1 Karon akong anak, aniay akong idugang sa pagsulti kanimo; kay nakasabot ako nga ang imong hunahuna nabalaka mahitungod sa pagkabanhaw sa mga patay.

2 Tan-awa, sultihan ko ikaw, nga walay pagkabanhaw—o, ako moingon, sa laktod nga pagkasulti, nga kini nga mortal dili mahimong imortal, kini nga madunoton dili mahimong dili madunoton—hangtod human sa pag-anhi ni Kristo.

3 Tan-awa, siya ang mopahitabo sa pagkabanhaw sa mga patay. Apan tan-awa, akong anak, ang pagkabanhaw wala pa. Karon, akong ipadayag kanimo ang usa ka misteryo; bisan pa niana, daghan pa kaayong misteryo ang gitipigan, nga walay usa nga nasayod gawas lamang sa Dios. Apan ipakita ko kanimo ang usa ka butang nga makugihon nakong gipangutana sa Dios aron masayod ako—kabahin sa pagkabanhaw.

4 Tan-awa, adunay panahon nga gitakda nga ang tanan mobangon gikan sa mga patay. Karon kon moabot kini nga panahon walay usa nga nasayod; apan ang Dios nasayod sa panahon nga gikatakda.

5 Karon, kon adunay usa ka panahon, o ikaduha nga panahon, o ikatulo nga panahon, nga ang mga tawo mobangon gikan sa mga patay, dili kana importante; kay ang Dios nasayod sa tanang butang; ug igo na kanako nga masayod nga kini mao ang mahitabo—nga adunay gitakda nga panahon nga ang tanan mabanhaw gikan sa mga patay.

6 Karon kinahanglan gayod nga adunay gintang sa panahon sa kamatayon ug sa panahon sa pagkabanhaw.

7 Ug karon mangutana ko unsay mahitabo sa mga kalag sa mga tawo gikan niini nga panahon sa kamatayon hangtod sa panahon nga gitakda alang sa pagkabanhaw?

8 Karon bisan kon adunay labaw pa sa usa ka higayon nga gitakda nga mabanhaw ang mga tawo dili kini maoy importante; kay ang tanan dili magdungan sa pagkamatay, ug dili kini maoy importante; ang tanan sama og usa ra ka adlaw sa Dios, ug ang panahon gisukod lamang ngadto sa mga tawo.

9 Busa, adunay panahon nga gitakda nga ang mga tawo mabanhaw gikan sa mga patay; ug adunay gintang sa panahon sa kamatayon ug sa pagkabanhaw. Ug karon, mahitungod niini nga gintang sa panahon, unsa man ang mahitabo sa mga kalag sa mga tawo mao ang butang nga makugihon nakong gipangutana sa Ginoo aron masayran; ug mao kini ang butang nga akong nasayran.

10 Ug kon moabot na ang panahon nga ang tanan mabanhaw, nan makahibalo sila nga ang Dios nasayod sa tanang panahon nga gitakda alang sa tawo.

11 Karon, mahitungod sa kahimtang sa kalag tali sa kamatayon ug sa pagkabanhaw—Tan-awa, gipahibalo kini ngari kanako pinaagi sa usa ka anghel, nga ang mga espiritu sa tanang tawo, human sila mobiya gikan niining mortal nga lawas, oo, ang mga espiritu sa tanang tawo, maayo man o daotan, dad-on pauli ngadto niana nga Dios nga mihatag kanila sa kinabuhi.

12 Ug unya mahitabo, nga ang mga espiritu niadtong mga matarong pagadawaton ngadto sa kahimtang sa kalipay, nga gitawag og paraiso, usa ka kahimtang sa kapahulayan, usa ka kahimtang sa kalinaw, diin sila mopahulay gikan sa ilang tanang kasamok ug gikan sa tanang kabalaka, ug kasubo.

13 Ug dayon mahitabo, nga ang mga espiritu sa mga daotan, oo, kinsa mga daotan—kay tan-awa, sila walay bahin ni tipik sa Espiritu sa Ginoo; kay tan-awa, mipili sila sa daotang mga buhat kaysa maayo; busa ang espiritu sa yawa misulod kanila, ug nanag-iya sa ilang balay—ug itambog kini ngadto sa kawanangan sa kangitngit; adunay pagbakho, ug pagdangoyngoy, ug pagpangagot sa mga ngipon, ug tungod sa ilang kaugalingon nga kadaotan, kay nagpabihag sila sa kabubut-on sa yawa.

