Ko hono Maluʻi e Fānaú mo e Toʻu Tupú
Kuo pau ke fakakakato ʻe he kau taki mo e kau faiako kotoa pē ʻo e fānaú mo e toʻu tupú ʻa e akó ni ʻi loto ʻi he māhina ʻe taha mei hono uiuiʻi kinautolú.
ʻOku hoko ʻa e ngaahi ʻekitivitī mo e ngaahi kalasi ʻa e Siasí ko ha ngaahi faingamālie ia maʻá e fānaú mo e toʻu tupú ke nau ongoʻi ai e ʻofa ʻa e Fakamoʻuí mo e ivi tākiekina ʻo e Laumālie Māʻoniʻoní. Lolotonga e kau mai ʻa e fānaú mo e toʻu tupú, ʻoku fiemaʻu ke nau ongoʻi malu mo maluʻi kinautolu. ʻOku totonu ke muimui e kau takí mo e kau faiakó ʻi he sīpinga ʻo e ʻofa mo e tokanga ʻa e Fakamoʻuí ki he fānaú.
ʻOku fakamatalaʻi ʻi he akó ni e founga ke ʻiloʻi mo fakaʻehiʻehi ai mei he ngaohikovia fakaesinó, fakasekisualé, leá, mo ha toe faʻahinga kehe pē ʻo e ngaohikoviá. ʻE lava foki ke tokoni atu e maʻuʻanga tokoni ʻoku ʻoatu ʻi laló ke ke ʻiloʻi mo ke fakaʻehiʻehi mei he ngaohikoviá. ʻOku ʻomi ʻe he akó ha ngaahi tūkunga fakatātā ke tokoni ke mahino lelei ange kiate koe mo ke moʻui ʻaki e ngaahi tefitoʻi moʻoni mo e ngaahi tuʻutuʻuni mahuʻingá.
Ngaahi Tefitoʻi Moʻoni mo e Ngaahi Tuʻutuʻuni Mahuʻinga ne Fakamatalaʻi ʻi he Akó
- ʻOku finangalo e ʻEikí ke tau fai e ngaahi meʻa kotoa pē te tau ala lavá ke fakaʻehiʻehi ai mei he ngaohikoviá pea maluʻi mo tokoniʻi ʻa kinautolu kuo ngaohikoviʻí.
- ʻOku ʻikai tali ʻe he Siasí ʻa e ngaohikoviá ʻi ha faʻahinga founga pē. ʻOku maumauʻi ʻe he ngaokoviá ʻa e ngaahi fono ʻa e ʻOtuá pea lava pē ke toe maumauʻi foki mo e ngaahi lao ʻo e sosaietí.
- ʻI he taimi ʻoku akoʻi ai ʻe he kakai lalahí ʻa e fānaú pe toʻu tupú ʻi ha ʻātakai ʻo e Siasí, “ʻoku totonu ke ʻi ai ha kakai lalahi [fakapotopoto] ʻe toko ua” (Tohi Tuʻutuʻuni Fakakātoa: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, Classes for Youth [ʻŪ Kalasi maʻá e Toʻu Tupú]—13.4.1 mo e Ko e Maluʻi ʻo e Fānaú, 12.5.1).
- “Kuo pau ke ʻi ai ha kakai lalahi ʻe toko ua pe lahi ange ʻi he ngaahi ʻekitivitī kotoa ʻa e Siasí ʻoku kau ai e toʻu tupú mo e fānaú” (Tohi Tuʻutuʻuni Fakakātoa, Tokangaʻi ʻe ha Kakai Lalahí20.7.1).
- Fakaʻehiʻehi mei he fetuʻutaki fakataautaha lōloa mo e fānaú pe toʻu tupú, pea fetuʻutaki maʻu pē mo e ngaahi mātuʻá pe tauhi fānaú kau ki he ngaahi ʻekitivitií pe ngaahi fiemaʻú.
ʻI he Taimi ʻOku Hoko Ai ha ʻUlungaanga Taʻefeʻunga pe Ngaohikovia, ʻOku Totonu Ke Ke Ngāue Vave Leva ke Maluʻi e Fānaú pe Toʻu Tupú.
