iVakadinadina

Ena vuqa na yabaki sa oti yani e dua na veivakalougatataki cecere ni noqu bula sa ikoya na madigi ena nodra vakavolivoliti au kau cakacaka vata kei ira na itabagone ena Lotu. Na veimaliwai kei na veitokoni oqo au vakasamataka ni dua vei ira na ka kamikamica ka yaga vakalevu duadua ena noqu bula. E vakavuna talega e levu na kakavaki e tu vei au me baleta na Lotu, o ira na tamata kei na vuravura.

Ena gauna ni noqu cakacaka vatakei ira na itabagone, a tarai au tale ga na madigi meu veitalanoa vata kei ira eso, e tu vei ira na veimataqali vakatitiqa se bolebole vata kei na nodra ivakadinadina. Ena kena vakaduiduitaki na veika matata ka vagauna na kena sega ni tautauvata, e vuqa na taro kei na vu ni veilecayaki era sa tautauvata kece ga. E vakakina, na veika oqo kei na veika e baleta ka sega ni yalani ki na iwiliwili ni tamata se na yabaki ni bula. Na veika oqo e rawa me vakaleqai ira na veimatavuvale era sa lewenilotu tu mai ena veitabatamata sa oti, na veiwekani vata kei ira na lewe ni Lotu vou kei ira tale ga era sa vakamatautaki ira tiko mai ki na Lotu i Jisu Karisito ni Yalododonu Edaidai. Na nodra taro ena vuqa na gauna e isau ni vakatataro ena yalodina se lomatarotaro. Ni sa rui vakaibalebale ka bibi kivei keda vakayadua, e rairai ganita me veivosakitaki na noda ivakadinadina. Ena noda itukutuku na Yalododonu Edaidai eda sa raica na noda ivakadinadina me noda ivakadinadina tudei ena dina ni kosipeli i Jisu Karisito, a ivakadinadina tudei ka da rawata mai na ivakatakila ni Yalo Tabu.

E rawarawa ka matata na itukutuku oqo, ia mai na isau ni itukutuku e basika kina e vica na taro, me vaka: O cei e dodonu me dua na nona ivakadinadina? E rawa vakacava vua e dua na tamata me rawata na ivakadinadina e gadrevi? Na ikalawa cava soti me rawati kina na ivakadinadina? Na rawati ni ivakadinadina sa ikoya e dua na ka e yaco se dua na cakacaka me toso tiko ga? Na veitaro vakayadua oqo kei na veitaro tale eso e sa tu na nodra dui taro veisemati ia na yavudei ni kena rawati ka maroroi e dua na ivakadinadina ni kosipeli i Jisu Karisito era vakadodonu sara tu ga, rawarawa, ka sa tu vua na tamata yadua na kaukauwa me rawata e dua na ivakadinadina.

Meu vosa mada vakalailai ena veika vakatubu veilecayaki oqo, oti me qai veitalanoataki eso na rai titobu ka ra sa veiwaseitaka mai ena dua na gauna lekaleka oqo, eso na itokani itabagone qase cake yalodina, era sa sotava mai vakataki ira ena nodra rawata na nodra ivakadinadina. Era sa ciqoma tale ga eso na madigi me ra qaravi ira kina eso, era sotava tu na veibolebole se dredre ena nodra vakabauta kei na veika era vakadinata.

iMatai, o cei e dodonu me dua na nona ivakadinadina? O ira vakayadua era sa vakarau tu me ra sauma na kena isau–kena ibalebale na rokovi ni ivunau–e rawa me dua na nodra ivakadinadina. A sa vunautaki yani na vosa ni Turaga ki na iyalayala kei vuravura, me ra rogoca na tamata kece ga” (V&V 1:11). Na yavudei ni kena vakalesui mai na kosipeli sa i koya “me ra vunau ko ira ena yaca ni Turaga na Kalou, na nodra iVakabula na kai vuravura; Io me ra vakabauta kina na kai vuravura kecega” (V&V 1:20–21).

iKarua, e ciqoma vakacava e dua na ivakatakila yaga kei na ikalawa yavudei cava soti me rawati kina? E rawarawa na kena ituvatuva ka tautauvata ena veigauna taucoko. Na yalayala ni kena rawati na ivakadinadina ni iVola i Momani e vakayagataki ena kena ciqomi na ivakadinadina ni dina tale eso:

