2010–2019
Na iLumu Veivakabulai ni Veivosoti
Epereli 2016


Na iLumu Veivakabulai ni Veivosoti

Na veivosoti e dua na ivakavuvuli lagilagi ka veivakabulai. E sega ni gadrevi me da coko kina vakarua. E rawa ni da veivosoti

Na veika e vu mai vua na Kalou ena kune kina na loloma, na rarama, kei na dina. Ia ni da tamata eda bula tiko ena dua na vuravura sega ni taucoko, ena so na gauna e sinai tu ena butobuto kei na veilecayaki. Ena sega kina ni kidacalataki ni yaco na cala, so na ka ena sega ni dodonu, ka vakayacori na ivalavala ca. O koya ena yaco kina, me sega ni dua na tamata bula ena sega, ni dua na gauna me na sotava na vakacaca ni nona sakulevu, itovo ca, se ivalavala ca sara mada ga e dua tale. Oqori e dua na ka eda na tautauvata kina.

E vakavinavinakataki kina na Nona loloma na Kalou me baleti keda na Luvena, sa vakarautaka kina e dua na sala me vukei keda ena noda sokota na veigauna dredre vakaoqo ena noda bula. Sa vakarautaka ko Koya e dua na sala me ra dro kina o ira kece e dau kedra na isamu ni dawa ni nodra cakacala eso tale. Sa vakavulici keda o Koya ni rawa ni da veivosoti! Rairai eda sa coko oti beka vakadua, me da kakua ni coko tale ena noda kubuta voli na icolacola ni veicati, veisevaki, mosi, yaloca, se na via veisausaumi. E rawa ni da veivosoti, ka rawa ni da galala!

Ena vuqa na yabaki sa oti, niu vakavinakataka tiko e dua na bai, a curuma noqu iqaqalo e dua na memenikau lailai. Au a tovolea ga vakalailai meu kauta laivi na memenikau lailai kau nanuma ni sa rawa, ia kena irairai ni a sega. Ni toso na gauna, a tubu na kuliniyago ka ubia na memenikau lailai, qai vuce tu noqu iqaqalo. E veivakasosataki ka mosi ena so na gauna.

Ena vica na yabaki i muri au sa mani nanuma meu cakava kina e dua na ka. Na ka ga au qai cakava, au lumuta na vuce ena dua na ilumu ka vadretitaka. Au cakava vakavica na iwalewale oqo. O na sega ni vakasamataka rawa noqu kurabui ena dua na siga niu qai sereka na ivadreti, sa basika tu na memenikau lailai mai na noqu iqaqalo.

Sa vakamalumutaka na kuliniyago na ilumu ka cakava e dua na idrodro ni ka a vakavuna tu vei au na mosi ena vicavata na yabaki. Ni kau laivi ga na memenikau, sa mamaca vakatotolo na noqu iqaqalo, me yacova nikua, e sega tale ni dua na imawe ni mavoa.

E tautauvata na kena dau bikai tu ena mosi levu sega ni gadrevi na yalo sega ni veivosoti. Ni da lumuta ena ilumu veivakabulai ni nona Veisorovaki na iVakabula, ena vakamalumalumutaka o Koya na yaloda ka vukei keda me da veisau. E rawa ni vakabula o Koya na yalo e mavoa (raica na Jekope 2:8).

Au vakabauta ni vuqa vei keda e vinakata me veivosoti, ia sa rui dredre meda cakava. Ni dua na ka tawadodonu e yaco vei keda, ena totolo beka noda kaya, “Na tamata oya e cala. E dodonu me totogi. Sa evei na lewa dodonu?” Eda dau nanuma cala ni kevakaeda veivosoti, ena sega ni yaco na lewa dodonu ka na levei na itotogi.

E sega ni vakakina. Ena tauca na Kalou na itotogi ka na dodonu vinaka, ni sega ni rawa ni butakoca na lewa dodonu na loloma (raica Alama 42:25). Sa vakadeitaka ena loloma vei kedaru na Kalou: “Raica sai au ga sa lewa, ia kau na sauma talega. [Ia me] nomudou na vakacegu” (V&V 82:23). Sa yalataka talega na parofita ni iVola i Momani o Jekope ni na “vakacegui kemudou ko Koya ena nomudou rarawa ka na totaki kemudou ka cudruvi ira era sa segata me vakacacani kemudou” (Jekope 3:1).

