Na Sakaramede—na Vakavoui ni Yalo

Era a tarogi au e dua na ilawalawa goneyalewa, “Na cava mada o a diva tu mo kila ni o se yabaki vata kei keimami?” Kevaka meu na sauma na taro o ya nikua, au na okata na vakasama oqo: “Au diva niu se vakataki kemuni meu sa kila vakavinaka cake na bibi ni sakaramede mai na kena o ya. Au diva meu a kila vakavinaka na sakaramede ena sala a vakamacalataka kina o Elder Jeffrey R. Holland. A kaya, ‘E dua vei ira na veisureti e umani tiko ena cakacaka tabu ni sakaramede o ya me sa ka vakayalo dina, e dua na veiyaloni vakalou, ka vakavoui ni yalo.’¹”

Ena rawa vakacava na sakaramede me “dua na ka vakayalo vakaidina, me dua na veiyaloni vakalou, ka vakavoui ni yalo” ena veimacawa?

Ena yaco na sakaramede me dua na veivaqaqacotaki vakayalo ni da vakarorogo ki na masu ni sakaramede ka vakadeitaki keda ki na noda veiyalayalati. Me caka oqo, e dodonu me yaloda na taura na yacai Jisu Karisito.² Na yalayala oqo, e vakavulica kina o Peresitedi Henry B. Eyring: “Sa kena ibalebale meda raici keda ni da sa Nona. Eda na vakaliuci Koya tiko ena noda bula. Eda na vinakata na ka e vinakata o Koya sega ni ka eda vinakata se na veika e vakavulica o vuravura meda vinakata.”³

Ni da taura na sakaramede, eda sa veiyalayalatitaka meda “daunanumi”⁴ Jisu Karisito. Ena bogi ni se bera Nona lauvako e kauveilatai, a vakasoqoni ira vata mai Vua na Nona iApositolo ka qarava na sakaramede. A dovia na madrai, masulaka, ka kaya, “Taura, kania; oqo na ivakananumi ni yagoqu au sa solia me kemudou ivoli.”⁵ Tarava nona taura e dua na bilo waini, vakavinavinakataka, ka solia vei iratou na Nona iApositolo me ratou gunu, ka kaya, “Oqo na noqu dra ni veiyalayalati … , sa liviraki ena vukudra e lewe vuqa era sa vakabauta na yacaqu.”⁶

Ena kedra maliwa na Nifai vakakina ena Vakalesuimai ni Nona Lotu ena gauna oqo, a tokaruataka ni dodonu meda taura na sakaramede meda nanumi Koya kina.⁷

Ni da sa votai ena sakaramede, eda sa vakadinadinataka vua na Kalou ni da na daunanuma na Luvena, sega walega ena gauna lekaleka ni cakacaka tabu ni sakaramede. E kena ibalebale oqo ni da na raimatua tikoga ki na ivakaraitaki kei na veivakavulici ni iVakabula me dusimaka na noda vakasama, noda digidigi, kei na itovo.⁸

Na masu ni sakaramede e vakavotuya vei keda ni dodonu meda “muria na vunau.”⁹

E kaya o Jisu, “Kevaka dou sa lomani au, dou talairawarawa ki na noqu vunau.”¹⁰ Na sakaramede sa noda madigi meda ilova na lomada vakakina meda vagolea na yaloda kei na lewa vua na Kalou. Na talairawarawa ki na vunau e kauta mai na kaukauwa ni kosipeli ki na noda bula kei na vakacegu cecere kei na bula vakayalo.

Na sakaramede sa gauna ni kila vakayalo ni da raica na kaukauwa veivueti qaqa ni iVakabula mai na Nona Veisorovaki. A kila e dua na iliuliu ni Goneyalewa na kaukauwa eda ciqoma ni da saga meda vakasamataka vakabibi ni da votai ena sakaramede. Ena nona cakacakataka me vakacavara na Torocake Yadudua, a lalawataka me raica matua na vosa ni sere ni sakaramede kei na kena masu.

Ena veimacawa, e dau ilova na lomana ena gauna ni sakaramede. E dau raicalesu na cala a cakava, ka guta me vinaka cake ena macawa e tarava. A marautaka na nona rawata me vakatudonutaka na veika eso ka vakasavasavataki. Ni railesuva na veika a yaco, a kaya, “Au a cakava tiko na tiki ni veivutuni ni Veisorovaki.”

Dua na Sigatabu ni oti nona ilovi koya ga, sa tekivu me luluqa ka yalolailai. A raica ni cakava ka cakava tale na cala vata oya, ena veimacawa. Ia a qai yaco me vakauqeti na yalona ni a cakitaka tiko na tiki levu ni Veisorovaki—kaukauwa qaqa i Karisito. Sa guilecava taucoko tiko o koya ni a vukei koya na iVakabula me vakataka na kena ituvaki a gadreva ka cecere sara nona veiqaravi vakaikoya.

