 12:27).

A kaya o Moronai “niu sa rogoca na vosa oqo,” sa qai “vakacegu kina” (Ica 12: 29). E rawa talega ni veivakacegui vei keda kece. O ira era sega ni raica na nodra malumalumu era na sega ni toso ki liu. Na nomu kila na nomu malumalumu e veivakalougatataki, baleta ni na vukei iko mo yalomalumalumu tiko ga ka gole tiko ga vua na iVakabula. Na Yalo e sega walega ni vakalomavinakataki iko ia, o Koya e ivurevure tale ga ni cakacakataki ni kau mai na veisau ena Veisorovaki, ena kemu ituvaki. Sa Yaco me Qaqa na Veika Malumalumu.

Ena so na gauna ena bolei na nomu vakabauta mai vei Setani; a yaco kece oqo vei ira taucoko na tisaipeli i Jisu Karisito. Na nomu isasabai ki na ravuravu oqo o ya mo maroroya tikoga me nomu itokani na Yalo Tabu. Ena vosa vakaceguya na yalomu na Yalo. Ena muataki iko ki liu ena vakabauta o Koya. Ka na vakavotuya lesu mai o Koya na veigauna e liu o a vakila kina na rarama kei na loloma i Jisu Karisito.

Noda nanuma rawa sa ikoya e dua na isolisoli vakamareqeti e rawa ni solia vei keda na Yalo. O Koya ena “vakavulici kemudou e na ka kecega ka’u a vosataka vei kemudou.” (Joni 14:26). Na veivakananumi ena rairai dua beka na isau ni masu, dua na cakacaka vakalotu ni matabete, veivakadeitaki ni dua na ivakadinadina, se na gauna o a raica kina na liga ni Kalou ena nomu bula. Ena rairai yaco na siga o na gadreva kina na kaukauwa, ka na vakavotuya kina vei iko na Yalo na veivakauqeti vakayalo o a sotava ena soqoni oqo. Sa noqu masu ni na yaco na ka oqo.

Dua na veivakananumi e dau vakavotuya mai na Yalo vei au o ya e dua na soqoni ni sakaramede a caka ena dua na bolabola kaukamea mai Innsbruck, e Austria, ena vuqa na yabaki sa oti. E a tiko na bolabola kaukamea oqo ena ruku ni dua na gaunisala ni sitima ni vanua. E a tini vakacaca wale ga na dabe tiko kina, ena idabedabe kau. E ra a lewe levu cake na yalewa, eso na gone ka so era sa qase cake. Au raica ni tuturu na wai ni mata ni vakavinavinaka ni sa votai yani na sakaramede ki na ivavakoso lailai oqo. Au a vakila na nona loloma na iVakabula me baleti ira na yalododonu, vakakina o ira. Ia, au nanuma sara vakamatata na cakamana ni rarama e vakatawana mai na bolabola kaukamea, ka salavata mai kei na dua na yalo ni vakacegu. Sa bogi toka ka sega na katuba leka, ia a rarama tu na loma ni vale me vaka ga na rarama ni sigalevu tutu.

A tu vakalevu e kea na rarama ni Yalo Tabu ena yakavi o ya. Ia na katuba leka e dola me curu yani kina na rarama sai koya na nodra yalomalumalumu na Yalododonu, era gole mai vua na Turaga me ra kere veivosoti ki na nodra ivalavala ca ka yalataka me ra daunanumi Koya tikoga. A sega ni dredre ena gauna o ya meu nanumi Koya, kei na ivakananumi ni siga o ya a vakarawarawataka vei au meu nanumi Koya kei na Nona Veisorovaki ena veiyabaki e tarava. Na siga o ya sa mai yaco kina na iyalayala ena masu ni sakaramede ni na tiko ga kei keimami na Yalo ka a qai kauta mai na yalo ni rarama kei na vakacegu.