Ni keda wale na isamu ni dawa, kevaka edayalodina, eda na kune vakacegu ni da kila ni na sauma vei keda na Kalou na veika sega ni dodonu kece eda sotava. E kaya o Elder Joseph B. Wirthlin: “Ena sauma vei ira na yalodina na Turaga na veika kece era vakayalia. … Na veiwainimata yadua nikua ena saumi lesu vakaduanadrau ena wainimata ni reki kei na vakavinavinaka.”1

Ni da segata me da vosoti ira na tani, me da tovolea talega me da nanuma ni da tubu kece tiko vakayalo, ia e duidui noda dui itagede. Ena rawarawa beka noda dikeva tiko na tubu kei na veisau ni yagoda, e dredre me da raica na tubu ni yaloda.

E dua na idola ni noda vosoti ira na tani sai koya me da tovolea me da raici ira me vaka na nona raici ira na Kalou. Ena so na gauna, e rawa ni dolava na ilati na Kalou ka vakalougatataki keda ena isolisoli me da raica na utona, lomana, kei na yalona e dua tale na tamata a vakacudrui keda. Na rai oqori e rawa ni vakavuna e dua na loloma vuabale me baleta na tamata oya.

E vakavulica vei keda na ivolanikalou ni taucoko na nona loloma na Kalou vei ira na Luvena. E kila na veika vinaka era rawa ni rawata, veitalia na veika era sa cakava oti. Ena veitukutuku kece sara, e sega tale ni dua na kedra meca levu na daumuri Jisu Karisito me vakataki Saula mai Tasisi. Ia ena gauna e vakaraitaka kina vei Saula na rarama kei na dina na Kalou, a sega tale ni dua na tisaipeli ni iVakabula me yalodina, gugumatua, ka yaloqaqa cake. A yaco o Saula me iApositolo ko Paula. Na nona bula sa ivakaraitaki vakasakiti ni sala e raici ira kina na tamata na Kalou sega walega ena kedra ituvaki oqo ia ena ituvaki talega e rawa ni yaco mera vakataka. E dui tu kece ena noda bula na tamata vakataki Saula ka rawa ni yaco me vakataki Paula. E rawa beka ni da raitayaloyalotaka na kena rawa ni veisau na noda matavuvale, itikotiko, kei na vuravura taucoko kevaka eda tovolea kece me da veiraici me vaka nona raici keda na Kalou?

Sa vakavuqa noda dau raica e dua e cakacala ena ivakarau eda raica kina na waicevata—eda raica walega na tikina lailai e cake ka sega ni raica na rukuna. Eda sega ni kila na veika kece e yaco tiko ena nona bula e dua na tamata. Eda sega ni kila na nodra bula e liu; eda sega ni kila na nodra dredre; eda sega ni kila na mosi era colata tu. Kemuni na taciqu kei na ganequ, yalovinaka ni kakua ni nanuma cala. Na veivosoti e sega ni veivakadonui. Eda sega ni vakadonuya na itovo ca se vakatarai ira tale e so me ra vakacacani keda me baleta nodra sotavi dredre, mosi, se malumalumu. Ia e rawa ni da rawata na kilaka kei na vakacegu levu cake ni da raica vakarabailevu.

E dina sara o ira era sega soti ni matua vakayalo e rawa ni ra cakava na cala bibi—ia e sega ni dodonu me dua vei keda e vakatakilai duadua ga mai na veika ca eda sa cakava. Na Kalou ga sa turaganilewa uasivi. O Koya sa raica na rukuna. O Koya sa kila na ka kece ka raica na ka kece (raica na 2 Nifai 2:24). A kaya o Koya, “Ia, koi au na Turaga, au na vosoti ira ga kau sa lewa, ia koi kemudou sa kilikili mo dou vosota na tamata kecega” (V&V 64:10).

Na Karisito vakataki Koya, ena gauna e beitaki kina vakatawadodonu, ka vakararawataki vakaca, vakanakuitataki, ka vakararawataki tu ena kauveilatai, ena gauna vata oqori qai kaya, “I Tamaqu, kakua ni cudruvi ira; ni ra sa sega ni kila na ka era sa kitaka” (Luke 23:34).