US mo Kānata
Kapau te ke ʻilo ha ngaohikovia, ʻoku totonu ke ke fetuʻutaki ki ha kau maʻu mafai fakalao ʻi he vave tahá. ʻOku totonu foki ke ke talanoa mo hoʻo pīsopé pe palesiteni fakasiteikí, he te ne tā telefoni ki he laine tokoni maʻá e ngaohikoviá ke maʻu ha fakahinohino ki hono tokoniʻi e niʻihi ne uesiá mo fakakakato e ngaahi fiemaʻu ki hono lipōtí.
Ngaahi fonua mavahe mei he U.S. mo Kānatá
Ako ʻa e founga mo e taimi ʻoku totonu ke ke lipooti ai ʻa e ngaohikoviá. ʻI he ngaahi fonua lahi, ʻe fie maʻu ke ke fetuʻutaki ʻi he vave tahá ki he kau maʻu mafai fakalaó. Talanoa mo hoʻo pīsopé pe palesiteni fakasiteikí ki ha fakahinohino. Kapau ʻoku ʻikai maʻu e laine tokoni maʻá e ngaohikoviá ʻi hoʻo fonuá, ʻe fakataha ʻa e pīsopé mo e palesiteni fakasiteikí mo e ʻōfisi ʻo e ʻēliá ke ʻilo e founga totonu ki hono lipooti ʻo e ngaohikoviá mo maluʻi e tokotaha naʻe ngaohikoviá.
ʻOku fiemaʻu ʻe he fānau mo e toʻu tupu kuo ngaohikoviá ʻa e ʻofá mei he kau taki tataki fakalaumālie ʻo e Siasí, kau mēmipa ʻo e fāmilí, mo ha niʻihi kehe, kau ai e kau palōfesinale kuo fakataukeiʻí, ʻa ia te nau lava ʻo tokoni ke nau fehangahangai mo e ngaahi nunuʻa fakaʻauha ʻo e ngaohikoviá. ʻE hanga ʻe he mālohi faifakamoʻui ʻo e Fakamoʻui ko Sīsū Kalaisí ʻo fakamaʻamaʻa e ngaahi kavengá mo ʻomi ha ivi ke ikunaʻi ʻaki e filí.
Kātaki ʻo vakai ki he Ngaahi Fehuʻi ʻOku Lahi Hono ʻEké ʻa ia ʻoku ʻoatu ʻi laló ke maʻu ha fakamatala lahi ange fekauʻaki mo e ako ko ʻeni he ʻinitanetí mo e founga ke fakaʻehiʻehi mo tali ʻaki e ngaohikoviá ʻi hoʻo fatongiá.
Ngaahi Fehuʻi Angamahení
Ko hai ʻoku fiemaʻu ke ne fakakakato ʻa e akó?
Ko e kakai lalahi kotoa pē ʻoku ngāue mo e fānaú pe toʻu tupú kuo pau ke nau fakakakato ʻa e Ako ki hono Maluʻi ʻo e Fānaú mo e Toʻu Tupú. ʻOku poupouʻi atu mo e kakai lalahi kehe kotoa pē ke nau fakakakato ʻa e ako ko ʻení.
Ko e fehokotakiʻanga ʻeni ʻo e ngaahi uiuiʻi ʻoku fiemaʻu ke nau fakahoko ʻa e akó.
Ko e hā e lōloa ʻo e akó?
ʻOku totonu ke miniti nai ʻe 30 hono fakakakato e akó ni.
ʻE tuʻo fiha ʻeku fakahoko e akó?
Kapau ʻoku ʻi ai haʻo uiuiʻi ke ngāue mo e fānaú pe toʻu tupú, ʻe fiemaʻu ke ke fakahoko fakataʻu tolu e akó ni. Te ke maʻu ha ʻīmeili ʻo fakamanatu atu kimuʻa ʻi he ʻaho ʻe ʻosi ki ai hoʻo akó.
ʻOku kaunga nai e akó ni ki he ngāue fakaetauhí?
