Ang ebanghelyo ni Jesucristo sarang magbugay sa imo pamilya

Huo! Bilang mga miyembro sang Ang Simbahan ni Jesucristo sang mga Santos sa Ulihing mga Adlaw, nagapati kami nga si Jesucristo Anak sang Dios kag Manluluwas sang Kalibutan. Palangga Niya kita tanan masobra pa sang aton maintiendihan. Ginakabig namon ang amon mga kaugalingon nga debotado nga mga sumulunod ni Jesus. Bisan nga ang iban namon nga ginapatihan may kinalain gid, nagapati kami nga paagi sa Iya kabuhi, pag-alagad, sakripisyo, kag pagkabanhaw, ginaluwas kita ni Jesucristo sa sala, pag-antos, kag kamatayon.

Magtuon pa gid parte sa amon mga ginapatihan.

Ang oras kag iskedyul sang pagtipon sa simbahan nagalain-lain sa tagsa ka kongregasyon. Pero, may ara gid sang mayor nga pagtipon para sa tanan, nga ginasundan sang mga klase para sa kabataan, mga lamharon, kag mga hamtong.

Ang pagtipon para sa tanan ginatawag nga “sakramento nga miting.” Ini nga miting may mga kanta, mga pangamuyo, kag mga pamulong-pulong (ukon mga “sermon”) nga ginahatag sang lain-lain nga mga miyembro sang kongregasyon kada semana. Pero ang pinakaimportante nga bahin sang miting amo ang pag-ambit namon sang sakramento (nga pareho sa komunyon) agud dumdumon ang Manluluwas.

Magtuon pa gid parte sa pagsimba kon Domingo ukon magpangita sang simbahan nga malapit sa imo.

Para sa mga Santos sa Ulihing mga Adlaw, ang templo lain sa iban nga mga bilding sang Simbahan. Ang templo amo ang lugar kon diin nagabaton ang mga Santos sa Ulihing mga Adlaw sang espesyal nga instruksyon parte sa Dios kag kay Jesucristo. Sa templo, nagahimo ang mga miyembro sang wala katapusan nga mga kasugtanan (ukon promisa) sa Dios. Dala diri ang mga promisa nga tumanon ang mga kasugoan, ipangabuhi ang ebanghelyo ni Jesucristo, mangin tampad sa pag-asawahay, kag magbulig nga atipanon ang kada isa paagi sa pagpakigbahin sang kon ano nga ara sa aton.

Dugang pa dira, tungod nagapati kami nga ang mga pamilya wala katubtuban, laban sa trabaho nga ginahimo sa sulod sang mga templo amo nga mas pabakuron ang mga kaangtanan sang pamilya. Ginahiwat ang mga kasal sa templo para magdugay tubtob sa katubtuban, indi lang “tubtob sa kamatayon.” Ang mga ginikanan kag kabataan mangin wala katapusan nga mga pamilya sa mga templo. Ang mga kalolohan ninyo sarang man makabaton sang tanan nga bugay sang templo kon may maghikot sang sagrado nga mga ordinansa para sa ila kag kon batunon nila ina nga buhat sang pag-alagad. Masako sa sulod sang mga templo!

Ang Libro ni Mormon libro nga nagaunod sang inspirado nga balaan nga mga kasulatan nga nagatudlo sa aton parte sa Dios kag kay Jesucristo. Nagabulig ini sa aton nga makabaton sang direksyon para sa aton personal nga mga kabuhi kag makabulig sa aton nga mabatyagan nga mas malapit kay Jesucristo. Diin naghalin ang ngalan sini? Ginatos ka tuig ang nagligad, isa ka propeta nga ang ngalan Mormon nagtipon sang rekord sang iya katawhan. Nagpangatubang sila sang madamo nga pareho man nga mga hangkat sa aton. Kag pareho sa aton, nakaangkon sila sang kusog sang nagdangop sila kay Jesucristo. Magbaton sang introduksyon sa Libro ni Mormon sa mga misyonero.

Ang Libro ni Mormon nagatindog upod sa Biblia bilang isa pa gid ka saksi kay Jesucristo kag sa Iya diosnon nga misyon bilang Manluluwas kag Manunubos sang kalibutan. Magkaupod, ang Biblia kag ang Libro ni Mormon nagahatag sang dugang nga paghangop sa dako nga gugma sang Dios para sa aton tanan kag makabulig sa aton nga magpalapit pa gid sa Iya. 

Magtuon pa gid kon paano nagabuligay ang Biblia kag Libro ni Mormon.

Huo. Ang Biblia pulong sang Dios, sagrado nga grupo sang balaan nga kasulatan, kag ang pagsunod sa mga pinanudlo sini nagadala sang kalipay sa aton mga kabuhi. Upod sa Biblia, makakita man kami sang inspirasyon sa iban nga mga libro sang balaan nga kasulatan nga pinasahi sa Ang Simbahan ni Jesucristo sang mga Santos sa Ulihing mga Adlaw. Ini tanan nagabuligay para tudloan kita sang importante nga mga kamatuoran parte sa Dios kag kay Jesucristo.

Magtuon pa gid parte sa amon ginapatihan sa Biblia.