2010–2019
Keitou na Lako Vei Cei?
Okotova 2016


Keitou na Lako Vei Cei?

Ena kena itinitini, oi keda yadua meda na sauma yani na taro ni iVakabula: “Dou sa via lako tani talega koi kemudou?”

Ena vica na yabaki sa oti keitou a gole yani vakamatavuvale ki na Vanua Tabu. Dua vei ira na ka au se nanuma vinaka tiko na laki sikova na taba ni vale e cake e Jerusalemi, na vanua dina a caka kina na iOtioti ni Kana Vata.

Ni keitou tucake tu ena vanua o ya, au a wilika sara vei iratou na Joni 17, na vanua a vakamamasu kina o Jisu vei Tamana baleti iratou na Nona tisaipeli:

“Au sa masulaki ira … mera duabau ga me vakataki kedaru. …

“Ia kau sa sega ni masu ena vukudra walega oqo, ia ena vukudra talega era na vakabauti au ena vuku ni nodra vosa;

“Mera duabau kecega, me vaka daru sa duabau Tamaqu, mera duabau kei kedaru.”1

A luluvu sara na yaloqu niu a wilika na vosa oqori kau raica niu sa qai masu ena vanua tabu o ya meu na duabau kei na noqu matavuvale vata kei na Tamaqu Vakalomalagi vata kei na Luvena.

Na noda veimaliwai talei kei na noda matavuvale, itokani, kei na Turaga, kei na Nona Lotu sa vakalesuimai sa so vei ira na veika sa bibi dina ena noda bula. Baleta ni veimaliwai oqo sa ka bibi sara, sa dodonu meda vakamareqeta, taqomaka, ka susuga cake.

Dua vei ira na italanoa vakamosi yalo ena ivolanikalou a yaco ena gauna ni “le vuqa vei ira na tisaipeli [ni Turaga] ” era sega ni ciqoma rawa na Nona ivakavuvuli kei na vunau, ka so era sa “suka tani kina a ra sa sega tale ni lako vata kaya.2

Ni ra sa gole na tisaipeli oqo, a rai yani o Jisu vei iratou na Tinikarua ka taroga, “Dou sa via lako tani talega koi kemudou?”3

A sauma mai o Pita:

“Kemuni na Turaga, keitou na lako vei cei? Sa tu ga vei kemuni na vosa ni bula tawamudu.

“Ia keitou sa vakabauta ka kila ni sai kemuni na Karisito na Luve ni Kalou bula.”4

Ena gauna o ya, ni ra se vakasamataka tiko o ira na kena vo na ka era na sega ni ciqoma rawa, e ratou sa lewa kina na iApositolo me ratou raica matua ga na ka e ratou sa vakadinata ka kila, ka yaco kina, me ratou tiko vata ga kei na Karisito.

E muri, ena Siga ni Penitiko, e ratou a taura kina na Tinikarua na isolisoli ni Yalo Tabu. E ratou sa tutaka vakaqaqa na nodratou vakadinadinataka na Karisito ka tekivu me kila vinaka vakalevu na veivakavulici i Jisu.

E sega ni duidui ena siga nikua. Kivei ira eso, na veisureti i Karisito mera vakadinata ka tiko ga kina e se dredre tiko ga—se dredre me ciqomi. Eso na tisaipeli a dredre mera kila vinaka e dua na lawa se ivakavuvuli ni Lotu. Eso era vakalewa na keda itukutuku makawa se nodra malumalumu eso na lewenilotu kei na iliuliu, ena gauna sa oti kei na gauna oqo. Se tiko eso era raica ni sa ka dredre mera tiko ena dua na lotu e sa rui levu na ka e vinakati kina. Kena iotioti, eso era sa “oca ena cakacaka vinaka.”5 Ena vuku ni kena oqo kei na so tale, eso na lewe ni Lotu sa veilecayaki tiko na nodra vakabauta, ka ra vakataroga tiko mera na muri ira beka era sa “suka tani ka sega tale ni lako vata kaya ” kei Jisu.

Ke dua vei kemuni sa luluqa tiko na nona vakabauta, au na taroga vei iko na taro nei Pita: “[Mo] na lako vei cei?” Kevaka o sa digitaka mo luluqa vakalotu se biuta na Lotu i Jisu Karisito ni Yalododonu Edaidai, o na lako vei cei? Cava o na cakava? Na lewa mo “sega tale ni lako vata kaya” kei ira na lewe ni Lotu kei ira na iliuliu digitaki ni Turaga ena rawa me balavu na kena revurevu ka sega ni raici rawa ena gauna oqo. Era na tiko beka eso tale na vunau, ivakavuvuli, so na itukutuku makawa ena vakamamadataka na nomu vakabauta, ka rairai nanuma beka ni sala duadua ga me wali kina na lomaleqa oqo ena gauna oqo o ya mo sa “sega tale ni lako vata kaya ” kei ira na Yalododonu. Kevaka o na bula balavu vakataki au, ena yaco mo kila ni veika eso sa tiko na kena sala vakai ira mera wali kina. Ena rawa ki na dua na veivakararamataki vakayalo se ivakatakila era na veivakararamataki ki na dua na ulutaga. Nanuma tiko, na Vakalesuimai a sega ni ka sa caka oti, ia e na cereki tiko ga mai.

