Vakabauta ena Cakacaka ni Veivakabulai


Ni bera ni’u tekivutaka na noqu vosa, au via taura na gauna oqo me’u vakavinavinakataki kemuni ena nomuni vakanuinui vinaka ena gauna dredre oqo ni nona mai takali na watiqu daulomani, o Francis. Au sa vakaukauwataki ka tokoni ni’u mai vakila na nomuni loloma kei na nomuni masu ena vukuqu.

Me baleti Sisita Monson kei au, na cakacaka vakaulotu e sa dau tiki tu ni lomai keirau kei na neirau bula vakatautauvata. Keirau a se qai vakamau vou toka ga ni’u sa kacivi me’u veiqaravi vaka-bisopi ni iKaono-Kavitu ni Tabanalevu makawa e Salt Lake City—e dua na tabanalevu ka kovuta e dua na udolu walusagavulu na lewenilotu. E a so tu na iwiliwili lewenilotu luluqa ena tabanalevu, ka dau veitokoni ka veivakayaloqaqataki voli o Sisita Monson ni’u veisiko vata kei rau na noqu daunivakasala vei ira na lewenilotu talei oqo ka cakacaka ni kauti ira tale mai ki na itaviqaravi.

E vica tale na yabaki emuri au a kacivi me’u veiqaravi vaka-peresitedi ni Kaulotu e Kenada. Ni se bera ni cava na vula ni kena yaco oti na veikacivi, au a biuta tu mai vata kei Sisita Monson na neirau itikotiko tara vou ka toso yani vata kei na rua na gonelalai kei na dua ka sa voleka tiko mai, ki Toronto, Ontario, Kenada, ka a mai yaco kina na cakacaka vakaulotu me neirau bula voli ena tolu na yabaki veitaravi.

Me’u qai vakadeitaka na veika kece esa mai tukuni eke edaidai. Au vakadinadinataka vei kemuni ni ko ni na vakalougatataki ena nomuni muria na ivakasala o ni sa mai ciqoma.

Na ivolanikalou tabu eso e sega ni taukena na ivakaro e yaga vakaoti, sega na itaviqaravi e veivauci vakaoti, sega na ivakasala e dodonu vakaoti mai na idusidusi a solia na Turaga sa tucaketale ena Nona rairai mai Kalili kivei iratou na tisaipeli le tinikadua. A tukuna o Koya: “O koya mo dou qai lako, ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu.” (Maciu 28:19) A vakatakila na Parofita o Josefa Simici: “Ni sa oti kece na ka sa mai tukuni, na itavi levu ka bibi duadua oya na vunautaki ni Kosipeli.” Eso vei kemuni eke edaidai o ni na rawa ni nanuma na vosa nei Peresitedi David O. McKay, ka a tukuna na vosa kilai levu “Na lewenilotu kece e daukaulotu!” E tukuna vei keda o Peresitedi Gordon B. Hinckley, “E vuqa vei keda e raica tu na cakacaka ni kaulotu me veisiko tu ga ni veikilai. O ira kece e sa matau ena cakacaka oqo ena kila ni tiko e dua na sala ka vinaka cake. Na sala oya ena basika mai vei ira na lewe ni Lotu.”

Ki na nodra vosa au sa vakuria na noqu vakaiau: Oqo na gauna mera lako vata mai kina na lewenilotu kei na daukaulotu, mera cakacaka vata, mera veiqaravi ena loga ni vaini ni Turaga ka kauta mai na yalo kivei Koya. E sa vakarautaka tu o Koya na veika meda wasea kina na kosipeli ena sala e vuqa, ka na vukei keda o Koya ena noda veiqaravi kevaka eda na bulataka na vakabauta ka vakacavara na Nona cakacaka.