Ena lekaleka ni noda rai, ena so na gauna eda na raici ira vakatani eso ka ra sega ni ivalavala se vakasama vakataki keda. Eda na tara cake beka eso na itovo ni bula veivakaduiduitaki yavutaki ena so na ka me vaka na tokoni voli ni timi ni qito veisaqa e so, ile duidui vakapolitiki, se duidui ni vakabauta vakalotu.

E veivakasalataki vakayalomatua kina o Peresitedi Russell M. Nelson ena nona kaya, “Na madigi me da rogoci ira ka duidui na nodra vakabauta vakalotu se ile vakapolitiki sa rawa ni taracake na dauvosota kei na vuli.”2

E tukuna na iVola i Momani e dua na gauna “era sa rarawataka na nodra dokadoka ka viavialevu na lewe ni lotu, … raica era sa veiqati vakaiira … ia era sa cati ira era sa sega ni duavata kei na nodra lewa” (Alama 4:8). Me da nanuma kece tiko na Kalou e sega ni raica na roka ni siqeleti ni qito se ilawalawa vakapolitiki. Ia, me vaka na vosa nei Amoni, “[Na Kalou] sa tiko mai cake ka raici ira sobu mai na luve ni tamata, a sa kila na nanuma ni lomadra” (Alama 18:32). Kemuni na taciqu kei na ganequ, ena veisisivi ni bula oqo, kevaka eda qaqa, me da qaqa ena loloma soliwale. Kevaka eda druka, me da druka ena loloma soliwale. Ni kevaka eda bula veimaliwai vakataki keda ena loloma soliwale, ena noda icocovi ena siga mai muri na loloma soliwale.

Me vaka ni dau keda na isamunidawa ni nodra cakacala eso tale ena dua na gauna, ena so talega na gauna sai keda eda cakacala. Eda na yacokoso taucoko ka da gadreva na loloma soliwale, loloma cecere, kei na veivosoti. Sa dodonu me da nanuma ni na vakatau na kena vosoti noda ivalavala ca kei na cakacala ena noda vosoti ira tale eso. E kaya na iVakabula:

“Ia kevaka dou sa sega ni cudruvi ira na tamata sa caka cala, ena sega talega ni cudruvi kemudou na Tamamudou vakalomalagi:

“Ia kevaka dou sa cudruvi ira na tamata sa cakacala, ena cudruvi kemudou talega ena vuku ni nomudou cakacala na Tamamudou” (Maciu 6:14–15).

Ena veika kece a rawa ni cavuta na iVakabula ena Masu ni Turaga, ka lekaleka wale, e talei ni nanuma o Koya me cavuta “Ia kakua ni cudruvi keimami ena vuku ni neimami ivalavala ca, me vaka keimami sa sega ni cudruvi ira era sa ivalavala ca vei keimami” (Maciu 6:12; 3 Nifai 13:11).

Na veivosoti sara ga na vuna e tala mai kina na Luvena na Kalou, o koya me da reki ena Nona lomasoli me vakabulai keda kece. Na Veisorovaki ni iVakabula e sega ni baleti ira walega era gadreva me ra veivutuni; sa baleti ira talega era gadreva me ra veivosoti. Kevaka o lomaleqa voli ni vosota tiko e dua tale na tamata se o iko sara ga, kerea na Kalou me vukei iko. Na veivosoti e dua na ivakavuvuli lagilagi ka veivakabulai. E sega ni gadrevi me da coko kina vakarua. E rawa ni da veivosoti.

Au vakadinadinataka na nona loloma veivosoti na Kalou kei na Nona dauvosota ena vukuda kece na Luvena kei na Nona gagadre me da veilomani me vaka Nona lomani keda (raica Joni 15:9, 12). Ni da vakayacora vakakina, eda na curu basikata na butobuto ni vuravura oqo ki na lagilagi kei na vakaturaga ni Nona matanitu mai lomalagi. Eda na galala. Ena yaca i Jisu Karisito, emeni.

iDusidusi

  1. Joseph B. Wirthlin, “Se Cava ga E Yaco Mai, Taleitaka,” Liaona, Nove. 2008, 28.

  2. Russell M. Nelson, “Listen to Learn,” Ensign, Me 1991, 23.