2010–2019
Iloilo ni Gauna Tawamudu ni Valetabu: Ai Vakadinadina ni Matavuvale
Okotova 2010


Iloilo ni Gauna Tawamudu ni Valetabu: Ai Vakadinadina ni Matavuvale

Na rai tawamudu ni saumaki mai ki na kosipeli kei na veiyalayalati ni valetabu sa rawa ni vukei keda meda raica rawa na veivakalougatataki cecere ki na itabatamata yadua ni noda matavuvale tawamudu.

Kemuni na taciqu kei na ganequ lomani, ena gauna a tiko kina o luvei keirau tagane ena Koronivuli ni Kaulotu e Provo, a dau vakauta tiko o Sisita Gong vua kei ira na nona itokani daukaulotu na madrai buta katakata. Oqo eso na ivola ni vakavinavinaka ni daukaulotu a ciqoma o Sisita Gong: “Sisita Gong, na madrai o ya e vaka sara ga na tiko mai vale.” “Sisita Gong, na ka ga au rawa ni kaya, oilei. Sa qai dua na ka vinaka dina meu bau kania mai na gauna au a kania kina na totila vakautona a solia o tinaqu.” Ia oqo au sa taleitaka sara ga: “Sisita Gong, totoka na madrai.” E qai tomana ena veiwali, “Qai nanumi au toka ke sa basika eso na duidui vei kemudrau kei Mr. Gong.”

Keirau dau lomani ira na noda daukaulotu—na italatalaqase yadua, ira na goneyalewa, kei ira na veiwatini qase. Sa tawamudu na noda vakavinavinaka vei koya na daukaulotu digitaki o ya ka isevu me kauta mai na kosipeli vakalesuimai i Jisu Karisito ki na neitou matavuvale. Au mai vakavinavinaka niu vakadinadinataka eke ni sa rawa me vukei keda na rai tawamudu ni saumaki mai ki na kosipeli kei na veiyalayalati ni valetabu meda raica rawa kina na veivakalougatataki cecere ki na itabatamata yadua ni noda matavuvale tawamudu.

E a isevu ni curuvou ni neitou matavuvale na Gong ki na Lotu i Jisu Karisito ni Yalododonu Edaidai o Jean Gong, na tinai keitou. Ni a se goneyalewa voli mai Onolulu, Awai, a vakarorogo; vakavukui; papitaisotaki ka vakadeitaki; sa tomana tiko na nona bula vakabauta. Era a vukei tinaqu na lewe ni Lotu yalodina me so kina na nona itokani vakosipeli, kacivi ki na itutu vaka- Lotu, ka tomani na nona vakani ena vosa vinaka ni Kalou. Ena ivosavosa ni gauna oqo, na curuvou yadudua, itabagone qase cake, o ira era sa lesu tale ki Lotu, kei ira eso tale era na vakalougatataki ira na itabatamata ena gauna era sa oka me lewe ni vale ni Kalou.1

E dua na matavuvale a tuberi tinaqu cake o ya na Gerrit de Jong, Jr. E dua na daunivosa ka dau taleitaka na vosa ni yaloda kei na Yalotabu, ka dau vakatovolea o Grandpa de Jong na vakasama i noqu gonetagane lailai ni dau kaya vua, “Se vou na Blackberries ena gauna sa dreu tu kina.” Nikua, ni da tukuna na veiyaya ni talevoni, au na tukuna vei ira na itokani gone, “Ni wiliki na Blackberries e loma ni Lotu era na rarawa kina na bisopi.”

O rau o Walter kei Jean Gong, na noqu itubutubu, rau a vakamau vakatolu: e dua na soqo vakamatavuvale vaka-Jaina, e dua na soqo ni itokani, kei na dua na soqoni tabu ena vale ni Turaga me baleta na gauna oqo kei na tawamudu.

Era dau lagata na noda Lalai: “Au taleitaka meu raica na valetabu. Au na lako kina ena dua na siga.”2 Era boletaka na noda itabagone me ra “ciqoma na cakacaka vakalotu ni valetabu.”3

Au a laki tucake vata tu kei na dua na veiwatini bula kilikili e loma ni vale ni Turaga me rau ciqoma na veivakalougatataki ena veiyalayalati. Au a sureti rau me na 50 sara na yabaki na balavu ni nodrau imatai ni gade ni vakamau (honeymoon), oti o ya, me qai tekivu na ikarua ni gade ni vakamau, ni oti e 50 tale na yabaki.