14 Karon mao kini ang kahimtang sa mga kalag sa daotan, oo, sa kangitngit, ug usa ka kahimtang sa makalilisang, makahahadlok nga talan-awon kay ang nagdilaab nga kasuko sa Dios anaa kanila; sa ingon niana nagpabilin sila niini nga kahimtang, ingon man usab ang mga matarong didto sa paraiso, hangtod sa panahon sa ilang pagkabanhaw.

15 Karon, adunay uban nga nakasabot nga kining kahimtang sa kalipay ug kining kahimtang sa kasakit sa kalag, sa wala pa ang pagkabanhaw, mao ang unang pagkabanhaw. Oo, moangkon ko nga kini mahimong tawagon og pagkabanhaw, ang pagkabanhaw sa espiritu o sa kalag ug paghatod kanila ngadto sa kalipay o kasakit, sumala sa mga pulong nga gipamulong na.

16 Ug tan-awa, kini gipamulong na usab, nga adunay unang pagkabanhaw, usa ka pagkabanhaw sa tanan niadtong wala na, o karon ania, o sa mga moanhi pa, sukad sa pagkabanhaw ni Kristo gikan sa pagkamatay.

17 Karon, wala kita magdahom nga kini nga unang pagkabanhaw, nga gipamulong niini nga paagi, mao ang pagkabanhaw sa mga kalag ug ang paghatod kanila ngadto sa kalipay o kasakit. Dili kamo makadahom nga kini mao ang gipasabot.

18 Tan-awa, sultihan ko ikaw, Dili; apan nagpasabot kini sa panaghiusa og balik sa kalag uban sa lawas, ngadto kanila gikan sa mga adlaw ni Adan ngadto sa pagkabanhaw ni Kristo.

19 Karon, kon ang mga kalag ug ang mga lawas niadtong gipamulong pagahiusahon og dungan, ang daotan ingon man ang matarong, wala ko mag-ingon; nga igo na nga mosulti ko nga silang tanan mobangon; o sa laing pagkasulti, ang ilang pagkabanhaw moabot sa dili pa ang pagkabanhaw niadtong kinsa namatay human sa pagkabanhaw ni Kristo.

20 Karon, akong anak, dili ko moingon nga ang ilang pagkabanhaw moabot atol sa pagkabanhaw ni Kristo; apan tan-awa, mohatag ko niini isip akong opinyon, nga ang mga kalag ug ang mga lawas pagahiusahon, sa mga matarong, sa pagkabanhaw ni Kristo, ug sa iyang pagkayab ngadto sa langit.

21 Apan kon atol man kini o human sa iyang pagkabanhaw, dili ko makasulti; apan kini ang akong isulti, nga adunay gintang tali sa kamatayon ug pagkabanhaw sa lawas, ug ang kalag anaa sa kahimtang sa kalipay o sa kasakit hangtod sa panahon nga gitakda sa Dios nga ang mga patay mobangon, ug mahiusa, ang kalag ug lawas, ug dad-on aron mobarog sa atubangan sa Dios, ug hukman sumala sa ilang mga binuhatan.

22 Oo, kini mopahitabo sa pagpahiuli niadtong mga butang nga gikapamulong na sa mga ba-ba sa mga propeta.

23 Ang kalag ipahiuli ngadto sa lawas, ug ang lawas ngadto sa kalag; oo, ug ang matag bahin sa lawas ug lutahan ipahiuli ngadto sa iyang lawas; oo, gani bisan usa ka buhok sa ulo dili mawala; apan ang tanang butang ipahiuli ngadto sa ilang tukma ug hingpit nga bayanan.

24 Ug karon, akong anak, kini mao ang pagpahiuli nga gipamulong na sa mga ba-ba sa mga propeta—

25 Ug dayon ang mga matarong mosidlak didto sa gingharian sa Dios.

26 Apan tan-awa, usa ka makalilisang nga kamatayon ang moabot sa mga daotan; kay mamatay sila sumala sa mga butang mahitungod sa pagkamatarong; kay mga hugaw sila, ug walay hugaw nga butang nga makapanunod sa gingharian sa Dios; apan isalikway sila ug ihatod sa pag-ambit sa mga bunga sa ilang mga kahago o sa ilang mga buhat, nga mga daotan; ug sila moinom sa mga lawog sa mapait nga kopa.