“ʻOku ʻikai fakaʻaongaʻi ʻa e fakahinohino ko ia ke ʻi ai maʻu pē ha toko ua lalahi falalaʻanga mo e toʻu tupú, ki hono vahe e ngaahi hoa ngāue fakaetauhí. Ka neongo ia, ʻi he fakahinohino ʻa ʻenau pīsopé, ʻoku totonu ke fakapotopoto ʻa e kau takí mo feinga ke maʻu ha tataki fakalaumālie ʻi he taimi ʻoku nau vahe ai e toʻu tupú ke hoa ngāue mo e kakai lalahí. ʻOku nau fekumi foki ki ha fakahinohino mei he pīsopé ʻi he taimi ʻoku vahe ai ha toʻu tupu ki ha hoa ʻoku ʻikai ko ha taha ʻo ʻene ongomātuʻá, ʻe fakapapauʻi ʻe he kau takí ʻoku ʻikai taʻeloto ʻa e mātuʻá ki he ngāue naʻe vahé.
“ʻOku totonu ke fakaʻehiʻehi ʻa e ngaahi hoa kakai lalahí mei ha ngaahi tūkunga ʻe ala maʻuhala. Te nau tokanga ʻi he ngaahi tūkunga tatau toko tahá. Te nau tokoni ke maʻu ʻe he toʻu tupú ha aʻusia malu mo fakafiefia ʻi he ngāue fakaetauhí” (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, Ngāue Fakaetauhi ʻOku Vahe ki he Toʻu Tupú 21.2.2, ChurchofJesusChrist.org).
ʻOku liliu nai heni e tuʻutuʻuni ki he ngaahi ʻinitaviu mo e toʻu tupú?
“Ko e taimi te nau talanoa ai mo e toʻu tupú, ʻe muimui ʻa e kau takí ki he ngaahi tefitoʻi moʻoni ko ʻeni ʻi he 31.1. ʻOku mātuʻaki mahuʻinga ha konga lahi ʻo e ngaahi tefitoʻi moʻoni ko ʻení ʻi he talanoa mo e toʻu tupú” (Tohi Tuʻutuʻuni Fakakātoá: Talanoa mo e Toʻu Tupú, 31.3.1, ChurchofJesusChrist.org).
ʻE fiemaʻu nai ke u toe fakahoko ʻeni kapau te u hiki ki ha uooti pe kolo ʻe taha?
ʻIkai. ʻOku ʻaonga e ako ko ʻení ʻi ha taʻu ʻe tolu.
ʻE fiemaʻu nai ke u hū ki loto ki he polokalamá ke u lava ʻo vakai ki he akó ni?
ʻIo, ʻe fiemaʻu ke ke hū ʻaki ho ʻAkauni ʻi he Siasí. Kapau ʻoku ʻikai fehokotaki hoʻo ʻAkauni ʻi he Siasí mo hoʻo Fika Lekooti Mēmipasipí (FLM), ʻe fiemaʻu ke ke fakahū e fakamatala ko iá kimuʻa pea fakakakato e akó ka ʻikai he ʻikai lekooti ia kuó ke fakakakato e akó.
Ke fakafehokotaki hoʻo FLM mo hoʻo ʻAkauni ʻi he Siasí, ʻuluaki kumi hoʻo FLM ʻi hoʻo lekomeni temipalé pe kole ki ho kalake fakauōtí pe taki ʻe taha ʻo e Siasí ke ne kumi ʻi he ChurchofJesusChrist.org pe ʻi hoʻo polokalama Member Tools. ʻI hono maʻu pē ho FLM, ʻalu ki he konga ki he mēmipasipí ʻi hoʻo ʻAkauni ʻi he Siasí. Ke maʻu ha fakamatala lahi ange, vakai ki he Tokoni ʻi he ʻAkauni ʻi he Siasí.
ʻE ʻiloʻi fēfē ʻe he kau takí ʻa e niʻihi ʻoku fiemaʻu ke nau fakakakato e akó?
ʻE malava e kau pīsopé mo e kau kalake fakauōtí ʻo vakai ki ha lisi ʻo e kāingalotu ʻoku fiemaʻu ke nau fakakakato e akó ʻi he konga Maʻuʻanga Tokoni ʻa e Takí mo e Kalaké ʻi he ChurchofJesusChrist.org. ʻE liliu maʻu pē ʻa e lisi ko ʻení ki he liliu fakamuimuitahá.
