Vauca na Nodra Mavoa

Eda sa vakalougatataki taucoko ena itavi me baleti ira na tamata. Ni da lewena na matabete ni Kalou sa noda itavi kina vua na Kalou na nodra bula tawamudu o ira na Luvena. Oqori na ka dina, oqori na ka totoka, ka so na gauna e dau ulabaleti keda na ka oqo.

Era tiko na peresitedi ni kuoramu ni italatala qase era vakarorogo tiko ena bogi nikua era kila na ibalebale ni ka au tukuna tiko. Oqo na ka a yaco vua e dua vei kemuni. Sa rairai yaco ki na vuqa vei kemuni—ena vica toka na gauna. E rairai duidui na ka a yaco, ia e tautauvata ga na kedra ituvaki.

A kerea na nomu veivuke e dua na italatala qase o sega ni kilai koya vakavinaka. Sa raica o koya ni sa dodonu me tokitaki watina kei luvena tagane lailai mai na vale e ratou vakaitikotiko kina ki na dua tale na vale toka voleka.

Rau sa kerea oti vakaveiwatini vua e dua na nodrau itokani e dua na lori me rau usana kina ena siga o ya na nodrau iyaya ni vale kei na veika rau taukena. A solia na itokani na lori me rau vakayagataka. Sa tekivu vakavodoka o tama ni gone vou oqo na nodratou iyaya taucoko ki na lori, ia ena vica walega na miniti, a tamoi na dakuna. A osooso sara o nona itokani me mai veivuke. Sa nuiqawaqawa sara o tama ni gone vou oqo. Sa vakasamataki iko sara mai, ni o nona peresitedi ni kuoramu ni italatala qase.

Ni qai mai kere veivuke, sa tekivu me yakavi. Sa siga tiko ni dua na soqoni ni Lotu ena yakavi. O sa yalataka oti tu mo na vukei watimu ena cakacaka ni vale ena siga o ya. E ratou sa kerea oti tu na gone mo cakava vei iratou e dua na ka, ia se bera tiko ni o cakava.

O sa kila talega ni o iratou na lewe ni nomu kuoramu, vakabibi o iratou sa dau gugumatua tiko, o iratou o dau kaciva mera veivuke, e kena irairai ni ratou ogaoga talega vakataki iko ena gauna o ya.

Sa kila tu na Turaga ni na yaco vei iko na veisiga vakaoqo ena gauna a kacivi iko kina ki na itutu oqo, sa solia kina o Koya vei iko e dua na italanoa me vakayaloqaqataki iko. Oqo e dua na vosa vakatautauvata vei ira na lewe ni matabete vakacakacakataki vakalevu. Eda vakatoka ena so na gauna me italanoa ni kai Samaria vinaka. Ia sa italanoa dina ni dua na lewe ni matabete cecere ena iotioti ni gauna osooso, ka dredre oqo.

E veisotari vinaka na italanoa oqo me baleti koya na matabete italai osooso sara. Mo nanuma tiko ni o iko na kai Samaria ka sega ni o koya na bete se Livai a lako sivita na tamata a davo mavoa koto.

O na rairai sega beka ni vakasamataka na italanoa oqo ni ko sotava na veiibolebole vakaoqo. Ia sa noqu masu ni ko na vakasamataka ni ra yaco mai na gauna vakaoqori, ni ra na yaco dina ga mai.

E sega ni tukuna vei keda na ivolanikalou na vuna a lako tiko kina na kai Samaria e gaunisala mai Jerusalemi ki Jeriko. A sega ni taubale duadua tiko o koya, ni rairai sa kila tu o koya na nodra waraki ira tu na tamata dau lako welewelei tu e kea na daubutako. A gole tiko vakacakacaka o koya, ka sa nona ilesilesi, sa vakacolati tu ena ogaoga vakakina na waiwai kei na waini.

E kaya na Turaga ni gauna sa raica kina na tagane sa mavoa tu, na kai Samaria oqo, a tu vakadua baleta ni “sa lomana sara.”

E sega walega ni nona yalololoma a vakavuna nona veiqaravi. Mo ni nanuma tiko na veika matailalai a yaco:

“A sa lako mai [o koya], ka vauca na tikina sa mavoa, ka livia kina na waiwai kei na waini, ka vakavodoka ki na nona manumanu, ka kauta ki na bure ni vulagi, ka qaravi koya kina.