Ena gauna au a veiqaravi tiko kina vata kei Sisita Monson ena tabana ni Kaulotu e Kenada, keirau a ivakadinadina kina ka vaqaqacotaki mai na vakabauta titobu ni Lewenilotu e Kenada. Na iwase ni vidio oqo e vakaraitaka na vakabauta kei na cakacaka ni lewenilotu kei na daukaulotu ena neimami tabana ni kaulotu ka ra a bula ka veiqaravi e St. Thomas.

Dua tale na ivakadei ni vakabauta a vakayacori ni’u a sikova taumada na Tabana o St. Thomas ni kaulotu, ka toka ni rauta e 120 na maile mai Toronto. Keirau a sureti vakaveiwatini me keirau tiko ena soqoni ni sakaramede ni tabana ka vosa ekea vei ira na lewenilotu. Ni keirau draiva voli ena dua na tolo ni sala vakaiukuuku, keirau a raica e vuqa na valenilotu ka vakilakila se evei vei ira e noda. A sega ni dua. Keirau a qai kunea na yaca ni itikotiko ka a soli vei keirau ka dikeva rawa na vanua ni soqoni me dua na vale makawa sara. A soqoni voli na neimami tabana ena buturara ni vale makawa sara ka lewena tiko e rauta ni ruasagavulu ka lima na lewenilotu, ka tinikarua vei ira a tiko rawa. O ira vakatautauvata ga ka ra tiko era liutaka na soqoni, masulaka ka veisoliyaka na sakaramede, cabora na masu ka lagata na serenilotu eso.

Ni sa cava na soqoni, a kerea o Irving Wilson, na peresitedi ni tabana, ke rawa ni sota vata kei au. Ena veisotari oqo, a dulaka kina vei au okoya e dua na ilavelave ni Improvement Era, na mekasini taumada ka sa mai sosomitaka na Ensign edaidai. Ni dusia tiko na iyaloyalo ni dua na noda valenilotu e Ositerelia, e dua na valenilotu vou, a cauraka o Peresitedi Wilson, “Oqo na vale keimami gadreva eke e St. Thomas.”

Au a dredre ka sauma yani, “Ni da sa taukena rawa na iwiliwili ni lewenilotu me vakadeitaka ka me sauma na vale vakaoqo, au kila vakaidina ni da na taukena e dua.” Ena gauna oya, a gadrevi taumada vei ira na lewenilotu ekea mera rawata e 30 na pasede na isau ni vanua me tara kina kei na vale, me ikuri ni sausaumi ni ikatini kei na isolisoli tale eso.

A sauma lesu o Peresitedi Wilson, “Sa ra tubu cake ka yalomatua tiko mai na luvei keimami. Keimami sa gadreva na vale oqo, ka keimami sa gadreva saraga oqo!”

Au a vakayaloqaqataki ira mera vakatubura na kedra iwiliwili mai na nodra sasaga vakaiira mera veicuqeni ka veivakatavulici. Na vatukana, kemuni na taciqu kei na ganequ, e sa dua na ivakaraitaki duatani ni vakabauta, ka vakaikuritaki ena sasaga e vakavurea na tubu cake ni ivakadinadina.

A kerea o Peresitedi Wilson e ono tale na daukaulotu mera lesi ki na siti o St. Thomas. Ni sa mai vakayacori oqo, a kacivi ira na daukaulotu okoya ki na dua na soqoni ena rumu emuri ni nona sitoa ni vatutalei, ka ra mai tekiduru kina ena masu ni yalomalumalumu. Ena kena cava na masu, a qai kerea okoya e dua na daukaulotu me solia vua na ivola ni talevoni tabana dromodromo, ka toka ena teveli voleka ga. E taura o Peresitedi Wilson na ivola e ligana ka vakadeuca. “Kevaka meda na taukena rawa na noda valenilotu tatadrataki e St. Thomas, eda na gadreva e dua na Yalododonu Edaidai me droinitaka. Me vaka ni sega vei keda na lewenilotu ka daudroini, tou sa na saga me saumaki mai e dua.” Ni tosoya sobu tiko okoya na ligana ena ituva ni daudroini ena ivola, a cegu okoya ena dua na yaca ka kaya, “Oqo okoya ka datou na sureta ki na noqu itikotiko me rogoca na itukutuku ni Veivakalesuimai.”

