“Dou Lako Mai Vei Au”

Au vakavinavinaka niu mai tiko rawa kei kemuni ena koniferedi oqo ni Lotu i Jisu Karisito ni Yalododonu Edaidai. Oqo na Nona Lotu. Eda sa taura vei keda na Yacana ni da sa mai lewena na Nona matanitu. Sai Koya na Kalou, na Dauniveibuli, ka sa uasivi sara. Oi keda eda sa tamata ga eda na mate ka ivalavala ca. Ia na Nona loloma vei keda kei na noda dui matavuvale, sa sureti keda kina meda volekati Koya yani. Oqo na veika a cavuta: “Dou toro voleka mai vei au kau na qai toro voleka yani vei kemudou; dou vakasaqarai au vagumatua dou na qai kunei au; dou na kerekere ka na soli vei kemudou; dou tukituki ka na dolavi vei kemudou.”¹

Ena Siga ni Mate oqo eda na vakananuma kina na vuna eda sa lomani Koya kina kei na yalayala a vakayacora o Koya kivei ira na Nona tisaipeli yalodina mera sa Nona itokani lomani. A vakayacora na iVakabula na yalayala ka tukuna vei keda ni gauna, eda veiqaravi yani kina Vua, ena lako mai vei keda o Koya. E dua na kena ivakaraitaki o ya na ivakatakila vei Oliver Cowdery ena nona qarava tiko na Turaga vata kei Parofita Josefa Simici ena kena vakadewataki tiko na iVola i Momani: “Raica au sa vosa vei iko Oliver, ena vuku ni veika ko sa gadreva; ia mo tugana na noqu vosa ki lomamu. Mo yalodina ka gumatua ni muria sara na vunau ni Kalou; ia au na ovici iko ena noqu loloma.”²

E dau yaco vei au na reki niu toro voleka yani vua na iVakabula kei na Nona toro voleka mai vei au ena vuqa na gauna niu vakayacora na itovo lalai ni talairawarawa ki na ivakaro.

Sa yaco talega vakaoqo vei kemuni. Ena rairai beka ena gauna ko ni digitaka kina mo ni tiko ena dua na soqoni ni sakaramede. A yaco qo vei au ena dua na Siga ni Vakacecegu niu se gone lailai sara. Ena gauna o ya eda dau laki votai ena sakaramede ena soqoni ena yakavi. E votu vei au e dua na siga ena 65 na yabaki sa oti, ena noqu muria na vunau meu laki soqoni vata kei noqu matavuvale kei ira na Yalododonu, ka se vakavolekataki au tiko kina vua na iVakabula.

A buto ka batabata sara e tautuba. Au nanuma vinaka na kena totoka ka katakata vinaka na valenilotu ena yakavi oya vata kei rau na noqu itubutubu. Keitou a kana sakaramede, era qarava mai na lewe ni Matabete i Eroni, ka veiyalayalatitaka kei na Tamada Vakalomalagi me keimami dau nanuma na Luvena ka muria na Nona ivakaro.

Ni sa mai cava na soqoni keimami a lagata na sere “Mo ni Mai Tiko Ga kei Au; ’Ni sa Karobo Mai,” kei na qaqana e tiko kina “Turaga, mo ni tauri au.”³

Au a vakila na loloma kei na nona voleka mai na iVakabula ena yakavi o ya. Kau a vakila kina na veivakacegui ni Yalo Tabu.

Au gadreva meu vakacaudreva tale mada vakadua na yalo ni loloma ni iVakabula kei na Nona voleka au a vakila ena soqoni ni sakaramede o ya niu se gone kina. Ena dua na gauna lekaleka oti ga oqo au qai maroroya ga kina e dua tale na ivakaro. Au a vakasaqaqara ena ivolanikalou. E kea, au sa kila tu niu rawa ni lesu tale me vakayacora na Yalo Tabu meu vakila na veika erau a vakila na le rua na tisaipeli ni Turaga sa qai tucaketale ena gauna a vakaio kina o Koya ki na nodra veisureti me gole yani ki na nodra vale me laki tiko vata kei ira.