“Ia ena mataka ni sa lako tani, sa taura e rua na pene, ka solia vua na itaukei ni bure, ka kaya vua, Mo vakaraici koya; ia na ka tale ko na kuria, au na sauma vei iko niu sa lako tale mai.”¹

O iko kei ira na lewe ni matabete ko ni sa kacivi mo ni veiliutaki, sa rawa mo ni ciqoma e tolu na veivakadeitaki taumada oqo. iMatai, ena solia na Turaga vei kemuni, kevaka ko ni na kerea, na yalo ni loloma sa dau lomani ira kina na vakaleqai o Koya. iKarua, sa na vakarautaki ira eso, me vakataka na itaukei ni bure, me duavata kei iko ena nomu veiqaravi. Kei na ikatolu, na Turaga, me vakataki koya na kai Samaria vinaka, ena saumi ira vakalevu cake o ira kece era a duavata mai ki na nodra vukei na vakaleqai.

Oi kemuni na peresitedi ni kuoramu ko ni sa rairai vakayacora beka vakavica na veivakadeitaki oqori. Ko ni sa kerei ira tiko na matabete ni Turaga mera veivuke, ena yalonuidei era na vakaio mai ena yalololoma. O a sega ni rere mo kerei ira era sa dau vakaio taumada tiko baleta ni o kila tu ni ra sa dau yalololoma vakarawarawa. O ni a kerei ira, ni ko kila ni ra sa vakila oti na loloma ni Turaga ni ra digitaka mera veivuke. O sa kerei ira era vakaogai tu vakalevu, ka kila ni cecere cake na nodra solibula, ena cecere cake na kedra isau era na ciqoma mai vua na Turaga. O ira era sa veivuke oti ena veigauna e liu era sa vakila na sovaraki mai ni ivakavinavinaka ni iVakabula.

O na rairai vakauqeti beka mo kakua ni kerea e dua me mai veivuke ena kena vakavodoki ka vakasoburi na usana ni lori o ya. Ni ko sa iliuliu ko sa na kilai ira vinaka na nomu lewe ni kuoramu kei na nodra dui matavuvale. Na Turaga e kilai ira tiko vakavinaka.

E kila tu o Koya na marama vakawati sa voleka ni vakaleqai na nona vakasama baleta ni sega ni rawa vei watina me taura e dua na gauna me cakava na veika e gadreva me qaravi kina na veika e vakaleqai tiko kina. E kila tu o Koya na gone eso era na vakalougatataki ni ra raici tamadra ni ra baci gole tale mera vukei ira na tamata se kevaka era gadreva tu na gone na yalololoma era vinakata mai vei ira na tamadra me mai vakayagataka e dua na gauna vata kei iratou ena siga o ya. Ia e kila talega o Koya o cei e gadreva tu me sureti me mai veiqaravi ia ena sega ni vakakina se yalona dina.

O na sega ni kilai ira vakavinaka taucoko sara na lewe ni nomu kuoramu, ia na Kalou duadua ga. Mo qai, me vaka ko sa dau vakayacora tu mai vakawasoma, masu mo kila o cei mo na kerea me laki vukei ira na tamata. Sa kila tu na Turaga o cei ena vakalougatataki ni sa kerei me veivuke vakakina na matavuvale ena vakalougatataki ni sega ni kerei. Oqori na ivakatakila o na namaka me na yaco mai vei iko ni ko veiliutaki tiko ena matabete.

Au a raica ni yaco oqo niu a se cauravou. Au a imatai ni ivukevuke ena kuoramu ni bete. Ena dua na siga a gole yani vei au i vale o bisopi. A kaya ni vinakata meu tomani koya me keirau laki sikova e dua na vada e gadreva vakabibi me vukei. E kaya o koya ni gadrevi au.

Niu waraki koya tiko e vale me mai kauti au, au sa lomaleqa. Au kila ni rau tamata qaqa ka vuku sara oi rau na nona daunivakasala. E dua e turaganilewa rogo levu. Na kena ikarua e tiko na nona kabani levu ka sa na vakarau dua na Vakaitutu Raraba. O bisopi vakai koya ena rawa me dua na Vakaitutu Raraba ena dua na siga. Na cava na vuna e kaya kina o bisopi vua e dua na bete vou, “Au gadreva na nomu veivuke”?