A vakamuria o Peresitedi Wilson na ivalavala vakaoqo vei ira na daucaka paipo, daunilivaliva kei na kenadau ni veika tale eso. Sega ni vakasavuliga okoya ki na veitavi vakacakacaka tale eso, ena nona gagadre tiko ki na dua na tabana veiraurau vinaka. Era a sureti kece na tamata yadua ki na nona itikotiko mera veisotari kei na daukaulotu, a vakatavulici na dina, a wasei na ivakadinadina eso ka sa mai yaco vakakina na saumaki. Sa ra qai vakatatamuria na ivalavala oqo o ira ka ra sa papitaiso vou, ena nodra sureti tale eso mera rogoca: ena macawa veitaravi kei na vula veitaravi e tomani tikoga na ivalavala.

A sotava na Tabana o St. Thomas na tubu vakasakiti. Ena loma ni rua veimama na yabaki, a vakarautaki kina e dua na vanua, a tara kina e dua na valenilotu totoka, ka yaco me mai ivakadinadina ni dua na tatadra veivakurabuitaki. Na tabana oya e sa dua tu oqo na tabanalevu vacakacakaikoya ena dua na iteki kei Saioni.

Ni’u vakasamataka na tauni e St. Thomas, au sega ni tacegu ena vica na drau na lewenilotu ena tabanalevu kei na daseni e vuqa ni matavuvale, ia, a veivakananumi kau lesu tale ki na soqoni ni sakaramede lailai oya ena buturara ni vale makawa, tinikarua na tamata, kei na yalayala ni Turaga, “Ia ena tikina sa soqoni vata kina e lewe rua se lewe tolu ena yacaqu, au sa tiko kina ena kedratou maliwa.” (Maciu 18:20)

Sa oti e vica vata na yabaki mai na katoni ni vidio oya. Na domo o ni rogoca e se gone toka, ia na ivakavuvuli ni vakabauta ka okati ki na cakacaka vakaulotu e se dina tu ga vakakina edaidai me vaka na veimama ni senituri sa oti ena Tabana e St. Thomas.

Au vakadinadinataka ni gauna eda cakacaka kina ena vakabauta na Turaga ena vakaraitaka vei keda na iwalewale ni kena vaqaqacotaki na Nona Lotu ena tabanalevu kei na tabana eso eda vakaitikotiko kina. Ena tiko vata kei keda o Koya ka na mai dua na itokani bulabula ena noda veiqaravi vakaulotu.

Ni tosocake na iwiliwili ni daukaulotu ena tabanalevu kei na iteki e vuravura taucoko, au vakamasuti kemuni mo ni cakacakataka na nomuni vakabauta, me vaka a cakava o Peresitedi Wilson e St. Thomas, ni ko vakasamataka ena masumasu se o cei ena nomu matavuvale, nomu itokani, o ira era tiko wavoliti iko kei ira na nomu veikilai ko na vinakata mo na sureta ki na nomu itikotiko mera veisotari kei ira na daukaulotu, ka mera na rawa ni rogoca na itukutuku ni Veivakalesuimai. Me vaka a vakayacora na Turaga ena koro levu e St. Thomas, ena vakatabuya o Koya na nomu sasaga eso, ka ko na rawata na kaukauwa e levu cake mai vei iko mo tabeya ka vakalougatataka kina na nodra bula tale eso.

Meda qai vakalevutaka sara na noda vakabauta kei na yalodina ena kena vakacavari na noda ilesilesi tabu ni veivueti vei ira na luvena na Tamada Vakalomalagi—na tacida kei na ganeda. Ena yaca ni noda Turaga ka iVakabula o Jisu Karisito, emeni.