ʻOku fetongi ʻe he ngaahi foomu foʻou ʻo e Fakahinohino ‘a e Pīsopé ki he Palani ʻo e Moʻui Fakafalala Pē Kiate Kitá ʻa e ngaahi foomu lolotonga ki he Fakaikiiki ʻo e Ngaahi Fie maʻú mo e Ngaahi Maʻuʻanga Tokoní. Naʻe fakataumuʻa ʻa e ngaahi foomu foʻoú ke tokoniʻi e kau pīsopé mo e kau palesiteni fakakoló kenau toe ngāue tokoni lelei ange kia kinautolu ʻoku nau maʻu ʻa e ngaahi tokoni fakauelofeá pea tataki kinautolu ʻi he hala ki he moʻui fakafalala pē kiate kitá.
Fakahinohino ‘a e Pīsopé ki he Palani ʻo e Moʻui Fakafalala Pē Kiate Kitá. ʻOku fakaʻaongaʻi ʻe he kau Pīsopé mo e palesiteni fakakoló ke palani mo muimuiʻi ʻa e ngaahi tokoni fakauelofeá pea ke muimuiʻi foki ʻa e ngaahi palani fakafoʻituitui ʻa e kāingalotú ki he moʻui fakafalala pē kiate kitá.
Palani ‘o e Moʻui Fakafalala Pē Kiate Kitá ʻOku fakaʻaongaʻi ʻe he kāingalotú ʻa e foomu ko ʻení ʻiate kinautolu pē pe mo e tokoni ʻo e tokotaha faleʻí. ʻOku tokoni ʻa e fōmú ki he mēmipá ʻi hono fakafuofuaʻi ʻenau ngaahi fie maʻú, paʻanga hū maí, mo e ngaahi fakamolé; feinga ke ʻiloʻi ʻa e ngaahi maʻuʻanga tokoní, feinga ke ʻiloʻi ʻa e ngaahi ngāue tokoni ʻe lava ke nau fai ʻi he fetongi ki he tokoni ʻoku nau maʻú; pea fakatupulaki ʻenau palani ki he toe moʻui fakafalala lahi ange kiate kinautolu peé.
ʻOku faʻa fakatokangaʻi ʻa kinautolu koe kāingalotu ʻoku faingataʻaʻiá ʻe heʻenau kau tangata ngāue fakaetauhí mo e kau fefiné, kāingalotu kehe ʻo e Siasí pe kau takí, pe pīsopé. Mahalo te nau fekumi pē ʻiate kinautolu ʻa e tokoni ʻa e pīsopé.
ʻOku fakataha ʻa e pīsopé mo e kāingalotu ʻoku nau faingataʻaʻiá ke aleaʻi ko e hā ʻa e ngaahi faingataʻa ʻoku nau fehangahangai mo iá. ʻE lava ke fakaafeʻi ʻe he pīsopé ha taki pe ko ha tokotaha faleʻi ke tokoni ke fakakakato ʻa e foomu palani ‘o e moʻui fakafalala pē kiate kitá. ‘I hono toe vakaiʻi ʻo e palani ko ʻení, ʻe lava ke toe maʻu ʻe he pīsopé ha mahino lahi ange ki he founga ke fakahoko ai ha tokoni fakauelofea lelei ange. ʻOku toutou muimuiʻi leva ʻe he pīsopé pe tokotaha taki kuo vahe ki aí ʻa e mēmipá ke aleaʻi ha ngaahi toe fie maʻu makehe, hohaʻa, pea mo ha fakalakalaka ʻi he palaní.
Ngaahi Fōmú
Fakahinohino ‘a e Pīsopé ki he Palani ʻo e Moʻui Fakafalala Pē Kiate Kitá