Au sa mai tu vata kei rau na veiwatini totoka oqo ena mata ni iloilo ni valetabu—e dua na iloilo ena yasana oqo, ka dua tale ena yasana kadua. Rau sa qai vakaraitaka mai na iloilo ni valetabu e rua oqo na iyaloyalo e liu kei na kena e muri ka vaka me tuvanaka yani na veigauna tawamudu.

Na iloilo ni gauna tawamudu ni valetabu e vakavotuya vei keda yadua na tamata ni “sa vakalou na noda bula kei na ilesilesi yadua e baleti keda;” ni “sa koto kina na veicakacaka tabu vakalotu kei na veiyalayalati ena veivaletabu vakalou me rawa kina vei keda vakayadua sara meda na curuma tale na nona iserau na Kalou ka vakakina me vauci vata ka tawamudu na veimatavuvale;”4 kei na noda tubu vata tiko ena veilomani kei na yalodina, sa qai rawa meda solia vei ira na luveda na yavu dina kei na veivakauqeti.

Ena iloilo ni gauna tawamudu ni valetabu, au vakasamataki koya kina na iMatai ni Dragon Gong, sucu ena 837 g.t. (kawa vakacegu i Tang) mai na ceva kei Jaina kei ira na itabatamata ni gauna oqo nei Gong yaco mai vei tamaqu, na ika 32 ni itabatamata ni noqu matavuvale. O au, taciqu, kei ganequ, keitou ika 33 ni itabatamata ni neitou matavuvale; o iratou na luvequ tagane le va kei na tacidratou, sa kena ika 34; o makubui keirau tagane, sa ika 35 ni itabatamata i Gong e kilai rawa. Ena iloilo ni gauna tawamudu ni valetabu, au sega ni raica rawa e dua na itekitekivu se na icavacava ni itabatamata.

Au sega walega ni qai vakasamataka e dua na isema ni itabatamata, ia sa vakakina na isema ni veiwekani vakamatavuvale. Ena dua na muana, au raica niu luvena tagane e dua, makubuna tagane, makubuna tagane vakarua, yaco sara ki na iMatai ni Dragon Gong. Ena iloilo tale kadua, au raica niu sa dua na tama, tukana, tukana vakarua. Au raici Susan, na watiqu, ni luvena yalewa e dua, makubuna yalewa, makubuna yalewa vakarua, kei na muana tale ka dua, e dua na tina, budra na gone, ka budra vakarua.

Ena iloilo ni gauna tawamudu ni valetabu, au sa kilai au kei na marama watiqu ni keirau sa luvedrau na neirau itubutubu ka keirau itubutubu ni luvei keirau, ka keirau makubudrau na tukai keirau kei na bui keirau ka tukadra ka budra na makubui keirau. E curuma na yaloi keirau na neirau vulica na lesoni cecere ni bula oqo ni keirau vulica ka vakavulica na neirau ilesilesi tawamudu oka kina na gone kei na itubutubu, na itubutubu kei na gone.

Na ivolanikalou e vakamacalataka na iVakabula ni “Tamana kei na Luvena.”5 Ni sa mai bula oti ena yago ka sa vakarorogo kina na yago ki na lewa nei Tamana, e kila na iVakabula na ivakarau me vakamareqeti keda kina, na Nona tamata, mai na noda mosi, noda vakararawataki, noda vakatovolei, tauvimate, se na mate sara mada ga.6 Ni sa lako sobu mai ki ra sara, sa rawa vua na iVakabula me rogoca na noda tagi ka vakaceguya na noda rarawa. 7A vakamavoataki ena vuku ni noda talaidredre, ka sa qaqiraki me baleta na noda caka cala … ; kei na we ni kena kuita [na noda iVakabula] eda sa vakabulai kina.”8

Ena bose levu mai lomalagi, a vinakata ga na iVakabula me cakava na lewa nei Tamana. Na veimaliwai vakaoqo nei Tama kei Luvena e vakamacalataki kina na ivosavosa “o koya sa vakayalia na nona bula ena vukuqu ena maroroya.”9 Sa vakasaqara tu ko vuravura na ka me nona ga. Ia sa sega vei keda na kaukauwa meda vakabulai keda rawa. Ia sa tu ga Vua. O Koya sa sega ni vakaiyalayala ka tawamudu,10 ni Veisorovaki duadua ga ni iVakabula ena curuma yani na gauna kei na maliwa lala me vakaotia na mate, cudru, lomaca, veidabui, galili, kei na kavoro ni yalo.