Me vakataki kemuni, au sa vakavinavinakataka tiko na vuqa na sala sa sikovi au mai kina na Turaga kei na Dauveivakacegui niu gadreva na vakacegu. Ia na Tamada Vakalomalagi e sega walega ni kauwai meda tiko vakacegu ia sa baleta talega na noda toro cake vakalomalagi. Na “Dauveivakacegui” sa dua ga na sala e vakamacalataki kina na Yalo Tabu ena ivolanikalou. Oqo e dua tale: “Ia oqo, e dina,e dina, au sa kaya vei iko, mo vakararavi ki na Yalo ka na veiliutaki ki na caka dodonu”(V&V 11:12). E dau vakavuqa, na veika vinaka ena muataki iko kina o Koya mo cakava, ena yaco mo vukea kina e dua me ciqoma na veivakacegui mai vua na Kalou.

Ena Nona vuku, sa vakasokomuni kemuni vata na Turaga ki na veisoqosoqo kei na veikalasi ena Nona Lotu. Sa vakayacora oqo o Koya me vakalevutaka na nomu kaukauwa mo caka vinaka. Ena loma ni veisoqosoqo oqo, o sa lesi ki na itavi eso me qaravi ira na tamata ena Vukuna. Me vakataka, ke o dua na goneyalewa, o na rairai kerei mai vei nomu bisopi se iliuliu ni Goneyalewa mo sikova e dua na iSakisaki e sa yaco me vaka eda vakatoka tu me “luluqa vakalotu.” O na rairai kilai koya vinaka cake mai vei bisopi se o iliuliu ni Goneyalewa. O na rairai kila ni sa lomaleqa tiko e vale se e koronivuli se koya ruarua oqo. Era na sega beka ni kila na nomu iliuliu na vuna era vakauqeti kina me ra kerei iko mo laki sikovi koya, ia e kila na Turaga, ka sa dusimaka tiko o Koya na cakacaka oqo ena veivakauqeti ni Yalona.

Na rawa-ka ena nomu sasaga ena rawa ga ena cakamana me veisau na yalomu kei na yalona na yalewa ko a talai mo lai vueta—ka na gadrevi kina na veitokani ni Yalo Tabu. Ena vakatara na Yalo mo laki sikova na iSakisaki e luluqa tiko me vaka sa raici koya tiko kina na Turaga. Sa kila tu o Koya na Turaga na yalona kei na yalomu, ka kila o Koya ni sa rawa me veisautaki na yalo. Sa rawa Vua me sikovi kemudrau ruarua ena Yalona me vakauqeta na yalomalumalumu, veivosoti, kei na loloma.

Sa rawa ki na Yalo me vakauqeta na vosa, caka vinaka, kei na vosota vakadede e gadrevi vei iko mo sureta lesu mai e dua na lami ki na qele ni sipi. Sa rawa Vua me tara na yalodra na qele ni sipi ena kalasi ni iSakisaki me ra lomana ka kidavaka na sipi a yali, ena gauna sa lesu mai kina, ka na vakila o koya ni sa lesu bula mai vale.

Na nomu kaukauwa mo caka vinaka vakailawalawa luvena yalewa na Kalou, ena vakatau vakalevu, ki na ivakatagedegede ni duavata kei na loloma e tiko ena kemuni maliwa. Oqo e dua tale na isolisoli ni vakacegu e lako mai vua na Yalo Tabu.

A kila vinaka o Alama na ka oqo. Oqo na vuna a vakamasuti ira kina na nona tamata “me ra kakua ni veileti vakai ira, ia me ra vakanamata ki liu ena mata e duabau ka me duabau ga na vakabauta ka duabau ga na papitaiso, me semati na lomadra ena duavata kei na veilomani vakataki ira” (Mosaia 18:21).

E sa bibi kina na duavata me dau tiko kina na Yalo ena noda kalasi kei na matavuvale. Ia au kila mai na veika au sa sotava, ni duavata ena loloma vakaoqo e dau dredre me yaco tiko ga. Ena rawa ga ni sa noda itokani na Yalo Tabu me vakamalumutaka na yaloda ka dolava na matada.

Au nanuma ena dua na gauna a ladelade vakaukauwa tiko na luvei keirau tagane, yabaki vitu se walu ena nona idavodavo kau nanuma ni na kamusu. Au vakila ni sa tekivu meu cudru, kau mani toso totolo sara yani meu vakadodonutaka na ituvaki ni noqu vale. Au a qumia na tabana lalai ka laveti koya cake me veisotari na matai keirau.

