Matou te faafetai mo nei motu matagofie o Samoa, ma mo Au au paia faamaoni o loo nonofo iinei. Na tautino mai e Iakopo, le atalii o Liae anamua: “Ua tetele lava folafolaga a le Alii ia te i latou o e o i luga o motu o le sami” (2 Nifae 10:21). Ua matou molimauina le faataunuuina o Lau feagaiga, aua e te lei faagaloina lava i latou.
Matou te tatalo mo Au faamanuiaga i luga o i latou o e pulea nei motu ma tagata o loo nonofo iinei ina ia mafai ona manumalo mataupu faavae o le filemu ma le fai mea tutusa ma ina ia i ai i tagatanuu o nei motu se mafuaaga e olioli ai i le saolotoga ua ia i latou.
I tausaga ua leva atu na o mai ai Au auauna, o toeaina o Lau Ekalesia, i nei motu matagofie ma o iinei na aoao atu ai le talalelei toefuataiina a Lou Alo. I le ootia ai i Lou Agaga Paia, e toatele na mauaina lena savali maoae o le upumoni e faavavau. Sa latou ola ma a latou fanau i le faamaoni. Ua ola ma faateleina lau galuega iinei. Ua faatuina siteki o Siona ma ua aloa’ia Au fanau i lo latou faatuatua ma lo latou mama. O fale o tapuaiga, o le anoanoai o i latou, ma a’oga o le aoaoina ua fausia i luga o nei laueleele, mo faamanuiaga o Ou atalii ma afafine o loo nonofo iinei. Ma o lenei, o le palealii o nei mea uma, ua matou fausia ai Lou maota paia.
Tama, e matagofie ia i matou. Tau ina ia matagofie ma taliaina e Lau Afio. Tau ina ia uunaia i loto o i latou uma o e vaai atu i ai, ia iloa o Lou malutaga. Ma tau ina ia lagona e i latou uma o e ulu mai i ona faitotoa, Lou Agaga Paia ma faatautaia i latou lava o Au tagata paia e sili ona E fiafia i ai.
O lenei, i le suafa o Iesu Keriso, ma i le pule o le Perisitua Paia ua tuuina mai ia i matou, ma i lalo o le tofiga mai Lau perofeta, o Peresitene Spencer W. Kimball, matou te faapaia atu ai i Lau Afio lenei, le Malumalu o Apia Samoa o Le Ekalesia a Iesu Keriso o le Au Paia o Aso e Gata Ai, e aofia ai le fausaga ma ona vaega uma, fale ma meaafale, faatasi ai ma lotoa ma togalaau o loo siomia ai ma fale o loo i talaane e faaopoopo i ai. Matou te ole atu ia e talia nei mea o le meaalofa a o matou lima ma o matou loto. Sei E taliaina lenei malumalu o se taulaga na tuuina atu ma le fiafia ona o le alofa o Lou nuu mo Lau Afio, le Elohima sili, ma Lou Alo Pele, lo matou Togiola soifua, le Alii o Iesu Keriso. Tau ina ia avea moni lava o Lou Maota Paia, ma ia fiafia Lau Afio ma Lou Alo e asiasi mai i ai ma faapaiaina i lo Lua afifio ai. Matou te tatalo ina ia lagonaina pea Lou Agaga Paia iinei.
Matou te faapaiaina mo le faatinoina o na sauniga paia ia ua saunia e Lau Afio i Lou alofa mutimutivale mo faamanuiaga e faavavau a Ou atalii ma afafine. Tau ina ia maua e Au fanau faamaoni iinei o latou mulumuluga ma faauuga ma ta’umamaina ai i Ou luma. Tau ina ia latou maua faaeega paia ma ulu atu i feagaiga ma Lau Afio. Tau ina ia latou maua o latou faamauga e faavavau, e fofogaina i lalo o le pule o le Perisitua Paia, ina ia mafai ona tuufaatasia tane ma ava ma fanau o ni aiga i se sootaga e faavavau o le alofa ma le mafutaga faalesoa.