“Ia ni dou sa wilika na itukutuku oqo” kena ibalebale ni o sa rogoca, wilika, vulica ka tugana ena taro oqori, “kerea vua na Kalou, na Tamada Tawamudu, ena yaca i Karisito, me vakatakila vei kemudou se dina” se sega, kena ibalebale o na masu ena vakanananu, vakamatata ena vakarokoroko vata ka caka me sala vata, me saumi kina na nomu masu; “ia kevaka dou sa kerea ena yalodina ena lomamudou taucoko ka vakabauta na Karisito, ena vakatakila vei kemudou, ko Koya ena kaukauwa ni Yalo Tabu ni sa dina.

“Ia na kaukauwa ni Yalo Tabu ena vakatakila vei kemudou na dina ni veika kece ga” (Moronai 10:4–5).

iKatolu, na rawati ni ivakadinadina e dua na ka dau yaco ga vakadua se e dua na ivalavala dau cawiri tikoga? E dua na ivakadinadina e tautauvata kei na dua na ka bula ni susugi ka tarai cake ni qaravi vakavinaka. Na ka bula e gadreva me vakani ena veigauna, qarauni ka taqomaki me bulabula ka tubu cake. E vakakina, kevaka eda vakaweleweletaka se sega ni vakacavara na ikalawa e gadrevi me vakataucokotaki tiko kina, ena seyavu se yali na noda ivakadinadina. E vakadreta na ivolanikalou ni talaidredre se na kena voroki na ivakaro ni Kalou e rawa me yali kina na Yalotabu ke dua mada ga na tamata me cakitaka na ivakadinadina a taukena taumada tu.(raica na V&V 42:23).

Ena gauna oqo meu wasea mada e tini na vakadidike kei na vakatutu mai vei ira na itokani gone bibi ka yalodina. Na vakasama era wasea e sa vakamatautaki tu ena nodra vakanananu kei na veika era sotava; sa yaco kina me ra sega ni veivakurabuitaki kina vei keda. E ka ni rarawa, ka vakabibi, ena veigauna ni noda dui leqa kei na rarawa, e rawa meda guilecava vagauna se biuta laivi na kena yaco vakatamata kivei keda na veivakasama oqori.

iMatai, o ikeda vakayadua e dui tu na keda yaga ni da luvena kece na Kalou. E kilai keda, lomani keda ka vinakata meda rawati keda ka lesu yani ki Vua. E dodonu meda vulica me da vakanuinui ena Nona loloma ena Nona gauna ga ka sega ena noda gagadre sega ni dau vosota ka sega ni uasivi sara.

iKarua, ena taucoko ni noda vakadinata na veivutuni e vakamacalataki ena ivolanikalou (raica na Mosaia 5:2; kei na Alama 5:12–14, 26), e dodonu meda kila ni veivutuni e dau yaco vakamalua, ka sega ni vakatotolo se vakararaba, me isau ni veitaro eso, na veika e sotavi kei na lomatarotaro vakakina mai na noda vuli kei na masumasu.

iKatolu, e gadrevi meda nanuma ni dua na inaki taumada ni bula sa ikoya meda vakatovolei ka bolei ka dodonu meda vulica meda tubu cake mai na noda veibolebole ka vakavinavinakataka na kila-ka eda rawata ni sega ni rawa meda rawata ena gaunisala rawarawa.

iKava, e dodonu meda vulica meda vakanuinui ena veika eda vakadinata se kila me tokoni keda ena veigauna ni veilecayaki se ena veika eda segata vakaukauwa.

iKalima, me vaka e vakavulica o Alama, ni rawati e dua na ivakadinadina e kena ivakarau ni dua na toso cake ena vakanuinui, vakabauta, ka kena iotioti na kena kilai na dina ni dua ga na ivakavuvuli, ivunau se na kosipeli vakaikoya. (raica na Alama 32).

iKaono, noda vakavulica e dua tale ni veika eda kila e vakaukauwataka na noda dui ivakadinadina ena noda tara cake na ivakadinadina vua e dua tale na tamata. Ena nomu solia vua e dua na ilavo se kakana, e sa na lailai na nomu ilavo se kakana. Ia, ni o wasea nomu ivakadinadina, ena vakaukauwataka ka vakalevutaka vei koya sa vunau kei koya sa vakabauta.