ʻI heʻeku hoko ko ha taki lakanga fakataulaʻeikí, ko e hā ʻoku fiemaʻu ke u ʻiloʻi kimuʻa pea fakahoko ha uiuiʻí?
ʻOku kole atu ke fakakakato ʻe he kau taki mo e kau faiako ʻa e fānaú mo e toʻu tupú e akó ʻi loto ʻi ha māhina ʻe taha mei hono hikinimaʻi kinautolú, ʻo kapau ʻe lava.
ʻE lava nai ha faʻahinga taha pē ʻo kau ki he akó ni?
ʻIo. Makehe mei he niʻihi ʻoku ngāue mo e fānaú mo e toʻu tupú, ʻoku talitali lelei foki e mātuʻá mo e niʻihi kehé ke nau fakakakato e akó.
ʻOku fiemaʻu nai ha kakai lalahi ʻe toko ua ʻi he taimi ʻokú na fetuku ai e toʻu tupú ʻi ha meʻalele fakataautaha?
“Kapau ʻe lava, ʻoku ʻikai totonu ke nofo toko taha ha taha lahi mo ha toʻu tupu ʻi ha meʻalele tukukehe kapau ko e toʻu tupú ko ʻene fānau tonu (Tohi Tuʻutuʻuni Fakakātoa 20.7.7).” ʻOku taau ke fakaʻuli ha taha lahi ʻi ha meʻalele mo ha toʻu tupu ʻe toko ua pe tokolahi ange. Ko e tefitoʻi moʻoní ke taʻofi ha fetuʻutaki fakataautaha ʻi he vahaʻa ʻo ha taha lahi mo ha toʻu tupu ʻoku ʻikai ko ʻene fānau tonu ʻi he taimi kotoa pē ʻe lava aí. ʻOku totonu ke palani fakalelei ʻe he kau takí ʻa e ngaahi fokotuʻutuʻu ki he fefonongaʻakí koeʻuhí ke lava ʻo muimuiʻi ʻa e tefitoʻi moʻoni ko ʻení, kau ai ʻa e fakafekauʻaki ʻo e ngaahi feituʻú mo e ngaahi taimi ʻoku fefonongaʻaki holo aí.
Fiemaʻu tokoni?
Kapau ʻokú ke fiemaʻu tokoni ʻi hono faʻu ha ʻakauni ke hū ai ki he ngaahi maʻuʻanga tokoni ʻa e Siasí, ʻalu ki hoʻo kalake fakauōtí pe fakasiteikí. Te ke lava foki ʻo talanoa ki hoʻo kau takí kapau ʻokú ke fiemaʻu ha komipiuta ke fakakakato ai e akó.
Kapau ʻokú ke fepaki mo ha ngaahi palopalema ʻi he akó, lomiʻi ʻi he Feedback ko ʻení pe ʻi he konga ki lalo ʻo e pēsí.
Fēfē kapau ʻoku ʻikai tali heni ʻeku fehuʻí?
Kātaki ʻo ʻave hoʻo fehuʻí ʻaki ho lomiʻi heni ʻi he Feedback pe ʻi he konga ki lalo ʻo e pēsí.
Ngaahi Maʻuʻanga Tokoni ʻa e Siasí
- abuse.ChurchofJesusChrist.org
- Ngaahi Maʻuʻanga Tokoni Faifaleʻí: Ngaohikoviá (Tokoni ki he Tokotaha Mamahí) maʻá e Kau Taki Fakauōtí mo Fakasiteikí
- Ngaahi Tefito mo e Ngaahi Fehuʻí: Ngaohikoviá
- safety.ChurchofJesusChrist.org
Ngaahi Maʻuʻanga Tokoni ki he Lipōtí
- “ʻOkú ke Fepaki mo ha Faingataʻa? Talanoa he taimí ni ki ha taha.” (abuse.ChurchofJesusChrist.org)
- Ngaahi lao ʻa e siteití ki hono lipooti ʻo e ngaohikoviá