Ia, au sa qai kila oqo na ka a rawa ni kaya vei au: “E gadreva na Turaga me vakalougatataki iko.” Ena loma ni vale nei koya na yada, au raici koya, ena kurabui ni kaya vua na marama ni na sega ni vukei koya na Lotu me yacova ni sa vakalewena na fomu ni tuvailavo sa solia oti vua. Ena ilakolako lesu i vale, ni raica na levu ni noqu kurabui, a dredre ka kaya mai, “Hal, ena gauna sa lewa vinaka kina na nona vakayagataki ilavo, sa qai rawa ni vukei ira na tamata.”

Ena dua tale na gauna a kauti au o bisopi ki na dua nodrau vale e dua na itubutubu daugunu ka rau tala mai e rua na goneyalewa lalai ririko me rau mai sotavi keirau ena katuba. Ni oti na nona sikovi rau na goneyalewa lalai oqo, keirau sa mua lesu ka kaya mai vei au, “Eda na sega ni veisautaka rawa na ca ena nodra bula ena gauna oqo, ia sa rawa mera vakila ni lomani ira tiko na Turaga.”

Ena dua tale na yakavi a kauti au ki na nona vale e dua na turaga sa vakayabaki na nona sega tu ni mai lotu. A kaya vua o bisopi ni lomani koya vakalevu ka sa gadrevi koya tiko na tabanalevu. E vaka me sega ni yavalati kina na turaga oqo. Ia na gauna o ya, kei na veigauna taucoko e dau kauti au kina o bisopi, sa dau vakauqeti vakalevu na yaloqu.

E sega ni rawa meu kila a masu beka o bisopi me kila o cei na bete ena vakalougatataki ni sala vata kei koya ena veisiko oqori. E vuqa na gauna a rawa vua me kauta eso tale na bete. Ia sa kila vinaka tu na Turaga ni dua na siga au na yaco meu bisopi ka sureti ira era sa batabata voli mera lesu mai ki na katakata vinaka ni kosipeli. Sa kila tu na Turaga ni na dua na siga au na vakacolati ena itavi ni matabete me baleta e drau ka udolu na luvena na Tamada Vakalomalagi era gadreva vakalevu dina na veivuke vakayago.

Oi kemuni na cauravou ko ni sega ni kila rawa na cakacaka cava ni veiqaravi ni matabete sa vakarautaki iko tiko kina na Turaga mo laki vakayacora. Ia na ibolebole levu cake ki na lewe ni matabete yadua o ya me solia na veivuke vakayalo. Sa tu vei keda taucoko na ilesilesi oqori. E rawa oqo ni ko lewena na kuoramu. E rawa oqo ni ko lewe ni matavuvale. Kevaka e valuti mai vei Setani na nona vakabauta e dua ena nomu kuoramu se matavuvale, ko na vakila na yalololoma. Me vakataka ga na veiqaravi kei na loloma soli wale nei koya na kai Samaria, ko na qaravi ira talega ena waiwai ni veivakabulai ki na nodra mavoa ena gauna ni nodra kere veivuke.

Ena nomu veiqaravi vaka-daukaulotu tudei, ko na gole yani ki na udolu na tamata era gadreva tu na veivuke vakayalo cecere. E vuqa, me yacova ni ko sa vakavulici ira, era na sega ni kila ni ra mavoa tu vakayalo, sega ni vauci, ena kauta mai na yalorarawa tawamudu. O na gole ni sa talai iko na Turaga mo laki vueti ira mai. Na Turaga duadua ga ena rawa ni vauca na nodra mavoa vakayalo ni ra ciqoma na cakacaka vakalotu e veimuataki yani ki na bula tawamudu.

Ni ko lewe ni kuoramu, dauveituberi ni vuvale, ka dua na daukaulotu, ena sega ni rawa mo vukei ira na tamata me vakavinakataki na nodra vakacacani vakayalo vakavo ga ke sa kaukauwa vinaka tu na nomu vakabauta. Sa kena ibalebale ni sega ni rauta na wilika na ivolanikalou ka masulaki ira tiko. Na veimasulaki e vakayacori kei na ilova vakatotolo na ivolanikalou e sega ni vakavakarau taucoko. Na veivakadeitaki ni veika o na gadreva sai koya na ivakasala mai na 84 ni wase ni Vunau kei na Veiyalayalati: “Dou kakua ni lomaocaocataka na ka mo dou kaya; ia mo dou vulica ka nanuma matua tiko na noqu ivakavuvuli; raica ena qai vakavotui mai e na kena gauna na ka me tukuni me ganiti ira na tamata yadua.”²