Au a wilika na veika e baleta na ikatolu ni siga ni oti na Nona lauvako e kauveilatai ka bulu. Era a lako mai eso na marama yalodina kei na so tale ka raica ni sa vaqiqici tani tu na vatu mai na ibulubulu ka sa sega e kea na Yagona. Era a lako mai ni ra lomani Koya ka me lumuta na Yagona.

Rau a tucake tu e kea e rua na agilosi ka taroga se cava na vuna era rere kina, ka kaya:

“E na cava dou sa mai vakasaqarai koya sa bula e na kedra maliwa na mate?

“Sa sega eke ko koya, sa tu cake tale: nanuma na nona vosa vei kemudou ni sa tiko kei kemudou mai Kalili,

“Ni sa kaya, Ena soli yani na Luve ni tamata ki na ligadra na tamata ca, ka na vakoti ki na kauveilatai, ka na tucake tale e na ikatolu ni siga.”⁴

Na Kosipeli i Marika e vakuria kina na veivakasalataki nei dua vei rau na agilosi: “Ia dou lako, tukuna vei ira na nona tisaipeli, vei Pita talega, ni sa liutaki kemudou ko koya ki Kalili: dou na raici koya kina, me vaka na nona vosa vei kemudou.”⁵

Era soqoni vata yani na iApositolo kei na tisaipeli e Jerusalemi. Me vaka ni dau yaco vei keda, era rere sara ka lomatarotaro voli ni ra sa mai veivosakitaka na kena ibalebale vei ira na Nona mate kei na itukutuku ni sa tucaketale o Koya.

E rua vei ira na tisaipeli rau a taubale ena yakavi o ya mai Jerusalemi ena gaunisala ki Emeo. A rairai mai ena gaunisala na Karisito sa tucaketale ka lako vata kei rau. Sa lako mai vei ira na Turaga.

Na ivola i Luke ena kauti keda meda lako vata kei iratou:

“Ia ni rau sa veivosaki tiko ka veitarogi, sa toro voleka ko Jisu, ka lako vata kei rau.

“A sa matabuawataki na matadrau me rau kakua ni kilai koya.

“A sa kaya vei rau ko koya, Ai tukutuku cava oqo drau sa veivosakitaka, ni drau sa lako tu, ka rau sa tu vakadua ka vakaveveku mata?

“A sa dua vei rau, na yacana ko Kaliopasa, sa vosa ka kaya vua, O iko duadua beka na vulagi mai Jerusalemi, ka sega kina ni kila na veika sa qai yaco kina ena gauna oqo?”⁶

Rau a tukuna Vua na nodrau rarawa ni sa mai mate o Jisu ni rau sa vakabauti Koya me sa Dauveivueti kei Isireli.

E a rairai vakilai na loloma ni Turaga sa tucake tale ni sa vosa vei rau na tisaipeli yalorarawa ka lolosi oqo.

“A sa kaya vei rau ko koya, Drau sa sesewa, ka sega ni via vakabauta na ka kecega sa tukuna ko ira na parofita:

“E sega beka ni kilikili kei koya na Karisito me vosota mada na veika oqo, me qai curu ki na nona iukuuku?

“Ka sa vakatekivu ena ivola i Mosese ka yacovi ira kecega na parofita, ka sereka vei rau mai na iVola Tabu kecega na vosa ka tukuni kina ko koya.”⁷

Sa qai yaco mai na gauna a dau vakatakatara tu ga mai na yaloqu niu se cauravou lailai sara kina:

“A ratou sa torova na koro lailai, e rau sa lako kina: a sa lako ko koya me vaka sa via lako ki liu.

“A rau sa cikeva matua, ka kaya, Ni tiko ga vei keirau, ni sa qai yakavi, a sa kala na siga. A sa curu ko koya me tiko vata kei rau.”⁸

Sa mai ciqoma na iVakabula ena bogi o ya me curuma na nodrau vale na Nona tisaipeli volekata na koro o Emeo.