Sei E soisoi mai ma le fiafia i lenei maota paia ma faasaoina ai ma puipuia e ala i Lou mana. Ia e faatauma’oia fuafuaga a soo se tasi o le a taupulepule e faatama’ia pe faaleagaina i soo se auala. Tau ina ia matagofie le lotoa o loo tu ai i luga i le mutia, o fugalaau, o pupulaau, ma laau o Lau foafoaga. Tau ina ia faasaoina le fausaga i ona itu uma mai faatamaiaga o le natura ma soo se mea faatafuna po o mea taufaaleaga a le tagata. Tau ina ia galue lelei le fale i ona itutino uma. Tau ina ia asiasi soo mai i ai Lou nuu o lenei tupulaga ma tupulaga fai mai ma faaaoga mo le faataunuuina ai o Ou faamoemoega paia ia manatua pea a o latou faia na mea, o i latou o ni malo i Lou maota paia.
Matou te talosagaina Au faamanuiaga filifilia i luga o le peresitene o le malumalu ma ona fesoasoani, o e o le a auauna atu i le taimi nei ma i latou o le a galulue i tausaga a sau. E faapena foi ona matou talosagaina Au faamanuiaga i luga o i latou uma o e o le a galulue iinei o ni tagata faigaluega ma ni tagata ulu. Tau ina ia lagonaina uma Lou afio paia ai, ma ia gauai atu pea o latou loto i uunaiga a Lou agaga.
Sei E tatalaina le ala mo Lou nuu e saili ai talafaamaumau o o latou tuaa ina ia mafai ai ona latou auauna atu o ni faaola i luga o le Mauga o Siona i le tatalaina o faitotoa o le falepuipui o i latou o e ua taofia lo latou alualu i luma i talaatu o le veli, ina ia mafai nei ona avea i latou nei ma faamanuiaga o sauniga paia o Lou Maota Paia, ma agai atu ai i luma i le ala i le ola e faavavau ma le faaeaga i Lou afioaga.
Le Tama oi le Lagi matou te manatua i luma o Lau Afio, Lau auauna, o Spencer W. Kimball. Matou te faanoanoa i lona toesea ai i lenei sauniga tele ma le paia ma talosagaina Au faamanuiaga faapitoa i ona luga. E alolofa tagata o Lau Ekalesia i le lalolagi atoa ia te ia ma tatalo ina ia E faaopoopo lona soifua e tusa ai ma Ou faamoemoega paia ma le faataunuuina o Au fuafuaga. Ua matou iloa o Lau galuega lenei ma o le a E pulea e tusa ai ma Lou finagalo ma le poto.
O lenei, Le Tama e, tau ina ia tu lenei malumalu o se faatusa o le faatuatua ma le amiosa’o o Lou nuu, ma lo latou malamalama, na tuuina mai faalelagi, e uiga i le tino ola pea o le agaga. Tau ina ia aliae mai ai se agaga o le filemu ma le amiotonu lea o le a o’o atu i totonu o aiga o Lou nuu ina ia i ai le alofa ma le lotogatasi i totonu o na aiga ma ia taofia mai iina mea leaga uma. Ia oo lava foi ia i latou e le auai i le Ekalesia se aafiaga e uiga i Lou agaga paia e susulu mai i lenei, Lou Maota Paia.
Le Tama Pele e, talia mai la matou faafetai mo lenei faamanuiaga ma le tele o isi ua E liligiina mai ma le agalelei i o matou luga. Silasila mai ma le alofa ia i matou o Au fanau ma fesoasoani ia i matou ia savavali ma le tatau ai i Ou luma. Matou te faamamalu i Lau Afio. Matou te alolofa i Lau Afio. Matou te tapuai atu i Lau Afio ma tuu atu la matou tatalo o le faapaiaga i Lau Afio, i le suafa o Lou Alo Pele, le Alii o Iesu Keriso, amene.