Ni sa nanuma tiko oqo, a raicalesu tale o koya na macawa sa oti. A kaya: “E basikata na yaloqu rarawa e dua reki levu niu raica sa solia mai o Koya e vuqa na madigi kei na gugumatua. Au raica ena vakavinavinaka noqu gugumatua meu vakila na gagadre vakagone ni a sega ni ka bibi. Au raica ena siga eso niu sa sega tale ni rawa meu toso ki liu, au a rawa ni vakayaloqaqataka e dua na itokani. Au a vosota na gauna eso e dau yaco na kena veibasai vei au.”

A tinia: “Niu mai vakavinavinakataka tiko na kaukauwa qaqa ni iVakabula ki na noqu bula, au vakila meu yaloqaqataka na veivutuni au sa cakava tiko kau raica yani na macawa e tarava ena inuinui vakavoutaki.”

E vakavulica o Elder Melvin J. Ballard ni sakaramede e rawa ni yaco kina na veivakabulai kei na veivakasavasavataki. A kaya:

“O cei kivei keda oqo a sega ni vakamavoataka na yalona ena vosa, vakasama, se itovo, mai na Siga ni Vakacecegu kina kena e tarava? Eda cakava na ka eda veivutunitaka ka gadreva meda vosoti. … Na sala meda vosoti kina o ya … meda veivutunitaka noda ivalavala ca, meda gole kivei ira eda valavala ca kina se caka cala ka vakavinakataka ki na teveli ni sakaramede, ke da veivutuni vakaidina kina ka biuti keda vakadodonu, eda na vosoti, ka yaco na veivakabulai vakayalo ki na yaloda. …

“Au ivakadinadina,” e kaya o Elder Ballard, “ni tiko e dua na yalo e veiqaravi tiko ena sakaramede e vakatakatara na yalo mai na buradelada ki na yavada; ko na vakila ni sa vakabulai na mavoa ni yalo, ka kau tani na icolacola. E yaco na vakacegu kei na marau ki na yalo e kilikili ka gagadre dina me kania na kakana vakayalo.”¹¹

Na yaloda e mavoa ena rawa ni vakabulai ka vakavoutaki sega walega ena vuku ni madrai kei na wai e vakavotuya mai na solibula ni iVakabula ni Yagona kei na dra ia ena vuku talega ni ivakatakilakila e vakavotuya vei keda ni sai Koya tikoga na noda “madrai bula”¹² kei na “wai bula.”¹³

Ni oti na nona qarava na sakaramede vei ira na Nifai, a kaya o Jisu:

“Ko koya yadua sa kania na madrai oqo, sa kania na lewequ; kei koya sa gunuva na waini oqo, sa gunuva na noqu dra, ia ena sega ni via kana se via gunu, ni sa vakamamautaki.

“Ia, ni ra sa kana ka gunu kece na lewe vuqa, era sa vakasinaiti ena Yalo Tabu.”¹⁴

Ena malanivosa oqo, sa vakavulica vei keda na Karisito na Yalotabu e vakabula ka vakavoutaka na yaloda. Na veivakalougatataki yalataki ni sakaramede o ya ni na “tiko ga kei [keda] na nona Yalo Tabu.”¹⁵

Niu kania na sakaramede, au dau raitayalotaka e dua na droini e vakatakarakarataka na iVakabula sa tucaketale ni dedeka tu na ligana, me vaka sa vakarau tu me ciqomi keda ki na Nona imoko loloma. Au taleitaka na droini oqo. Niu dau vakasamataka ena gauna ni qaravi ni sakaramede, e laveti cake na yaloqu me vaka au sa rogoca na vosa ni iVakabula: “Raica, sa dodo tu yani vei kemudou na ligaqu dauloloma, ia ko koya yadua sa lako mai vei au, au na vakabula, ia sa kalougata ko ira sa lako mai vei au.”¹⁶

O ira na Matabete i Eroni era matataka tiko na iVakabula ni ra vakarautaka, masulaka, ka vota na sakaramede. Ni gauna e dedeka kina e dua na lewe ni matabete na ligana me solia vei keda na ivakatakilakila, sa vaka sara ga ni sa dodoka tiko yani na iVakabula na ligana loloma veivueti, ka sureti keda yadua meda taura na isolisoli talei ni loloma e yaco mai na Nona solibula veisorovaki—o ya na isolisoli ni veivutuni, veivosoti, veivakacegui, kei na inuinui.¹⁷

Na levu ga ni noda tugana na bibi ni sakaramede, ena yaco me cecere ka vakaibalebale cake ki na noda bula. Oqo na ka a kaya e dua na tamani gone yabaki 96 ni tarogi koya o luvena tagane, “Ta, na cava o laki lotu tiko kina? O sega tu ni rai rawa, o didivara, e dredre vei iko mo veilakoyaki. Na cava o laki lotu tiko kina?” A sauma mai o tamana, “Na sakaramede. Au gole meu laki kania na sakaramede.”

Me da sa qai gole yani ki na soqoni ni sakaramede ka vakavakarau me “sa ka vakayalo dina, e dua na veiyaloni vakalou, e dua na veivakavoui ni yaloda.”¹⁸

Au kila ni bula tiko na Tamada Vakalomalagi kei na noda iVakabula. Au sa vakavinavinaka ki na madigi ni sakaramede e vakarautaka meda vakila na Nodrau loloma ka vakani ena Yalotabu. Ena yaca i Jisu Karisito, emeni.