A sa tiko sobu ka kana magiti vata kei rau. A taura na madrai, masulaka, dovia, ka solia vei rau. Sa qai tadola na matadrau ka rau sa kilai Koya kina. A sa qai yali yani mai vei rau. E vola vei keda o Luke na veika rau a vakila na tisaipeli kalougata o ya: “A rau sa veikayaka vakai rau, Sa sega li ni katakata sara na yalodaru, ni datou sa veivosaki kaya e na gaunisala, ni sa vakamacalataka talega vei kedaru na iVola Tabu ko koya?”⁹

Ena gauna vata oqori rau a cici lesu tale na tisaipeli oqo ki Jerusalemi me rau laki tukuna vei ira na tinikadua na tisaipeli na veika sa yaco vei rau. Ena gauna vata oqori sa rairai tale e kea na iVakabula.

A vakamacalataka tale na kena parofisaitaki tu mai na Nona ilesilesi me mai sorovaka na nodra ivalavala ca na Luvena taucoko ka me mai sereka na ivesu ni mate.

“A sa kaya vei ira, Sa volai vakaoqo, ni sa kilikili kei koya na Karisito me vosota vakakina, me tucake tale mai na mate e na ikatolu ni siga:

“Me vunautaki talega na veivutuni kei na vakabokoci ni ivalavala ca, ena vuku ni yacana vei ira na lewe ni veivanua kecega, me vakatekivu e Jerusalemi.

“Ia koi kemudou, dou na dautukutuku ena veika oqo.”¹⁰

Sa dina sara na vosa ni iVakabula ka sa vakakina vei keda ka vakakina vei ira na Nona tisaipeli ena gauna o ya. Eda sa mai ivakadinadina ni veika oqo. Kei na ilesilesi lagilagi eda sa mai ciqoma ni da sa mai papitaisotaki ki na Lotu i Jisu Karisito ni Yalododonu Edaidai sa mai vakamatatataka vei keda na parofita o Alama ena vuqa na senitiuri sa oti ena wai o Momani:

“Sa qai kaya vei ira: Raica sa tu oqo na wai ko ya ko Momani (ka ra sa kacivi vakakina) ia me vaka dou sa gadreva, mo dou curu ki na loma ni bai ni Kalou, ka vakatokai me nona tamata, ka sa lomamudou mo dou veivuketaka na nomudou icolacola me mamada kina;

“Io, ni sa lomamudou mo dou tagi vata kei ira sa tagi; ka, vakacegui ira sa rarawa, ka vakadinadinataka na Kalou e na veigauna kecega kei na veivanua kecega dou sa tiko kina me yacova na mate, io me vakabulai kemudou na Kalou, ka okati kemudou vata kei ira e na imatai ni tucaketale mai na mate, me nomudou kina na bula tawamudu—

“Raica au sa kaya vei kemudou, kevaka sa vakaoqori na ka sa lomamudou, na cava me tarova na nomudou papitaiso e na yaca ni Turaga, io me ivakadinadina ni nomudou sa veiyalayalati vata kaya mo dou qaravi Koya ka muria na nona vunau, me sorovaka mai kina vei kemudou na nona Yalo Tabu?

“Ia ni ra sa rogoca na vosa oqo, era sa vakasausau e na marau ka ra kailavaka: Io oqori sara ga na ka sa lomai keimami tiko.”¹¹

Eda sa tiko ena veiyalayalati meda vakatataki ira era sa vakaleqai tu ka meda sa ivakadinadina ni iVakabula ena gauna kece ni noda bula.

Eda na rawa ni cakava vakaidina kevaka sa lomada meda lomana na iVakabula kei na Nona lomani keda. Ni da sa yalodina tiko ki na yalayala eda sa cakava, eda na vakila ni sa tubu cake na noda lomani Koya. Ena tubu baleta ni da na vakila na Nona kaukauwa ka toro voleka mai vei keda ena Nona veiqaravi.

