Karisito na Dauveivueti

Ni vakadruka na mate ena Nona kaukauwa e dua tale na ivakarau vakalou. E vakamamasu o Jairo Cecere, na turaga ni valenilotu “me lako ki na nona vale: ni sa duabau ga na luvena yalewa, … a sa voleka ni mate” (Luke 8:41–42). Sa rogoca na nona kerekere na iVakavuvuli, ni ratou se veivosaki tiko, sa yaco mai e dua na tamata i Jairo ka kaya vua, “Sa mate na luvemu yalewa; kakua ni vakaocataka na iVakavuvuli” (Luke 8:49). Ni sa curu ki vale o Jisu, sa kerei ira yadua mera gole i tuba, ka totolo sara, me taura na ligai goneyalewa, a kaya vua, “Duri cake!” (Luke 8:54).

E dua tale na gauna, a gole tiko ki na koro o Neini, a sotava sara e dua na ilakolako ni mate, ka sa tagicaki luvena tagane duabulu o tinana yada. Ni sinai tu ena loloma veivueti, a tara na tavata ka kaya, “Ko iko na cauravou, au sa kaya vei iko, Tu cake” (Luke 7:14). Ni ra sa raica na tamata na cakamana, era sa kaya, “Sa qai tubucake vei keda e dua na parofita levu; a sa … lako mai na Kalou kivei ira na nona tamata” (Luke 7:16). Na cakamana oqo e bibi cake vakalevu baleta ni ra sa vakadeitaka na tamata ni sa mate vakaidina o cauravou ka mera sa laki buluti koya. Ni rau sa vakabulai mai na mate e rua na itabagone, na ivakadinadina ni Nona lewa kei na kaukauwa e vakadruka na mate era kurabui kina na tamata vakabauta ka yaco na rere vei ira era daucati Koya.

Na ikatolu ni gauna a kurabuitaki sara vakalevu. E ratou veiganeni o Maca, o Meri, kei Lasarusa ka dau sikovi iratou vakawasoma na Karisito. Ni ra sa tukuna na tamata Vua ni sa tauvimate o Lasarusa, a tiko tale me rua na siga ni se bera ni qai biuta me lako ki na matavuvale. Ni vakacegui Maca tiko ni oti na mate nei ganena, a kaya vakamatata vua, “Oi au na vu ni tucake tale, kei na vu-ni-bula: ko koya sa vakabauti au, kevaka sa mate; ena bula ga” (Joni 11:25).

Na gauna sa kerea kina na iVakabula vei ira na vakaloloku tiko mera vaqiqica laivi na vatu, a kaya yani vakamalua Vua o Maca, “Kemuni na Turaga, sa na bona ko koya: ni sa qai bogi va na nona mate” (Joni 11:39).

A qai kaya vua o Jisu ena yalololoma, “Au a sega li ni kaya vei iko, ni ko na raica na kaukauwa ni Kalou, kevaka ko sa vakabauta?” (Joni 11:40). Ni sa tukuna oti na veika oqo, a qai kaci ena domolevu,

“Lasarusa lako mai.

“Ia ko koya ka mate sa lako mai?” (Joni 11:43–44).

Ni oti e va na siga nei Lasarusa ena ibulubulu, era sa vakaogai na meca ni Luve ni Kalou ena dua na ivakadinadina sega ni rawa ni lasutaki era sega ni rawa ni vagolea laivi, vakawalena, se vakacacana, ka ra sa veiseseyaki ka vakatani “mai na siga ko ya … era sa qai bosei koya me ra vakamatea” (Joni 11:53).

E muri, a laki marautaka na Karisito mai Jerusalemi, vata kei iratou Nona iApositolo, na iotioti ni Kana Vata ni Lakosivia, tauyavutaka na cakacaka vakalotu ni sakaramede, ka solia vei iratou na ivakaro me ratou veilomani ena veiqaravi dina.

Ni oti o ya, ena ivakaraitaki titobu ni Nona loloma baleta na kawatamata, kei na taucoko ni Nona lewa, ka lako yani ena qaqa ka doudou me sotava na veivakatovolei e gadrevi. Ena Were o Kecisemani, ena galili dina, a vakararawataki vakabibi sara, ka tekivu me bunotaka na dra. Nona sa mai soli koya taucoko vei Tamana, a sorovaka na noda ivalavala ca ka taura vei Koya na noda malumalumu kei na rarawa me rawa ni kila me vukei keda vakacava (raica na Alama 7:11–13).

Eda sa dinau tu Vua vakakina vua na Tamada Vakalomalagi baleta na Nona solibula sa mai vakalougatataki keda kece, mai vei Atama, na isevu, ki na iotioti ni tamata kecega.