Kakua ni biuta na dina cecere a vakatakilai vei Parofita Josefa Simici. Kakua ni tao na nomu wiliwili, vakasama titobu, kei na nomu bulataka na ivakavuvuli i Karisito e tiko ena iVola i Momani.

Kakua ni guce me tiko nomu gauna vinaka kei na Turaga ena sasaga vakaidina mo kila vinaka na veika sa vakatakila mai na Turaga. Me vaka a kaya o noqu itokani vinaka ka lewe ni cakacaka vata e liu o Elder Neal A. Maxwell, “Meda kakua ni nanuma wale tu ga … ena vuku ga ni so na ka e sega ni vakamacalataki rawa mai vei keimami sa sega sara ni vakamacalataki rawa.”6

Koya gona ni ko vakarau digidigi rerevaki vakayalo mo sa suka tani, au sa vakauqeti iko mo tu mada vakadua ka vakasama sara vakavinaka ni bera ni ko vakasuka na veika a vakavuna na nomu ivakadinadina baleta na Lotu vakalesuimai i Jisu Karisito ena imatai ni gauna. Tu vakadua ka vakasamataka na veika o sa mai vakila eke kei na vuna o a vakila kina. Vakasamataka mada na veigauna a vakadinadinataka kina vei iko na Yalo Tabu na ka dina tawamudu.

Evei na vanua ko na laki raici ira kina eso era vakabauta vata kei iko na noda iTubutubu Vakalomalagi vakatamata yadua ka dauloloma, e rau vakavulici keda meda lesu rawa ena Nodrau itikotiko serau?

Evei na vanua mo na laki vakavulici kina baleta na iVakabula na nomu itokani vinaka duadua, o koya a vakararawataki sega walega baleta na nomu ivalavala ca ia a sotava talega na “ka rarawa, na veivakararawataki kei na veivakatovolei kecega” me “sa mai bula vakatamata ko Koya me kila kina na nodra malumalumu na nona tamata, ka vakabulai ira ena nona yalololoma,”7 oka kina, niu sa vakadinata na malumalumu ni kena yali na vakabauta?

Evei na vanua mo na laki vulica vakalevu kina na ituvatuva nei Tamada Vakalomalagi baleta na noda bula marau tawamudu kei na vakacegu, na ituvatuva sa sinai tu kina na veimadigi totoka, veivakavulici, kei na veidusimaki baleta na bula oqo kei na bula tawamudu? Nanuma tiko, na ituvatuva ni veivakabulai e solia ki na bula oqo me vakaibalebale cake, vakainaki, kei na idusidusi.

Evei na vanua mo na kunea kina na ituvatuva matailalai vakauqeti vakayalo ni yavu ni Lotu o na vakavulici kina ka tokoni mai vei ira na turaga kei na marama era sa yalodina tu ena qarava na Turaga ena nodra qaravi iko kei ira nomu matavuvale?

Evei na vanua mo na laki raici ira kina na parofita bula kei na iapositolo, era sa kacivi mai vua na Kalou me solia vei iko e dua tale na ivurevure ni ivakasala, kila vinaka, vakacegu, kei na veivakauqeti ena vuku ni noda bolebole ni veisiga?

Evei na vanua mo na laki kunei ira kina na tamata era bula voli ena dua na ivakatagedegede ni yavunibula kei na ivakatagedegede sa tu vei iko ka gadreva mo vakadewataka yani vei iratou na luvemu kei na makubumu?

Kei na vanua cava o na lako mo laki vakila kina na reki e lako mai na cakacaka vakalotu kei na veiyalayalati ni veivakabulai ena valetabu?

Taciqu kei na ganequ, na noda ciqoma ka bulataka na kosipeli i Karisito ena rawa ni bolei keda. Sa dau vakatu mai oqori, ka na dau yaco tikoga mai. Na bula e na rawa me vakataka na kaba ulunivanua e babacake ka dredre sara. Sa kena ivakarau tudei meda dau cegu mada vakalailai e sala meda cegu mada kina, meda dikeva mada na ilakolako, ka raica na noda totolo. E sega ni gadrevi meda cegu taucoko e sala, ia e sega ni ka cala meda cakava ke sa gadrevi vakakina. Na kena dina, sa rawa me ka dodonu vei ira era na vakayagataka na madigi taucoko mera vakabulabulataki ira ena wai ni bula ni kosipeli i Karisito.