E vakavotuya vakawasoma vei keda o Peresitedi Thomas S. Monson na yalayala oqo ni Turaga vei iratou na Nona tisaipeli yalodina: “Ia ko koya sa vakacegui kemudou, sa vakacegui au talega, niu sa lako vata tiko kei kemudou. Au na tiko e yasamudou imatau ka tiko talega e yasamudou imawi, ia na noqu Yalo Tabu e na tiko e yalomudou, era na vakavolivoliti kemudou na noqu agilosi ka laveti kemudou cake.”¹²

E tiko e dua tale na sala eda sa vakila ni sa toro voleka mai vei keda o Koya. Ni da veiqaravi ena dina Vua, ena tubu voleka mai o Koya kivei ira eda dau lomana ena noda matavuvale. Ena veigauna kece au dau kacivi ki na veiqaravi ni Turaga meu tokitaka se biuta na noqu matavuvale, au sa raica ni sa dau vakalougatataka na Turaga na watiqu kei iratou na luvequ. E dau vakarautaki ira na Nona italai lomani na veimadigi eso me ra vakavolekataka noqu matavuvale ki Vua.

Ko ni sa vakila talega na veivakalougatataki vakaoqo ena nomuni bula. E vuqa vei kemuni e tiko na nomuni daulomani era sa lakosese mai na salatu ki na bula tawamudu. Ko ni vakataroga beka na cava tale mo ni cakava mo ni kauti ira lesu mai kina. Sa rawa mo ni vakararavi ga vua na Turaga me torovi ira yani vakavoleka ni ko qaravi Koya tiko ena vakabauta.

Ko ni nanuma tiko na yalayala ni Turaga vei rau o Josefa Simici kei Sidney Rigdon ena gauna rau a tiko yawa kina mai na nodrau dui matavuvale ena Nona veitalai: “Raica sa kaya vakaidina na Turaga vei kemudrau Sidney kei Josefa na wekaqu, era sa bula vinaka tiko na nomudrau vuvale; io era sa tiko ena qeteqete ni ligaqu, kau na vakayacora vei ira na veika sa dodonu vei au; raica sa tu vei au na kaukauwa kecega.”¹³

Me vakataki Alama kei Tui Mosaia, ni so vei kemuni na italai yalodina ko ni sa qarava tu mai vakadede ka vakavinaka na Turaga era sa lakosese tu na luvemuni, e dina ga o ni sa solibula na itubutubu ena vuku ni Turaga. Me vakataki kemuni, era sa cakava na ka kece sara era rawa ni cakava vakakina na veivukei mai vei ira tale eso na tamata dauloloma ka yalodina.

A masu o Alama kei ira na Yalododonu ena vuku i luvena tagane kei iratou na luvei Tui Mosaia tagane, a qai rairai mai e dua na agilosi. Na nomuni masu kei na nodra masu o ira era vakayaco-ka ena vakabauta ena kauti ira mai na italai ni Turaga mera mai vukea na lewe ni nomuni matavuvale. Era na mai vukei ira na luvemuni mera digitaka na salatu ki vale vua na Kalou, ena gauna mada ga era ravuti tiko kina mai vei Setani kei ira na nona ilawalawa, ni sa nodra inaki mera vakarusa na veimatavuvale ena bula oqo kei na veigauna tawamudu.

Ko ni nanuma tiko na vosa a cavuta na agilosi vei Alama Lailai kei iratou na luvei Mosaia tagane ena gauna ni nodratou talaidredre: “A sa kaya tale na agilosi: Raica, sa rogoca na Turaga na nodra masu na nona tamata, kei na masu talega ni nona tamata, ko Alama, na tamamu; ni sa masulaki iko vagumatua ko koya ena vakabauta me vakatakilai vei iko na ka dina; o koya gona, au sa talai mai kina meu vakatakila vei iko na lagilagi kei na kaukauwa ni Kalou, me saumi kina na ka era sa masuta na nona tamata ena vakabuta.”¹⁴

Au yalataka vei kemuni ko ni sa dau masuta ka qarava tiko na Turaga ni na sega ni taucoko mai na veivakalougatataki ko ni gadreva baleti kemuni kei na nomuni matavuvale. Ia au sa rawa ni yalataka vei kemuni ni na toro voleka mai na Turaga vei kemuni ka vakalougatataki kemuni kei na nomuni matavuvale ena veika e vinaka cake duadua. Ko ni ciqoma na veivakacegui ni Nona loloma ka vakila na Nona volekati kemuni mai ni ko dedeka yani na ligamuni mo ni qaravi ira yani na tamata. Ni ko vauca na nodra mavoa era vakaleqai tu ka solia yani na veivakasavasavataki ni Nona Veisorovaki kivei ira era sa vakararawataki tu ena ivalavala ca, ena tokoni iko cake na kaukauwa ni Turaga. Ena dedeka vata yani o Koya na ligana kei kemuni me veivuke ka vakalougatataki ira na luvena na Tamada Vakalomalagi, vakakina o ira ena nomu matavuvale.