Ni sa mai cava na nona vakararawataki e Kecisemani, a soli Koya yani kivei ira sa via vakamatei Koya. A bukiverataki mai vua e dua na itokani, sa vinakati me vakamatei, ena sala e cala ka sega ni vakalawa, ena veilewai e veivakasaurarataki ka veicalati. Ena bogi tiko ga o ya a beitaki ena cala ni vosavakacacataka na Kalou ka me sa vakamatei. Ni ra sa cudru ka gadreva dina mera veivakamatei—baleta ni kaya o Koya ni Luve ni Kalou—era sa bukiveretaki Koya vei Pailato me vakamatei Koya. E vakavuna o ya, mera sa veisautaka na ka e beitaki kina mai na vosavakacacataka na Kalou ki na dauvakacaca me rawa ni vakoti mate ena kauveilatai.

Na Nona vakacacani mai vei ira na kai Roma a ca sara vakalevu: nodra veivakalialiai kei na veivakasewasewani baleta Nona matanitu vakayalo, nona vakamaduataki ena sala vakatui ena wa vakavotona, na rarawa ni Nona kanakuitataki, kei na mosi balavu ni Nona vakoti ena kauveilatai e sa veivakaroti matata vua e dua e via tukuna ni Nona tisaipeli.

Ena veiminiti ni Nona vakararawataki, a vakaraitaka na Dauveivueti kei vuravura na vosota cecere sa tu Vua. Sa dau nanuma tu ga me vakalougatataki ira na tamata; ena yalololoma kei na lomavinaka, a vakamasuti Joni me raici tinana, o Meri. A kerei Tamana mai Lomalagi me vosoti ira sa totogitaki Koya mera vakamatei Koya. Ni sa mai oti Nona cakacaka e vuravura, a solia na Yalona vua na Kalou ka solia na iotioti ni nona icegu. A kau na yagona na Karisito ki na ibulubulu ka tiko e kea me tolu na siga.

Ena gauna e ratou sotava tiko kina na Nona tisaipeli na rarawa, yalolailai, kei na veilecayaki, ena dua tale na ituvaki ni ituvatuva lagilagi nei Tamana a tomana tale kina na iVakabula na Nona cakacaka vakalotu ena dua na sala vou. Ena loma ni tolu walega na siga, a cakacaka vagumatua me tauyavutaka na cakacaka levu ni veivakabulai ena kedra maliwa na mate. Na tolu na siga oqori a yaco me siga namaki nuitaki duadua vei ira taucoko na matavuvale ni Kalou. Ena veisiko o ya a tauyavutaki ira Nona tisaipeli yalodina me rawa ni ra kauta na itukutuku ni veivueti kivei ira a sega ni yaco vei ira, se a cakitaka e vuravura mera kila na ituvatuva lagilagi. Ia oqo me nodra na madigi mera sa sereki mai na nodra vesuki tu ka mera vueti mai vua na nodra Kalou na bula kei na mate (raica na V&V 138:19, 30–31).

Ni sa mai taucoko na Nona cakacaka ena vuravura ni yalo, a lesu tale ki vuravura—me laki cokoti vata na Yalona kei na Yagona me tawamudu. E dina ga ni a vakaraitaka na Nona kaukauwa mai na mate, na kedra itukutuku vakaivolanikalou a vakabulai ira mai na mate ni bera Nona Tucake Tale a vakaraitaka ni ra sa lesu tiko ga ki na dua na bula sa mana tu mai na kena vakabalavutaki; ia era na mate tale mada.

Na Karisito a isevu ni tucake tale ka sa sega tale ni mate, me Nona e dua na yago sa uasivi sara ka tawamudu. Ena ituvaki ni Nona tucake tale, a rairai vei Meri, ka kilai koya sara, ka sa cuva sara Vua. Na noda Dauveivueti, ena lomavinaka, a vakaroti koya me baleta na Nona ituvaki vou ka lagilagi: “Kakua ni tarai au; niu sa bera ni lako cake vei Tamaqu” (Joni 20:17) ka sa ivakadinadina talega ni Nona cakacaka vakalotu ena vuravura ni yalo a yaco dina ka taucoko. E muri, ena nona tukuna na veivakadeitaki ni dina na Nona Tucake Tale, a kaya, “Au sa lako cake vei koya na Tamaqu, ka Tamamudou; vei koya sa noqu Kalou, ka nomudou Kalou” (Joni 20:17). Ni sa lako vei Tamana, a lesu tale mai ka rairai vei iratou Nona iApositolo; “sa vakaraitaka vei ira na ligana kei na sarisarina. A ra sa qai reki na tisaipeli, ni ra sa raica na Turaga” (Joni 20:20).

Au vakadinadinataka ni na lesu mai na Karisito ena sala e duatani sara mai na kena imatai. Ena lako mai ena kaukauwa kei na lagilagi vata kei ira na Yalododonu savasava ka yalodina. Ena lako mai ni sa Tui ni tui ka Turaga ni turaga, ka Tui ni Sautu, na Mesaia sa yalataki, na iVakabula ka Dauveivueti, me lewai ira na bula kei na mate. Au lomani Koya ka qaravi Koya mai vu ni yaloqu, kau kerea meda veiqaravi ena reki kei na gugumatua ka yalodina tikoga Vua me yacova na ivakataotioti. Ena Yacana, o Jisu Karisito, emeni.