Na ka rerevaki ena yaco o ya ni dua sa digitaka me sa lako tani mai na sala sa mua ki na vunikau ni bula.8 So na gauna eda rawa ni vulica, wilika, kila, ka so na gauna eda na vakadinata, vakabauta, ka nuitaka.

Ena kena itinitini, oi keda yadua meda na sauma yani na taro ni iVakabula: “Dou sa via lako tani talega koi kemudou?”9 Sa dodonu meda vakasaqara na noda dui isaunitaro o ya. Kivei ira eso, e rawarawa na kena isau; vei ira eso, e dredre toka. Au sega ni vakalecalecava meu kila na vuna e lako rawarawa cake mai kina vei ira eso na vakabauta me vakadinata. Au vakavinavinaka niu sa kila ni sa tiko na isaunitaro, ke da vakasaqara yani—vagumatua ena yalodina kei na taucoko ni kena inaki ena yalo masumasu—eda na yaco ga meda kunea na isau ni noda taro ni da tomana tiko na sala ni kosipeli. Ena noqu cakacaka vakaitalatala, au sa kilai ira era a kuitaki yani ka lesu bula mai ni oti na nodra vakatovolei ni vakabauta.

Au sa nuitaka vakaidina ni da na sureti ira mai e vuqa na luve ni Kalou mera kunea ka tiko ga ena sala ni kosipeli me rawa talega mera “mai kania na vuanikau, sa kamikamica duadua [sara] ve ira na vuanikau kecega.”10

Sa vakamamasu ni yaloqu ni da na vakayaloqaqataka, ciqoma, kila vinaka, ka lomani ira era sasaga bula tiko ena nodra vakabauta. Meda kakua ni vakawaleni ira na tacida kei na ganeda oqo. Eda sa dui lako tiko oqo ena sala, ka dodonu meda veiqaravi yani vakai keda.

Me vaka ga ni da dau dedeka yani na ligada ni yalo ni veikidavaki vei ira na curuvou mai, sa vakakina meda ciqoma ka tokoni ira era lomatarotaro tiko ka luluqa tiko na nodra vakabauta.

Ni da vakayagataka e dua na vosa vakatautauvata, sa noqu masu kivei ira era sa nanuma tiko mera biuta na “Waqa Makawa i Saioni,” sa veiliutaki tiko kina na Kalou kei na Karisito, mera tu vakadua mada ka vakasama vakavinaka sara ni bera ni cakava.

Yalovinaka mo ni kila tiko ni kevaka e ravuta mai na waqa makawa oqo na cagilaba kei na biau lelevu, na iVakabula sa tiko ena loma ni waqa ka rawa vua me vunauca na cagi rerevaki ena Nona ivakaro, “Mo cegu, mo maravu mai.” Me yacova na siga oqori, meda kakua ni rere, ka dodonu me kakua ni yamekemeke na noda vakabauta ka meda kila tiko “ni sa talairawarawa vua na cagi kei na wasawasa.”11

Taciqu kei na ganequ, au yalataka vei kemuni ena yaca ni Turaga ni na sega vakadua ni biuta na Nona Lotu ka na sega vakadua ni biuta e dua vei keda oqo, Mo nanuma tiko na vosa nei Pita me isau ni taro kei na vosa ni iVakabula:

“Keitou na lako vei cei? Sa tu ga vei kemuni na vosa ni bula tawamudu.

“Ia keitou sa vakabauta ka kila, ni sai kemuni na Karisito, na Luve ni Kalou bula.”12

Au vakadinadinataka ni sa “sega tale ni dua na yaca se na sala se ivakarau sa soli me ra bula rawa kina na luve ni tamata, na yaca duadua ga i Karisito.”13

Au sa vakadinadinataka talega ni o Jisu Karisito sa kacivi ira na iapositolo kei na parofita ena noda gauna oqo ka vakalesuamai na Nona Lotu kei na kena ivakavuvuli kei na ivakaro me sa “idrodro ka ivakaruru mai na cava, kei na cudru waqawaqa” ni na yaco dina mai vakavo ga kera veivutuni na kai vuravura ka lesu Vua.14

Au vakadinadinataka talega ni Turaga sa “kacivi ira kecega mera lako mai vua ka vakaivotavota e na nona loloma, ka sa sega ni bureitaka vua e dua sa lako mai vua; io na tamata loaloa kei na tamata vulavula, na bobula kei na itaukei, tagane kei na yalewa; … ia era sa tautauvata kece ga ena mata ni Kalou.”15

O Jisu sa noda iVakabula ka Dauveivueti, kei na Nona kosipeli vakalesuimai ena liutaki keda meda taqomaki lesu vei rau na noda iTubutubu Vakalomalagi kevaka eda tiko ga ena sala ni kosipeli ka muria tiko na mawe ni yavana. Sa noqu ivakadinadina kina oqo ena yaca i Jisu Karisito, emeni.