Matou te faafetai atu i Lau Afio ona ua tuana’i atu na aso o sauaga ma mafatiaga. Talosia ia aua nei toe oo mai. Mai i lena taimi, ua ola Lau Ekalesia ma ua faateleina, ma ua salalau i le lalolagi atoa. Ua manatua foi e Lau Afio, nei atumotu o Samoa, i Lau folafolaga i aso anamua "ieoiaii motu o le moana” (2 Nifae 10:21).
Sa aumaia le savali o le talalelei toefuataiina i nei motu e faifeautalai faatuatua. Ua tula’i mai ai se seleselega tele, ma ua i ai i le taimi nei siteki o Siona ma tale matagofie o tapuaiga. O le faatumutumuga o nei mea uma, o Lou maota paia lea.
O lenei fale fou ma le matagofie, ua faatuina i luga o lenei eleele sa. E maoa’e i ona elemene uma. Ma o lea, i le suafa o Iesu Keriso, ma i le pule o le perisitua paia ua ia te i matou, matou te faapaiaina ai i Lau Afio ma Lou Alo Pele lenei, Malumalu o Apia Samoa O Le Ekalesia a Iesu Keriso o le Au Paia o Aso e Gata Ai.
Matou te toe faapaiaina le eleele o loo tu ai, ma ona laufanua lanulauava ma togalaau matagofie. Matou te faapaiaina le fale ma ona vaega uma ma ona totoga uma e faasino i ai. O la matou meaalofa i Lau Afio, le Tama pele, ua ofoina atu e faailoa atu ai lo matou agaga faafetai mo Au meaalofa sili mo i matou, ae maise ai lava le meaalofa o Lou Alo Pele, lo matou Togiola ma lo matou Faaola. Faamolemole le Tama pele, talia mai lenei, maota paia o Lau Afio. Matou te ole atu ia E asiasi mai i ai, ma faapaiaina e ala i Lou afio ai. Ia lagonaina Lou Agaga Paia e i latou uma e o mai i totonu o nei puipui.
Matou te tatalo ina ia mafai ona talia vaega uma o lenei maota mo le faataunuuina o sauniga na faaali mai i Lau perofeta, e aofia ai papatisoga mo i latou ua maliliu. Ia avea foi le potu selesitila matagofie ma faatusa o Lou afioaga i luga. Ia avea potu mo Apia Samoa Temple Rededication September 4, 2005 28 faamauga ma o latou fata faitaulaga, e fai ma vaaiga o folafolaga paia e faatatau i le natura e faavavau o le aiga.
Matou te faapaiaina foi le fale autu fou o le siteki o loo sosoo atu ma le malumalu, faatasi ai ma ona vaega uma, ina ia avea ma se nofoaga o tapuaiga, aoaoga ma fegalegaleaiga. Matou te tatalo ina ia aoaoina le afioga a le Alii mai le pulelaa, ma potuaoga, ma ia uuna’ia foi ma atiina a’e faauooga i le potu tele mo faafiafiaga. E faapena foi ona matou faapaiaina isi fale uma ma meatotino o i lenei lotoa paia.
O lenei la Tama, matou te tatalo atu ina ia E leoleoina ma faasaoina [lenei malumalu] mai le ituaiga o malosiaga faatafuna, lea na faatama’ia ai le malumalu muamua. Ia E faasaina ma faapaiaina, ina ia mafai e i latou uma e ulufale mai i ai, ona latou ulufale mai ma se malamalama, ua latou i ai i Lou afioaga paia.
Matou te tatalo, le Tama e, ina ia silafia ma iloa e i latou uma e silasila ma vaavaai mai i lenei fale, Iona natura paia ma ia uuna’ia ai i o latou loto, ia ta’u o Lou maota paia. Ia taofia soo se lima e ono si’i a’e ma se faamoemoega e faaleaga.
Matou te tatalo mo le au peresitene o le malumalu ma le faatina ma ona fesoasoani, o i latou ua galulue ai nei ma i latou foi o le a galulue ai i tausaga uma o le a oo mai. Matou te tatalo mo i latou o le a lagolagosua atu ia te i latou, o ni tagata faigaluega ua tofia i lenei tiute paia. Matou te tatalo mo i latou e ulu mai i ai, ina latou ulu uma mai ma le agavaa i luma o Lau Afio. Ia taula’i tasi atu o latou mata i Lou mamalu, ma ia aveesea le pogisa uma mai ia te i latou.
Matou te ole atu faamolemole ia E pa’i atu i loto o Lou nuu faatuatua, ina ia latou saili atu i o latou tama ma o latou tina ma galulue ai e fai ma sui o i latou, i nei lotoa paia. Ia ala mai i Lou mana sili, ona tatala auala ina ia mafai ai ona maua ia faamaumauga o aso ua mavae, e i latou e naunau ina ia iloa o latou augatuaa.
Ia faamanuia lenei atunuu o Samoa ma i latou o loo pulea. Matou te tatalo ina ia avea pea ma se atunuu o le filemu ma le saolotoga. Matou te tatalo mo le filemu i le lalolagi atoa, ina ia mafai ai ona faataunuu Lau galuega i ituaiga uma, o gagana, ma tagata, ina ia manuia ai Au fanau i le lalolagi atoa. Matou te faafetai mo Lau perofeta, o Iosefa Samita, ma meaalofa ofoofogia uma ma faamanuiaga na toefuatai mai e ala mai ia te ia.
Matou te tatalo mo tupulaga o Lau Ekalesia, ina ia latou tetee atu i le lalolagi ma ia ola i le faatuatua ma le faamaoni.
Matou te tatalo mo i latou uma o loo pulefaamalumalu i Lou malo. Leoleo i latou ma faamanuia ma taialaina i latou. Faamanuia i latou uma o loo galulue ma auauna atu i Lau galuega i soo se itu.
O lea, le Tama pele, Lau Afio Elohima Silisiliese, ia E talia mai la matou faafetai mo meaalofa uma lava. Ia tumau Lou alofa i o matou luga, ina ia faaauau ai pea ona matou mauaina Au faamanuiaga ma savavali ai i Lou finagalo ma poloaiga, matou te tatalo atu ai ma le lotomaulalo, i le suafa paia ma le mamalu o Iesu Keriso, amene.