Na yalayala oqo ena rawa ga ni tauri kevaka eda “nanuma matua” na vosa ni bula ka vakayacora tikoga. Na nanumi matua ni ivolanikalou o ya e kena ibalebale vei au na yalo ni dua na ka e baleta na vosa oqori. Me kena ivakaraitaki, niu dau gole yani meu laki vukea e dua sa lomalomaruataka tiko na nona vakabauta na veikacivi vakalou nei Parofita Josefa Simici, e lesu mai vei au na yalo oqori.

E sega walega ni vosa e tadu mai na iVola i Momani. Sai koya na yalo veivakadeitaki ni dina e dau yaco mai ena gauna au dau wilika e vica na tikina mai na iVola i Momani. Au na sega ni yalataka ni na rawa me yaco vei ira na tamata yadua era vakaleqai tiko ena vakatitiqataka na Parofita o Josefa Simici se na iVola i Momani. Ia au kila ni o Josefa Simici na Parofita ni Veivakalesuimai. Au kila ni sa vosa ni Kalou na iVola i Momani baleta niu sa vakamareqeta sara.

Au kila mai na veika au sotava ni sa rawa me vakadeitaka na Yalotabu vei iko na ka dina baleta ni a yaco vei au. O iko kei au me daru vakadeitaki vakaoqo ni bera ni biuti kedaru yani na Turaga vua e dua sa dauveilakoyaki e daru lomana sa vakamavoataki tu mai vei ira na meca ni ka dina.

E tiko tale e dua na vakavakarau me da cakava. Sa itovo tu ni tamata me sogolati koya mai na nodra rarawa eso tale. Oqori e dua na vuna e lomasoli vakalevu kina na iVakabula me tukuna na Nona Veisorovaki kei na Nona taura Vua na nodra mosi kei na rarawa na luvena taucoko na Tamada Vakalomalagi me kila kina o Koya na sala me vukei ira kina.

O ira mada ga na lewe ni matabete yalodina nei Tamada Vakalomalagi era sega sara ni yacova vakarawarawa na ivakatagedegede ni yalololoma vaka o ya. Sa noda ivakarau meda dau sega ni vosoti ira tiko na tamata era sega ni raica na dina sa matata sara tu vei keda. Me da qarauna me kakua ni nanumi ni noda yalototolo oqori e veivakacacani se veicacati.

Ni da vakavakarau meda vukea na Turaga ni da sa Nona italai matabete, e tiko e dua na ivolanikalou me na vukei keda. E tiko kina e dua na isolisoli eda na gadreva ena noda ilakolako, ena vanua cava ga e talai keda kina na Turaga. A tiko vua na kai Samaria vinaka na isolisoli o ya. Eda na gadreva dina, ka sa tukuna vei keda na Turaga na sala meda na kunea kina:

“Ia koi kemudou na wekaqu lomani, kevaka sa sega vei kemudou na loloma, dou sa ka walega, raica sa sega ni mudu na loloma. Ia, mo dou kabita na loloma, ni sa uasivi sara, ka ni na mudu mai na ka kecega—

“Ia sa vu mai vei Karisito na loloma sa uasivi sara, ka sa ia tikoga ka sega ni mudu; ia sa kalougata ko koya sa kunei vua na loloma oqo e na siga mai muri.

“Oi kemudou na wekaqu lomani, mo dou masuta na Tamada e na yalomudou taucoko me vakasinaiti kemudou ena loloma oqo, io na loloma sa solia vei ira era sa muria na Luvena ko Jisu Karisito e na yalodina, mo dou yaco kina mo dou luve ni Kalou; ia ni sa rairai mai ko Koya, eda na tautauvata kaya, ni da na raica na matana dina; ia meda rawata na inuinui oqo ka vakasavasavataki me vaka sa savasava ko Koya.”³

Sa noqu masu ni da na vakavakarau meda na vakayacora yani na veiqaravi cava ga ni matabete ena tuvanaka vei keda na Turaga ena noda ilakolako ena bula oqo. Ena yaca tabu i Jisu Karisito, emeni.