Ena so na gauna e dau cala eso na ka e dina ga ni da sa cakava na veika kece eda rawata. Na Lami sa tawacala ka savasava sara, sa tagi vata ka tagicaki keda na iVakabula. Ni da dau nanumi Koya tikoga,11 Sa rawa ni tu vata kei keda ko Koya “ena veigauna kecega kei na veika kecega, kei na veivanua kecega [eda] na tu kina.”12 Na Nona “yalodina sa kaukauwa cake mai na ivesu ni mate.”13 Ni da toso yani Vua, sa kauti keda vakakina na iVakabula vei Tamada mai Lomalagi. Me vaka ni tu na veika veilecayaki e vuravura, sa rawa meda nuitaka tiko na Tamada Vakalomalagi me vakacavara taucoko na “tuvatuva talei, lewa dodonu, loloma veivueti, na bula vakalou.”14

Na mana ni iyaloyalo eda vakila rawa ena iloilo ni gauna tawamudu ni valetabu ni o ira—kei keda—sa rawa meda veisau. Ni gauna rau sa curuma kina o Jean kei Walter Gong na veiyalayalati vou ka tawamudu, rau sa dolava kina na sala vei ira na nodrau qase e liu (me vakataki iMatai ni Dragon Gong) me ra vauci kei ira na nodratou kawa me ra sa na sucu ena veiyalayalati. Mo ni nanuma tiko: ni gauna eda vueti ira yadua kina na ganeda kei na tacida, era na kalougata na veitabatamata.

Sa yavavala tiko ko vuravura15 ia na Nona Lotu dina edaidai16 sa tiko kina na vakabauta ka sega na rere. Ena nona veimalanivosa o Paula na iApositolo, Au sa vakadinadinataka talega:

“Niu sa kila vakaidina, ni na sega ni rawata na mate, se na bula, …

“Se na ka cecere, se na ka titobu, se duatani na ka me tawasei keda mai na loloma ni Kalou, sa yaco ena vukui Karisito Jisu na noda Turaga.”17

Au vakadinadinataka ena yalomalumalumu: E bula na Kalou. Ena tavoya kecega na wai ni mata mai na matadra”18—ia ena wai ni mata ni marau eda na raica ena iloilo ni gauna tawamudu ni valetabu na noda vale, e vakalou ka savasava, na itabatamata ni noda matavuvale era vauci ena lewa ni matabete ena loloma, ka kailavaka osana, osana, osana. Ena yaca i Jisu Karisito, emeni.

  1. Raica na Efeso 2:19.

  2. “I Love to See the Temple,” iVolanisere ni Lalai, 95.95.

  3. “iToko ni Goneyalewa,” Torocake Yadudua ni Goneyalewa: Tu Mo Vakadinadinataka na Kalou, 3.(ivolalailai, 2009), 3.

  4. “Na Matavuvale: Ai Vakaro ki Vuravura Raraba,” Liaona, Okot. 2004, 49.

  5. Raica na Mosaia 18:9.

  6. Raica na Alama 7:11–12.

  7. Vunau kei na Veiyalayalati 88:6; raica talega na Vunau kei na Veiyalayalati 122:5–8.

  8. Aisea 53:5.

  9. Maciu 10:39.

  10. (Raica na Alama 34:14.

  11. Raica na Vunau kei na Veiyalayalati 20:77, 79.

  12. Mosaia 18:9.

  13. Vunau kei na Veiyalayalati 121:44.

  14. “Dokai na Vuku kei na Loloma,” Serenilotu, naba 101.

  15. Raica na Vunau kei na Veiyalayalati 45:26; 88:91.

  16. Vunau kei na Veiyalayalati 1:30.

  17. Roma 8:38–39.

  18. iVakatakila 21:4.