Jesucristo evanhélio ikatu ohovasa nde rekove

Héẽ! Jesucristo Tupao Santokuéra Ára Pahapegua miembro ramo, roguerovia Jesucristo ha’eha Tupã Ra’y ha Yvóra Salvahára. Ha’e ñande rayhuve opavavépe ñande ikatúvagui ñaimo’ã. Rojehecha ha’éramo Jesús segihakuéra ijeroviarekóva. Oĩramo jepe ore jegueroviapy iñambuéva, ore roguerovia Hekove, iministério, hemikuave’ẽ, ha ijeikovejey rupive, Jesucristo ñande salvaha angaipa, jehasa’asy ha ñemanógui.

Eñemoaranduve umi ore jegueroviapy rehegua.

Umi Tupaogua servicio religioso horario iñambue peteĩ kongregasiõgui ambuévape. Upevére, akói rejuhúta peteĩ tupãitũ servicio opavavépe g̃uarãva, osegívape umi clase mitã, mitãrusu, ha kakuaápe g̃uarã.

Opavavépe g̃uarã servicio-pe oñehenói “reunión sacramental”. Ko reunión-pe oike, umi purahéi, ñembo’e, ha sermón (térã “discurso-kuéra”) oñeme’ẽva kongregasiõgua miembro-kuérare iñambuéva káda semana. Ha katu pehẽ imba’eguasuvéva pe reunión-pe ha’e ropartisipávo pe Santa Cena-gui (ojoguáva pe comunión-pe) oremandu’a hag̃ua pe Salvador rehe.

Eñemoaranduve umi Domingo-gua servicio rehegua térã ejuhu peteĩ tupao ndehegui hi’ag̃uíva.

Santokuéra Ára Pahapeguápe g̃uarã, peteĩ templo ndaha’éi ambue Tupao edificio-kuéraicha. Pe templo ha’e peteĩ tenda Santokuéra Ára Pahapegua ohupytyhápe tekombo’e imbojojaháva Tupã ha Jesucristo rehegua. Templo-pe, miembro-kuéra ojapo umi konvénio ijapyra’ỹva (térã promésa) Tupã ndive. Kóvape oike umi promésa roñongatu hag̃ua tembiapoukapykuéra, rovivi Jesucristo evanhélio, orejeroviareko ñemendápe, ha roñopytyvõ roñangareko hag̃ua ojuehekuéra rokompartívo umi mba’e roguerekóva.

Avei, roguerovia rupi familiakuéra tapiaite g̃uarãha, hetave umi tembiapo templo-kuérape ojejapóva ha’e oñemombareteve hag̃ua jepe umi joaju familiar. Umi ñemenda templo-pegua ojejapo opyta hag̃ua ára apyra’ỹ meve, ndaha’éi “ñemano pende mboja’o peve” g̃uarã añónte. Túva/sy ha mitãnguéragui oiko familia ára apyra’ỹ meve g̃uarã templo-kuérape. Ypykuéra avei ikatu ohupyty opa umi templo-gua jehovasa peteĩ tapicha ojapóramo umi ordenánsa marangatu hesekuéra ha ha’ekuéra omoneĩ upe tembiapo servicio rehegua. Templo-kuéra ha’e tenda oĩha heta tembiapo!

Mormón Kuatiañe’ẽ ha’e peteĩ escritura kuatiañe’ẽ inspirádo ñanembo’éva Tupã ha Jesucristo rehegua. Ñanepytyvõ jahupyty hag̃ua ñeisãmbyhy ñande rekove teépe g̃uarã ha ikatu ñanepytyvõ ñañandu ñane’ag̃uiveha Jesucristo-re. Moõgui ou pe téra? Ojapo hetaiterei ary, peteĩ proféta yma hérava Mormón ombyaty peteĩ jehaipyre itavayguakuéra rehegua. Ha’ekuéra ombohovake heta umi mba’ehasýva ñande jahasávaicha. Ha ñandéicha, ojuhu hikuái mbarete ojere jave Jesucristo gotyo. Ehupyty Mormón Kuatiañe’ẽme ñepyrũmby misionero-kuéra ndive.

Mormón Kuatiañe’ẽ oĩ Biblia ykére ambue Jesucristo testamento ramo ha Imisiõ divína yvóra Salvador ha Redentor ramo. Oñondive, Biblia ha Mormón Kuatiañe’ẽ ome’ẽve ñeikũmby Tupã mborayhu tuicháre opavave ñanderehe ha ikatu ñanepytyvõ ñañemo’ag̃uive hag̃ua Hese. 

Eikuaave mba’éicha Biblia ha Mormón Kuatiañe’ẽ omba’apo oñondive.

Héẽ. Biblia ha’e Tupã ñe’ẽ, peteĩ escritura aty marangatu, ha jasegi ramo imbo’epykuéra ogueru vy’apavẽ ñande rekovépe. Biblia ndive, rojuhu avei inspirasiõ ambue escritura-kuéra kuatiañe’ẽme, ha’éva Jesucristo Tupao Santokuéra Ára Pahapeguaite. Opa umíva omba’apo oñondive ñanembo’e hag̃ua umi añetegua imba’eguasúva Tupã ha Jesucristo rehegua.

Eikuaave ore jegueroviapy rehegua Biblia-pe.