iKavitu, e dodonu meda dau cakava na veika lalai e yaga ena veisiga kei na veigauna. Na masumasu, vulici ni ivolanikalou kei na kosipeli, tiko ena soqoni ni Lotu, sokalou ena valetabu, vakayacora nomu veisiko, veituberi ki na vuvale kei na ilesilesi tale eso era vakaukauwataka kece sara na noda vakabauta ka sureta na Yalotabu ena noda bula. Noda vakawaletaka na veika oqori, e sa na bolei kina na noda ivakadinadina.

iKawalu, meda kakua ni biuta e cake na nodra itagede na tani mai na kena eda biuta ena vukuda. E wasoma noda dau laiva na nodra cala se malumalumu eso, vakabibi o ira na iliuliu se lewe ni Lotu, me vakayarayarataka na veika eda vakila me baleti keda se na noda ivakadinadina. Na nodra dredre eso tale na tamata e sega ni ulubale ni noda dui malumalumu.

iKaciwa, e vinaka meda nanuma noda vakaukauwataki keda ena noda cakava e dua na cala e rawa kina me vakarerevaki mai na noda taura vakamamada ena gauna e gadrevi kina na veivutuni dina.

iKatini, e dodonu me matata tiko vei keda ni na dau yaga tikoga vei keda ena veigauna na Veisorovaki nei Karisito ni taucoko ka tomani tiko na kena bulabula vei keda vakayadua kece sara ni da vakatara me vakakina. Oti, ena qai donu mai na veika kece, ena gauna mada ga eda veiqalisominiwai tiko kina kei na kena matailalai eso, na itovo ni bula se na veitikina eso ka yali tiko ena ituvatuva ni noda vakabauta.

Au vakavinavinakataka me baleta na raiyawa, kaukauwa kei na ivakadinadina mai vei ira e vuqa na noqu itokani gone dau ivakaraitaki vinaka. Au vakaukauwataki ena noqu tiko vata kei ira na gone kei na nodra tiko vata kei ira eso tale na tamata. Au vakayaloqaqataki mai na kila-ka ni ra sa caka vinaka tiko ka ra cakava tiko na veiqaravi ena vukuna na i Vakavuvuli, o koya era masuta ka ra gumatuataka nodra talairawarawa Vua.

Era cakava na tamata na veika vinaka ka bibi baleta ni tu na nodra ivakadinadina. Mai na dina oqo, eda sa rawata talega kina na ivakadinadina ena vuku ni veika eda cakava.

“Sa sega ni noqu na noqu ivakavuvuli, sa nona ga ka talai au mai.

“Kevaka e dua na tamata sa via cakava na lomai koya, ena kila se sa ka mai vua na Kalou na ivakavuvuli, seu vosa vakai au ga” (Joni 7:16–17).

“Kevaka dou sa lomani au, dou talairawarawa ki na noqu vunau” (Joni 14:15).

Me vakataki Nifai kei Momani ena gauna makawa, “Ia au sa sega ga ni kila na ibalebale ni veika kece au sa raica” (1 Nifai 11:17; raica talega na Vosa i Momani 1:7), ia meu tukuna vei iko na ka au sa kila.

Au kila na Kalou na Tamada Vakalomalagi e bula tiko ka lomani keda. Au kila ni Luvena uasivi duadua ga, o Jisu Karisito, e noda iVakabula ka Dauveivueti ka iliuliu ni Lotu ka vakatokai ena Yacana. Au kila ni veika a sotava kece o Josefa Simici, e tukuna ka vakavulica ena veidokai ki na vakalesuimai ni Kosipeli ena noda gauna. Au kila ni da liutaki tiko mai vei ira na iapositolo kei na parofita nikua kei Peresitedi Thomas S. Monson, e tu kece vua na idola ni matabete ka gadrevi me vakalougatataka na noda bula ka tosoya ki liu na cakacaka ni Turaga. Au kila ni da vakaivotavota kece ena kila-ka ia kevaka o vakaleqai tiko, e rawa mo vakararavi ena dina ni ivakadinadina o rogoca mai na itutu ni vunau ena koniferedi oqo. Na veika oqo au kila ka wasea na noqu ivakadinadina ena yaca i Jisu Karisito, emeni.