1 Apan tan-awa, adunay daghan—niana nga adlaw kon ako mosugod sa paghimo og kahibulongan nga buhat taliwala kanila, aron ako mahinumdom sa akong mga pakigsaad nga akong gihimo ngadto sa mga anak sa katawhan, aron ako makaandam pag-usab sa ikaduhang higayon sa pagbawi sa akong katawhan nga mga sakop sa balay ni Israel;

2 Ug usab, aron ako mahinumdom sa mga saad nga akong gihimo diha kanimo, Nephi, ug usab ngadto sa imong amahan, nga ako mohinumdom sa imong binhi; ug nga ang mga pulong sa imong binhi mogula sa akong ba-ba ngadto sa inyong binhi; ug ang akong mga pulong makusganon nga madungog ngadto sa kinatumyan sa yuta, alang sa usa ka sumbanan ngadto sa akong katawhan, nga sakop sa balay ni Israel;

3 Ug tungod kay ang akong mga pulong makusganon nga madungog—daghan sa mga Hentil ang moingon: Biblia! Biblia! Kami adunay Biblia, ug dili mahimo nga aduna pay lain nga Biblia.

4 Apan sa ingon niana miingon ang Ginoong Dios: O mga buang, makaangkon sila og Biblia; ug maggikan kini sa mga Judeo, nga akong karaan nga katawhan sa pakigsaad. Ug unsaon man nila sa pagpasalamat sa mga Judeo alang sa Biblia nga ilang nadawat gikan kanila? Oo, unsay buot ipasabot sa mga Hentil? Nakahinumdom ba sila sa mga pag-antos, ug sa mga kabudlay, ug sa mga kasakit sa mga Judeo, ug sa ilang kakugi ngari kanako, sa pagdala og kaluwasan ngadto sa mga Hentil?

5 O kamong mga Hentil, nahinumdom ba kamo sa mga Judeo, nga akong karaan nga katawhan sa pakigsaad? Wala; apan kamo mitunglo kanila, ug midumot kanila, ug wala maningkamot sa pagpahiuli kanila. Apan tan-awa, akong ibalik kaninyo kining tanan nga butang diha sa inyong mga ulo; kay ako ang Ginoo wala makalimot sa akong katawhan.

6 Mga buang kamo, nga moingon: Biblia, kami adunay Biblia, ug wala na kami magkinahanglan og lain pang Biblia. Nakakuha ba kamo og Biblia gawas kon kini gikan sa mga Judeo?

7 Wala ba kamo mahibalo nga aduna pay daghang nasod kay sa usa? Wala ba kamo mahibalo nga ako, ang Ginoo nga inyong Dios, milalang sa tanang mga tawo, ug nga ako nahinumdom niadtong anaa sa mga pulo sa dagat; ug nga ako nagmando sa ibabaw sa kalangitan ug sa ubos sa yuta; ug ako modala sa akong pulong ngadto sa mga anak sa katawhan, oo, bisan diha sa tanang kanasoran sa yuta?

8 Mao nga nganong magbagulbol kamo, tungod ba kay makadawat pa kamo og dugang sa akong mga pulong? Wala ba kamo mahibalo nga ang pagpamatuod sa duha ka nasod usa ka saksi nganha kaninyo nga ako ang Dios, nga ako mahinumdom sa usa ka nasod sama ngadto sa lain? Mao nga, mamulong ako sa mao gihapong mga pulong ngadto sa usa ka nasod sama ngadto sa lain. Ug kon ang duha ka nasod magkahiusa, ang pagpamatuod sa duha ka nasod magkahiusa usab.

9 Ug buhaton ko kini aron akong mapamatud-an ngadto sa kadaghanan nga ako mao kagahapon, karon, ug hangtod sa hangtod; ug nga ako mosulti sa akong mga pulong sumala sa akong kaugalingon nga kahimuot. Ug tungod kay ako nakasulti og usa ka pulong dili kamo angay magdahom nga ako dili na makasulti pa og lain; kay ang akong buhat wala pa matapos; ni kini matapos hangtod sa kataposan sa tawo, ni sukad niana nga panahon ug hangtod sa hangtod.

10 Mao nga, tungod kay kamo adunay Biblia dili kamo angay magdahom nga kini naglangkob sa akong tanan nga pulong; ni angay kamong magdahom nga ako wala na magpasulat pa og dugang.

11 Kay ako nagsugo sa tanang tawo, diha sa silangan ug sa kasadpan, ug diha sa amihanan ug sa habagatan, ug sa mga pulo sa dagat nga ilang isulat ang mga pulong nga akong gipamulong ngadto kanila; kay gikan sa mga basahon nga pagasulaton akong hukman ang kalibotan, matag tawo sumala sa ilang mga buhat, sumala niana nga nasulat.

12 Kay tan-awa, mamulong ako ngadto sa mga Judeo ug isulat nila kini; ug mamulong usab ako ngadto sa mga Nephita ug isulat nila kini; ug mamulong usab ako ngadto sa ubang mga tribo sa balay ni Israel, nga akong gidala palayo, ug isulat nila kini; ug mamulong usab ako ngadto sa tanang kanasoran sa yuta ug isulat nila kini.

13 Ug mahitabo nga ang mga Judeo makabaton sa mga pulong sa mga Nephita, ug ang mga Nephita makabaton sa mga pulong sa mga Judeo; ug ang mga Nephita ug ang mga Judeo makabaton sa mga pulong sa nawala nga mga tribo sa Israel; ug ang nawala nga mga tribo sa Israel makabaton sa mga pulong sa mga Nephita ug sa mga Judeo.

14 Ug mahitabo nga ang akong katawhan, nga sakop sa balay ni Israel, pagapundokon pauli ngadto sa mga yuta nga ilang gipanag-iya; ug ang akong pulong usab pagapundukon nga usa. Ug akong ipakita ngadto kanila kinsa makigbatok sa akong pulong ug makigbatok sa akong katawhan, kinsa mga sakop sa balay ni Israel, nga ako ang Dios, ug nga ako nakigsaad uban ni Abraham nga ako mohinumdom sa iyang binhi hangtod sa hangtod.