Sa vakarautaki tu mai na noda kidavaki lagilagi vakamatavuvale. Eda na qai raica kina ni vakavotukanataki na yalayala ni Turaga eda a dau lomana. Sai Koya ga ena kidavaki keda ki na bula tawamudu vata kei Koya kei na Tamada Vakalomalagi. E vakamacalataka kina vakaoqo o Jisu Karisito:

“Mo gumatua sara mo tara cake na noqu Saioni. Io mo muria na noqu vunau ena ka kecega.

“Raica, kevaka ko sa muria na noqu vunau ka vosota me yacova na ivakataotioti, ko na rawata na bula tawamudu, oqo na isolisoli uasivi duadua ni Kalou.”¹⁵

“Raica ko ira era bula tiko era na taukena na vanua, ia ko ira sa mate era sa vakacegu mai na nodra cakacaka kecega, ia era na lewai me vaka na nodra ivalavala; raica era na rawata na isala vakaturaga kau sa laki vakarautaka tu me nodra e na vale nei Tamaqu.”¹⁶

Au vakadinadinataka ni sa rawa vei keda ena kaukauwa ni Yalotabu meda muria na veisureti nei Tamada Vakalomalagi: “Oqo na Noqu Gone ni Toko. Mo Rogoci Koya! !”¹⁷

Mai na Nona vosa kei na Nona ivakaraitaki, sa vakaraitaka kina na Karisito na sala meda toro voleka yani kina ki Vua. O ira yadua na luvena na Tamada Vakalomalagi era sa digitaka mera curu ena matamata ni papitaiso ki na Nona Lotu ena soli vei ira na madigi ena bula oqo me vakavulici vei ira na Nona kosipeli ka rogoca mai vei ira na Nona italai na Nona veisureti “Dou lako mai vei au.”¹⁸

O ira yadua na Nona italai ni veiyalayalati ena loma ni Nona matanitu e na vuravura oqo vakakina ena vuravura ni yalo era na ciqoma na Nona veitaqomaki mai vua na Yalotabu ena gauna era vakalougatataka ka qaravi ira kina na tamata ena Vukuna. Ka ra na vakila na Nona loloma ka kunea na reki ni nodra toro voleka yani Vua.

Oi au e dua na ivakadinadina ni nona Tucaketale na Turaga me vaka ga au a tiko beka kina ena yakavi o ya vata kei na rua na tisaipeli ena vale e gaunisala ki Emeo. Au kila ni bula tiko o Koya me vaka dina a yaco vei Josefa Simici ena gauna a raica kina na Tamana kei na Luvena ena rarama ni dua na mataka totoka ena dua na veikau mai Palmyra.

Oqo na Lotu dina i Jisu Karisito. Ena idola ni matabete duadua ga e tiko vei Peresitedi Thomas S. Monson sa ikoya na kaukauwa meda vauci kina vakamatavuvale meda laki bula tawamudu vata kei na Tamada Vakalomalagi kei na Turaga o Jisu Karisito. Ena yaco vei keda ena Siga ni Lewa meda tucake e mata ni iVakabula, ena veirai e matanavotu. Ena yaco me dua na gauna ni reki kivei ira era a toro voleka yani Vua ena Nona veiqaravi ena bula oqo. Ena rekitaki ni ra rogoca kina na vosa: “E vinaka, a tamata vinaka, ka dina.”¹⁹ Au sa vakadinadinataka niu sa ivakadinadina ni iVakabula sa tucaketale ka noda Dauveivueti ena yaca i Jisu Karisito, emeni.