E a vosa mai na Yalo ki na noqu vakasama. E vaka na domo laiali, ia e suaka na yaloqu: “O sa taura tu oqori e dua na tamata qaqa.” Au a biuti koya sobu vakamalua ena loga ka kere veivosoti.

Ia oqo sa mai yaco me dua na tamata cecere a vakatara na Yalo Tabu meu raica ena 40 na yabaki sa oti. Au sa vakavinavinaka tawamudu vua na Turaga ni a vakabulai au mai na yalo ca o ya ena nona vakatala mai na Yalo Tabu meu raica e dua na luve ni Kalou me vaka e raica o Koya.

Na duavata eda vakasaqara ena noda matavuvale kei na loma ni Lotu ena yaco mai ni da vakatara na Yalo Tabu me cakacaka ki na veika ni da veiraici—ka vakakina ni da vakananumi ira kei keda. Na Yalo e dau raica na ka ena loloma uasivi i Karisito. Vakarogoca na vosa e a vakayagataka o Momani me vakamacalataka na loloma uasivi. Vakananuma mada na veigauna o a vakila kina:

“Sa dauvosota vakadede na loloma uasivi, sa yalovinaka, sa sega ni vuvu, sa sega ni vakalevulevui ira, sa sega ni qara na ka me nona ga, sa sega ni vakacudrui vakarawarawa, sa sega ni dauloma ca, ka sega ni rekitaka na caka cala, ia sa rekitaka ga na dina, sa vosota na ka kecega, sa vakabauta na ka kecega, sa vakanuinuitaka na ka kecega, sa vosota na ka kecega.

“O koya oqo, oi kemudou na wekaqu [kau tomana, kei na ganequ] lomani, kevaka sa sega vei kemudou na loloma uasivi, dou sa ka wale ga, ni sa sega ni mudu na loloma uasivi. O koya mo dou kubeta matua kina na loloma uasivi ni sa ka cecere duadua sara vei ira kecega ni na mudu mai na ka kecega—

“Ia na loloma uasivi sa i koya na loloma taucoko i Karisito ka sa ia tikoga ka sega ni mudu; ka na vinaka vei koya sa kunei ni sa tu vua ena siga mai muri.

“O koya oqo oi kemudou na wekaqu [kei na ganequ] lomani, mo dou masuta na Tamada ena yalomudou taucoko me vakasinaiti kemudou ena loloma oqo, io na loloma ka sa solia vei ira era sa muria na Luvena ko Jisu Karisito ena yalodina, mo dou yaco kina mo dou luve ni Kalou; ia ni sa rairai mai ko Koya, eda na tautauvata kaya, ni da na raica na matana dina; ia me da rawata na inuinui oqo ka vakasavasavataki me vaka sa savasava ko Koya.” (Moronai 7:45–48).

Sai koya oqo na inaki sa solia vei iko na Tamada mai Lomalagi, kivei kemuni na luvena yalewa vakamareqeti. E rairai vaka me lalawa balavu toka vei kemuni, ia ena Nona nanuma, o sega ni yawa mai kina. Sa na dau sikovi iko mai ena Nona Yalo me vakacegui iko, vakayaloqaqataki iko, ka vakauqeti iko mo toso tikoga ki liu.

Au sa laiva vei kemuni na noqu ivakadinadina ni sa kilai iko na Tamada—kila na nomu gagadre kei na yacamu—lomani iko, ka dau rogoca na nomu masu. E sa sureti iko tiko na Luvena Lomani mo lako mai Vua. E rau sa tala mai na Yalo Tabu me mai tiko kei iko ena nomu sasaga mo qaravi ira na tani ena Vukudrau.

Baleta na Veisorovaki i Jisu Karisito, na veitokani sega ni veisau ni Yalo Tabu ena vakasavasavataka ka vakatabuya na yalomu. O na vakila na vakacegu e a yalataka na iVakabula me biuta tu vei ira na Nona tisaipeli. Ena gole vata mai na vakacegu e dua na inuinui serau kei na vakilai ni rarama kei na loloma mai vua na Tamada kei na Luvena Duabau ga, o Koya ka liutaka tiko na Nona matanitu e vuravura ena ivakatakila vei Nona parofita bula. Au vakadinadinataka ena yaca tabu i Jisu Karisito, emeni.